শ্রীমদ্বাল্মীকীয় রামাযণে বালকাংডম্ ।
অথ অষ্টপংচাশস্সর্গঃ ।
ততস্ত্রিশংকোর্বচনং শ্রুত্বা ক্রোধসমন্বিতম্ ।
ঋষিপুত্রশতং রাম রাজানমিদমব্রবীত্ ॥ 1 ॥
প্রত্য়াখ্য়াতো হি দুর্বুদ্ধে গুরুণা সত্যবাদিনা ।
তং কথং সমতিক্রম্য় শাখাংতরমুপেয়িবান্ ॥ 2 ॥
ইক্ষ্বাকূণাং হি সর্বেষাং পুরোধাঃ পরমো গুরুঃ ।
ন চাতিক্রমিতুং শক্য়ং বচনং সত্যবাদিনঃ ॥ 3 ॥
অশক্যমিতি চোবাচ বসিষ্ঠো ভগবানৃষিঃ ।
তং বয়ং বৈ সমাহর্তুং ক্রতুং শক্তাঃকথং তব ॥ 4 ॥
বালিশস্ত্বং নরশ্রেষ্ঠ গম্যতাং স্বপুরং পুনঃ ।
যাজনে ভগবাংছক্তস্ত্রৈলোক্যস্য়াপি পার্থিব ॥ 5 ॥
অবমানং চ তত্কর্তুং তস্য় শক্ষ্য়ামহে কথম্ ।
তেষাং তদ্বচনং শ্রুত্বা ক্রোধপর্য়াকুলাক্ষরম্ ॥ 6 ॥
স রাজা পুনরেবৈতানিদং বচনমব্রবীত্ ।
প্রত্য়াখ্য়াতোঽস্মি গুরুণা গুরুপুত্রৈস্তথৈব চ ॥ 7 ॥
অন্য়াং গতিং গমিষ্য়ামি স্বস্তি বোঽস্তু তপোধনাঃ ।
ঋষিপুত্রাস্তু তচ্ছ্রুত্বা বাক্য়ং ঘোরাভিসংহিতম্ ॥ 8 ॥
শেপুঃ পরমসংকৃদ্ধাশ্চংডালত্বং গমিষ্যসি ।
এবমুক্ত্বা মহাত্মনো বিবিশুস্তে স্বমাশ্রমম্ ॥ 9 ॥
অথ রাত্র্য়াং ব্যতীতায়াং রাজা চংডালতাং গতঃ ।
নীলবস্ত্রধরো নীলঃ পুরুষো ধ্বস্তমূর্ধজঃ ॥ 10 ॥
চিত্যমাল্য়ানুলেপশ্চ আযসাভরণোঽভবত্ ।
তং দৃষ্টবা মংত্রিণস্সর্বে ত্যজ্য় চংডালরূপিণম্ ॥ 11 ॥
প্রাদ্রবন্ সহিতা রাম পৌরা যেঽস্য়ানুগামিনঃ ।
একো হি রাজা কাকুত্স্থ জগাম পরমাত্মবান্ ॥ 12 ॥
দহ্যমানো দিবারাত্রং বিশ্বামিত্রং তপোনিধিম্ ।
বিশ্বামিত্রস্তু তং দৃষ্ট্বা রাজানং বিফলীকৃতম্ ।
চংডালরূপিণং রাম মুনিঃ কারুণ্যমাগতঃ ॥ 13 ॥
কারুণ্য়াত্স মহাতেজা বাক্য়ং পরমধার্মিকঃ ।
ইদং জগাদ ভদ্রং তে রাজানং ঘোররূপিণম্ ॥ 14 ॥
কিমাগমনকার্য়ং তে রাজপুত্র মহাবল ।
অয়োধ্য়াধিপতে বীর শাপাচ্চংডালতাং গতঃ ॥ 15 ॥
অথ তদ্বাক্যমাজ্ঞায় রাজা চংডালতাং গতঃ ।
অব্রবীত্প্রাংজলির্বাক্য়ং বাক্যজ্ঞো বাক্যকোবিদম্ ॥ 16 ॥
প্রত্য়াখ্য়াতোঽস্মি গুরুণা গুরুপুত্রৈস্তথৈব চ ।
অনবাপ্য়ৈব তং কামং ময়া প্রাপ্তো বিপর্যয়ঃ ॥ 17 ॥
সশরীরো দিবং যায়ামিতি মে সৌম্যদর্শনম্ ।
ময়া চেষ্টং ক্রতুশতং তচ্চ নাঽবাপ্যতে ফলম্ ॥ 18 ॥
অনৃতং নোক্তপূর্বং মে ন চ বক্ষ্য়ে কদাচন ।
কৃচ্ছ্রেষ্বপি গত স্সৌম্য় ক্ষত্রধর্মেণ তে শপে ॥ 19 ॥
যজ্ঞৈর্বহুবিধৈরিষ্টং প্রজা ধর্মেণ পালিতাঃ ॥ 20 ॥
গুরবশ্চ মহাত্মান শ্শীলবৃত্তেন তোষিতাঃ ।
ধর্মে প্রযতমানস্য় যজ্ঞং চাহর্তুমিচ্ছতঃ ॥ 21 ॥
পরিতোষং ন গচ্ছংতি গুরবো মুনিপুংগব ।
দৈবমেব পরং মন্য়ে পৌরুষং তু নিরর্থকম্ ॥ 22 ॥
দৈবেনাক্রম্যতে সর্বং দৈবং হি পরমা গতিঃ ।
তস্য় মে পরমার্তস্য় প্রসাদমভিকাংক্ষতঃ ॥ 23 ॥
কর্তুমর্হসি ভদ্রং তে দৈবোপহতকর্মণঃ ।
নান্য়াং গতিং গমিষ্য়ামি নান্যশ্শরণমস্তি মে ॥ 24 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে অষ্টপংচাশস্সর্গঃ ॥
