ശ്രീമദ്വാല്മീകീയ രാമായണേ ബാലകാംഡമ് ।
അഥ അഷ്ടപംചാശസ്സര്ഗഃ ।
തതസ്ത്രിശംകോർവചനം ശ്രുത്വാ ക്രോധസമന്വിതമ് ।
ഋഷിപുത്രശതം രാമ രാജാനമിദമബ്രവീത് ॥ 1 ॥
പ്രത്യാഖ്യാതോ ഹി ദുര്ബുദ്ധേ ഗുരുണാ സത്യവാദിനാ ।
തം കഥം സമതിക്രമ്യ ശാഖാംതരമുപേയിവാന് ॥ 2 ॥
ഇക്ഷ്വാകൂണാം ഹി സർവേഷാം പുരോധാഃ പരമോ ഗുരുഃ ।
ന ചാതിക്രമിതും ശക്യം വചനം സത്യവാദിനഃ ॥ 3 ॥
അശക്യമിതി ചോവാച വസിഷ്ഠോ ഭഗവാനൃഷിഃ ।
തം വയം വൈ സമാഹര്തും ക്രതും ശക്താഃകഥം തവ ॥ 4 ॥
ബാലിശസ്ത്വം നരശ്രേഷ്ഠ ഗമ്യതാം സ്വപുരം പുനഃ ।
യാജനേ ഭഗവാംഛക്തസ്ത്രൈലോക്യസ്യാപി പാര്ഥിവ ॥ 5 ॥
അവമാനം ച തത്കര്തും തസ്യ ശക്ഷ്യാമഹേ കഥമ് ।
തേഷാം തദ്വചനം ശ്രുത്വാ ക്രോധപര്യാകുലാക്ഷരമ് ॥ 6 ॥
സ രാജാ പുനരേവൈതാനിദം വചനമബ്രവീത് ।
പ്രത്യാഖ്യാതോഽസ്മി ഗുരുണാ ഗുരുപുത്രൈസ്തഥൈവ ച ॥ 7 ॥
അന്യാം ഗതിം ഗമിഷ്യാമി സ്വസ്തി വോഽസ്തു തപോധനാഃ ।
ഋഷിപുത്രാസ്തു തച്ഛ്രുത്വാ വാക്യം ഘോരാഭിസംഹിതമ് ॥ 8 ॥
ശേപുഃ പരമസംകൃദ്ധാശ്ചംഡാലത്വം ഗമിഷ്യസി ।
ഏവമുക്ത്വാ മഹാത്മനോ വിവിശുസ്തേ സ്വമാശ്രമമ് ॥ 9 ॥
അഥ രാത്ര്യാം വ്യതീതായാം രാജാ ചംഡാലതാം ഗതഃ ।
നീലവസ്ത്രധരോ നീലഃ പുരുഷോ ധ്വസ്തമൂര്ധജഃ ॥ 10 ॥
ചിത്യമാല്യാനുലേപശ്ച ആയസാഭരണോഽഭവത് ।
തം ദൃഷ്ടവാ മംത്രിണസ്സർവേ ത്യജ്യ ചംഡാലരൂപിണമ് ॥ 11 ॥
പ്രാദ്രവന് സഹിതാ രാമ പൌരാ യേഽസ്യാനുഗാമിനഃ ।
ഏകോ ഹി രാജാ കാകുത്സ്ഥ ജഗാമ പരമാത്മവാന് ॥ 12 ॥
ദഹ്യമാനോ ദിവാരാത്രം വിശ്വാമിത്രം തപോനിധിമ് ।
വിശ്വാമിത്രസ്തു തം ദൃഷ്ട്വാ രാജാനം വിഫലീകൃതമ് ।
ചംഡാലരൂപിണം രാമ മുനിഃ കാരുണ്യമാഗതഃ ॥ 13 ॥
കാരുണ്യാത്സ മഹാതേജാ വാക്യം പരമധാര്മികഃ ।
ഇദം ജഗാദ ഭദ്രം തേ രാജാനം ഘോരരൂപിണമ് ॥ 14 ॥
കിമാഗമനകാര്യം തേ രാജപുത്ര മഹാബല ।
അയോധ്യാധിപതേ വീര ശാപാച്ചംഡാലതാം ഗതഃ ॥ 15 ॥
അഥ തദ്വാക്യമാജ്ഞായ രാജാ ചംഡാലതാം ഗതഃ ।
അബ്രവീത്പ്രാംജലിർവാക്യം വാക്യജ്ഞോ വാക്യകോവിദമ് ॥ 16 ॥
പ്രത്യാഖ്യാതോഽസ്മി ഗുരുണാ ഗുരുപുത്രൈസ്തഥൈവ ച ।
അനവാപ്യൈവ തം കാമം മയാ പ്രാപ്തോ വിപര്യയഃ ॥ 17 ॥
സശരീരോ ദിവം യായാമിതി മേ സൌമ്യദര്ശനമ് ।
മയാ ചേഷ്ടം ക്രതുശതം തച്ച നാഽവാപ്യതേ ഫലമ് ॥ 18 ॥
അനൃതം നോക്തപൂർവം മേ ന ച വക്ഷ്യേ കദാചന ।
കൃച്ഛ്രേഷ്വപി ഗത സ്സൌമ്യ ക്ഷത്രധര്മേണ തേ ശപേ ॥ 19 ॥
യജ്ഞൈര്ബഹുവിധൈരിഷ്ടം പ്രജാ ധര്മേണ പാലിതാഃ ॥ 20 ॥
ഗുരവശ്ച മഹാത്മാന ശ്ശീലവൃത്തേന തോഷിതാഃ ।
ധര്മേ പ്രയതമാനസ്യ യജ്ഞം ചാഹര്തുമിച്ഛതഃ ॥ 21 ॥
പരിതോഷം ന ഗച്ഛംതി ഗുരവോ മുനിപുംഗവ ।
ദൈവമേവ പരം മന്യേ പൌരുഷം തു നിരര്ഥകമ് ॥ 22 ॥
ദൈവേനാക്രമ്യതേ സർവം ദൈവം ഹി പരമാ ഗതിഃ ।
തസ്യ മേ പരമാര്തസ്യ പ്രസാദമഭികാംക്ഷതഃ ॥ 23 ॥
കര്തുമര്ഹസി ഭദ്രം തേ ദൈവോപഹതകര്മണഃ ।
നാന്യാം ഗതിം ഗമിഷ്യാമി നാന്യശ്ശരണമസ്തി മേ ॥ 24 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ അഷ്ടപംചാശസ്സര്ഗഃ ॥
