શ્રીમદ્વાલ્મીકીય રામાયણે બાલકાંડમ્ ।
અથ એકોનપંચાશસ્સર્ગઃ ।
અફલસ્તુ તતશ્શક્રો દેવાનગ્નિપુરોગમાન્ ।
અબ્રવીત્ત્રસ્તવદનસ્સર્ષિસ્સંઘાન્ સચારણાન્ ॥ 1 ॥
કુર્વતા તપસો વિઘ્નં ગૌતમસ્ય મહાત્મનઃ ।
ક્રોધમુત્પાદ્ય હિ મયા સુરકાર્યમિદં કૃતમ્ ॥ 2 ॥
અફલોઽસ્મિ કૃતસ્તેન ક્રોધાત્સા ચ નિરાકૃતા ।
શાપમોક્ષેણ મહતા તપોઽસ્યાપહૃતં મયા ॥ 3 ॥
તસ્માત્સુરવરાસ્સર્વે સર્ષિસ્સંઘાસ્સચારણાઃ ।
સુરસાહ્યકરં સર્વે સફલં કર્તુમર્હથ ॥ 4 ॥
શતક્રતોર્વચશ્શ્રુત્વા દેવાસ્સાગ્નિપુરોગમાઃ ।
પિતૃદેવાનુપેત્યાહુ સ્સહ સર્વૈર્મરુદ્ગણૈઃ ॥ 5 ॥
અયં મેષસ્સવૃષણશ્શક્રો હ્યવૃષણઃ કૃતઃ ।
મેષસ્ય વૃષણૌ ગૃહ્ય શક્રાયાઽશુ પ્રયચ્છથ ॥ 6 ॥
અફલસ્તુ કૃતો મેષઃ પરાં તુષ્ટિં પ્રદાસ્યતિ ।
ભવતાં હર્ષણાર્થાય યે ચ દાસ્યંતિ માનવાઃ ॥ 7 ॥
અગ્નેસ્તુ વચનં શ્રુત્વા પિતૃદેવાસ્સમાગતાઃ ।
ઉત્પાટ્ય મેષવૃષણૌ સહસ્રાક્ષે ન્યવેશયન્ ॥ 8 ॥
તદા પ્રભૃતિ કાકુત્સ્થ પિતૃદેવાસ્સમાગતાઃ ।
અફલાન્ ભુંજતે મેષાન્ ફલૈસ્તેષામયોજયન્ ॥ 9 ॥
ઇંદ્રસ્તુ મેષવૃષણસ્તદાપ્રભૃતિ રાઘવ ।
ગૌતમસ્ય પ્રભાવેન તપસશ્ચ મહાત્મનઃ ॥ 10 ॥
તદાગચ્છ મહાતેજ આશ્રમં પુણ્યકર્મણઃ ।
તારયૈનાં મહાભાગામહલ્યાં દેવરૂપિણીમ્ ॥ 11 ॥
વિશ્વામિત્રવચશ્શ્રુત્વા રાઘવસ્સહલક્ષ્મણઃ ।
વિશ્વામિત્રં પુરસ્કૃત્ય તમાશ્રમમથાવિશત્ ॥ 12 ॥
દદર્શ ચ મહાભાગાં તપસા દ્યોતિતપ્રભામ્ ।
લોકૈરપિ સમાગમ્ય દુર્નિરીક્ષ્યાં સુરાસુરૈઃ ॥ 13 ॥
પ્રયત્નાન્નિર્મિતાં ધાત્રા દિવ્યાં માયામયીમિવ ।
સ તુષારાવૃતાં સાભ્રાં પૂર્ણચંદ્રપ્રભામિવ ॥ 14 ॥
મધ્યેંઽભસો દુરાધર્ષાં દીપ્તાં સૂર્યપ્રભામિવ ।
સા હિ ગૌતમવાક્યેન દુર્નિરીક્ષ્યા બભૂવ હ ॥ 15 ॥
ત્રયાણામપિ લોકાનાં યાવદ્રામસ્ય દર્શનમ્ ।
શાપસ્યાંતમુપાગમ્ય તેષાં દર્શનમાગતા ॥ 16 ॥
રાઘવૌ તુ તતસ્તસ્યાઃ પાદૌ જગૃહતુસ્તદા ।
સ્મરંતી ગૌતમવચઃ પ્રતિજગ્રાહ સા ચ તૌ ॥ 17 ॥
પાદ્યમર્ઘ્યં તથાઽઽતિથ્યં ચકાર સુસમાહિતા ।
પ્રતિજગ્રાહ કાકુત્સ્થો વિધિદૃષ્ટેન કર્મણા ॥ 18 ॥
પુષ્પવૃષ્ટિર્મહત્યાસીદ્દેવદુંદુભિનિસ્વનૈઃ ।
ગંધર્વાપ્સરસાં ચૈવ મહાનાસીત્સમાગમઃ ॥ 19 ॥
સાધુ સાધ્વિતિ દેવાસ્તામહલ્યાં સમપૂજયન્ ।
તપોબલવિશુદ્ધાંગી ગૌતમસ્ય વશાનુગામ્ ॥ 20 ॥
ગૌતમોઽપિ મહાતેજા અહલ્યાસહિતસ્સુખી ।
રામં સંપૂજ્ય વિધિવત્તપસ્તેપે મહાતપાઃ ॥ 21 ॥
રામોઽપિ પરમાં પૂજાં ગૌતમસ્ય મહામુનેઃ ।
સકાશાદ્વિધિવત્પ્રાપ્ય જગામ મિથિલાં તતઃ ॥ 22 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે એકોનપંચાશસ્સર્ગઃ ॥
