ശ്രീമദ്വാല്മീകീയ രാമായണേ ബാലകാംഡമ് ।
അഥ ഏകോനപംചാശസ്സര്ഗഃ ।
അഫലസ്തു തതശ്ശക്രോ ദേവാനഗ്നിപുരോഗമാന് ।
അബ്രവീത്ത്രസ്തവദനസ്സര്ഷിസ്സംഘാന് സചാരണാന് ॥ 1 ॥
കുർവതാ തപസോ വിഘ്നം ഗൌതമസ്യ മഹാത്മനഃ ।
ക്രോധമുത്പാദ്യ ഹി മയാ സുരകാര്യമിദം കൃതമ് ॥ 2 ॥
അഫലോഽസ്മി കൃതസ്തേന ക്രോധാത്സാ ച നിരാകൃതാ ।
ശാപമോക്ഷേണ മഹതാ തപോഽസ്യാപഹൃതം മയാ ॥ 3 ॥
തസ്മാത്സുരവരാസ്സർവേ സര്ഷിസ്സംഘാസ്സചാരണാഃ ।
സുരസാഹ്യകരം സർവേ സഫലം കര്തുമര്ഹഥ ॥ 4 ॥
ശതക്രതോർവചശ്ശ്രുത്വാ ദേവാസ്സാഗ്നിപുരോഗമാഃ ।
പിതൃദേവാനുപേത്യാഹു സ്സഹ സർവൈര്മരുദ്ഗണൈഃ ॥ 5 ॥
അയം മേഷസ്സവൃഷണശ്ശക്രോ ഹ്യവൃഷണഃ കൃതഃ ।
മേഷസ്യ വൃഷണൌ ഗൃഹ്യ ശക്രായാഽശു പ്രയച്ഛഥ ॥ 6 ॥
അഫലസ്തു കൃതോ മേഷഃ പരാം തുഷ്ടിം പ്രദാസ്യതി ।
ഭവതാം ഹര്ഷണാര്ഥായ യേ ച ദാസ്യംതി മാനവാഃ ॥ 7 ॥
അഗ്നേസ്തു വചനം ശ്രുത്വാ പിതൃദേവാസ്സമാഗതാഃ ।
ഉത്പാട്യ മേഷവൃഷണൌ സഹസ്രാക്ഷേ ന്യവേശയന് ॥ 8 ॥
തദാ പ്രഭൃതി കാകുത്സ്ഥ പിതൃദേവാസ്സമാഗതാഃ ।
അഫലാന് ഭുംജതേ മേഷാന് ഫലൈസ്തേഷാമയോജയന് ॥ 9 ॥
ഇംദ്രസ്തു മേഷവൃഷണസ്തദാപ്രഭൃതി രാഘവ ।
ഗൌതമസ്യ പ്രഭാവേന തപസശ്ച മഹാത്മനഃ ॥ 10 ॥
തദാഗച്ഛ മഹാതേജ ആശ്രമം പുണ്യകര്മണഃ ।
താരയൈനാം മഹാഭാഗാമഹല്യാം ദേവരൂപിണീമ് ॥ 11 ॥
വിശ്വാമിത്രവചശ്ശ്രുത്വാ രാഘവസ്സഹലക്ഷ്മണഃ ।
വിശ്വാമിത്രം പുരസ്കൃത്യ തമാശ്രമമഥാവിശത് ॥ 12 ॥
ദദര്ശ ച മഹാഭാഗാം തപസാ ദ്യോതിതപ്രഭാമ് ।
ലോകൈരപി സമാഗമ്യ ദുര്നിരീക്ഷ്യാം സുരാസുരൈഃ ॥ 13 ॥
പ്രയത്നാന്നിര്മിതാം ധാത്രാ ദിവ്യാം മായാമയീമിവ ।
സ തുഷാരാവൃതാം സാഭ്രാം പൂര്ണചംദ്രപ്രഭാമിവ ॥ 14 ॥
മധ്യേംഽഭസോ ദുരാധര്ഷാം ദീപ്താം സൂര്യപ്രഭാമിവ ।
സാ ഹി ഗൌതമവാക്യേന ദുര്നിരീക്ഷ്യാ ബഭൂവ ഹ ॥ 15 ॥
ത്രയാണാമപി ലോകാനാം യാവദ്രാമസ്യ ദര്ശനമ് ।
ശാപസ്യാംതമുപാഗമ്യ തേഷാം ദര്ശനമാഗതാ ॥ 16 ॥
രാഘവൌ തു തതസ്തസ്യാഃ പാദൌ ജഗൃഹതുസ്തദാ ।
സ്മരംതീ ഗൌതമവചഃ പ്രതിജഗ്രാഹ സാ ച തൌ ॥ 17 ॥
പാദ്യമര്ഘ്യം തഥാഽഽതിഥ്യം ചകാര സുസമാഹിതാ ।
പ്രതിജഗ്രാഹ കാകുത്സ്ഥോ വിധിദൃഷ്ടേന കര്മണാ ॥ 18 ॥
പുഷ്പവൃഷ്ടിര്മഹത്യാസീദ്ദേവദുംദുഭിനിസ്വനൈഃ ।
ഗംധർവാപ്സരസാം ചൈവ മഹാനാസീത്സമാഗമഃ ॥ 19 ॥
സാധു സാധ്വിതി ദേവാസ്താമഹല്യാം സമപൂജയന് ।
തപോബലവിശുദ്ധാംഗീ ഗൌതമസ്യ വശാനുഗാമ് ॥ 20 ॥
ഗൌതമോഽപി മഹാതേജാ അഹല്യാസഹിതസ്സുഖീ ।
രാമം സംപൂജ്യ വിധിവത്തപസ്തേപേ മഹാതപാഃ ॥ 21 ॥
രാമോഽപി പരമാം പൂജാം ഗൌതമസ്യ മഹാമുനേഃ ।
സകാശാദ്വിധിവത്പ്രാപ്യ ജഗാമ മിഥിലാം തതഃ ॥ 22 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ഏകോനപംചാശസ്സര്ഗഃ ॥
