śrīmadvālmīkīya rāmāyaṇē bālakāṇḍam ।
atha ēkōnapañchāśassargaḥ ।
aphalastu tataśśakrō dēvānagnipurōgamān ।
abravīttrastavadanassarṣissaṅghān sachāraṇān ॥ 1 ॥
kurvatā tapasō vighnaṃ gautamasya mahātmanaḥ ।
krōdhamutpādya hi mayā surakāryamidaṃ kṛtam ॥ 2 ॥
aphalō'smi kṛtastēna krōdhātsā cha nirākṛtā ।
śāpamōkṣēṇa mahatā tapō'syāpahṛtaṃ mayā ॥ 3 ॥
tasmātsuravarāssarvē sarṣissaṅghāssachāraṇāḥ ।
surasāhyakaraṃ sarvē saphalaṃ kartumarhatha ॥ 4 ॥
śatakratōrvachaśśrutvā dēvāssāgnipurōgamāḥ ।
pitṛdēvānupētyāhu ssaha sarvairmarudgaṇaiḥ ॥ 5 ॥
ayaṃ mēṣassavṛṣaṇaśśakrō hyavṛṣaṇaḥ kṛtaḥ ।
mēṣasya vṛṣaṇau gṛhya śakrāyā'śu prayachChatha ॥ 6 ॥
aphalastu kṛtō mēṣaḥ parāṃ tuṣṭiṃ pradāsyati ।
bhavatāṃ harṣaṇārthāya yē cha dāsyanti mānavāḥ ॥ 7 ॥
agnēstu vachanaṃ śrutvā pitṛdēvāssamāgatāḥ ।
utpāṭya mēṣavṛṣaṇau sahasrākṣē nyavēśayan ॥ 8 ॥
tadā prabhṛti kākutstha pitṛdēvāssamāgatāḥ ।
aphalān bhuñjatē mēṣān phalaistēṣāmayōjayan ॥ 9 ॥
indrastu mēṣavṛṣaṇastadāprabhṛti rāghava ।
gautamasya prabhāvēna tapasaścha mahātmanaḥ ॥ 10 ॥
tadāgachCha mahātēja āśramaṃ puṇyakarmaṇaḥ ।
tārayaināṃ mahābhāgāmahalyāṃ dēvarūpiṇīm ॥ 11 ॥
viśvāmitravachaśśrutvā rāghavassahalakṣmaṇaḥ ।
viśvāmitraṃ puraskṛtya tamāśramamathāviśat ॥ 12 ॥
dadarśa cha mahābhāgāṃ tapasā dyōtitaprabhām ।
lōkairapi samāgamya durnirīkṣyāṃ surāsuraiḥ ॥ 13 ॥
prayatnānnirmitāṃ dhātrā divyāṃ māyāmayīmiva ।
sa tuṣārāvṛtāṃ sābhrāṃ pūrṇachandraprabhāmiva ॥ 14 ॥
madhyēṃ'bhasō durādharṣāṃ dīptāṃ sūryaprabhāmiva ।
sā hi gautamavākyēna durnirīkṣyā babhūva ha ॥ 15 ॥
trayāṇāmapi lōkānāṃ yāvadrāmasya darśanam ।
śāpasyāntamupāgamya tēṣāṃ darśanamāgatā ॥ 16 ॥
rāghavau tu tatastasyāḥ pādau jagṛhatustadā ।
smarantī gautamavachaḥ pratijagrāha sā cha tau ॥ 17 ॥
pādyamarghyaṃ tathā''tithyaṃ chakāra susamāhitā ।
pratijagrāha kākutsthō vidhidṛṣṭēna karmaṇā ॥ 18 ॥
puṣpavṛṣṭirmahatyāsīddēvadundubhinisvanaiḥ ।
gandharvāpsarasāṃ chaiva mahānāsītsamāgamaḥ ॥ 19 ॥
sādhu sādhviti dēvāstāmahalyāṃ samapūjayan ।
tapōbalaviśuddhāṅgī gautamasya vaśānugām ॥ 20 ॥
gautamō'pi mahātējā ahalyāsahitassukhī ।
rāmaṃ sampūjya vidhivattapastēpē mahātapāḥ ॥ 21 ॥
rāmō'pi paramāṃ pūjāṃ gautamasya mahāmunēḥ ।
sakāśādvidhivatprāpya jagāma mithilāṃ tataḥ ॥ 22 ॥
ityārṣē śrīmadrāmāyaṇē vālmīkīya ādikāvyē bālakāṇḍē ēkōnapañchāśassargaḥ ॥
