śrīmadvālmīkīya rāmāyaṇē bālakāṇḍam ।
atha aṣṭapañchāśassargaḥ ।
tatastriśaṅkōrvachanaṃ śrutvā krōdhasamanvitam ।
ṛṣiputraśataṃ rāma rājānamidamabravīt ॥ 1 ॥
pratyākhyātō hi durbuddhē guruṇā satyavādinā ।
taṃ kathaṃ samatikramya śākhāntaramupēyivān ॥ 2 ॥
ikṣvākūṇāṃ hi sarvēṣāṃ purōdhāḥ paramō guruḥ ।
na chātikramituṃ śakyaṃ vachanaṃ satyavādinaḥ ॥ 3 ॥
aśakyamiti chōvācha vasiṣṭhō bhagavānṛṣiḥ ।
taṃ vayaṃ vai samāhartuṃ kratuṃ śaktāḥkathaṃ tava ॥ 4 ॥
bāliśastvaṃ naraśrēṣṭha gamyatāṃ svapuraṃ punaḥ ।
yājanē bhagavāñChaktastrailōkyasyāpi pārthiva ॥ 5 ॥
avamānaṃ cha tatkartuṃ tasya śakṣyāmahē katham ।
tēṣāṃ tadvachanaṃ śrutvā krōdhaparyākulākṣaram ॥ 6 ॥
sa rājā punarēvaitānidaṃ vachanamabravīt ।
pratyākhyātō'smi guruṇā guruputraistathaiva cha ॥ 7 ॥
anyāṃ gatiṃ gamiṣyāmi svasti vō'stu tapōdhanāḥ ।
ṛṣiputrāstu tachChrutvā vākyaṃ ghōrābhisaṃhitam ॥ 8 ॥
śēpuḥ paramasaṅkṛddhāśchaṇḍālatvaṃ gamiṣyasi ।
ēvamuktvā mahātmanō viviśustē svamāśramam ॥ 9 ॥
atha rātryāṃ vyatītāyāṃ rājā chaṇḍālatāṃ gataḥ ।
nīlavastradharō nīlaḥ puruṣō dhvastamūrdhajaḥ ॥ 10 ॥
chityamālyānulēpaścha āyasābharaṇō'bhavat ।
taṃ dṛṣṭavā mantriṇassarvē tyajya chaṇḍālarūpiṇam ॥ 11 ॥
prādravan sahitā rāma paurā yē'syānugāminaḥ ।
ēkō hi rājā kākutstha jagāma paramātmavān ॥ 12 ॥
dahyamānō divārātraṃ viśvāmitraṃ tapōnidhim ।
viśvāmitrastu taṃ dṛṣṭvā rājānaṃ viphalīkṛtam ।
chaṇḍālarūpiṇaṃ rāma muniḥ kāruṇyamāgataḥ ॥ 13 ॥
kāruṇyātsa mahātējā vākyaṃ paramadhārmikaḥ ।
idaṃ jagāda bhadraṃ tē rājānaṃ ghōrarūpiṇam ॥ 14 ॥
kimāgamanakāryaṃ tē rājaputra mahābala ।
ayōdhyādhipatē vīra śāpāchchaṇḍālatāṃ gataḥ ॥ 15 ॥
atha tadvākyamājñāya rājā chaṇḍālatāṃ gataḥ ।
abravītprāñjalirvākyaṃ vākyajñō vākyakōvidam ॥ 16 ॥
pratyākhyātō'smi guruṇā guruputraistathaiva cha ।
anavāpyaiva taṃ kāmaṃ mayā prāptō viparyayaḥ ॥ 17 ॥
saśarīrō divaṃ yāyāmiti mē saumyadarśanam ।
mayā chēṣṭaṃ kratuśataṃ tachcha nā'vāpyatē phalam ॥ 18 ॥
anṛtaṃ nōktapūrvaṃ mē na cha vakṣyē kadāchana ।
kṛchChrēṣvapi gata ssaumya kṣatradharmēṇa tē śapē ॥ 19 ॥
yajñairbahuvidhairiṣṭaṃ prajā dharmēṇa pālitāḥ ॥ 20 ॥
guravaścha mahātmāna śśīlavṛttēna tōṣitāḥ ।
dharmē prayatamānasya yajñaṃ chāhartumichChataḥ ॥ 21 ॥
paritōṣaṃ na gachChanti guravō munipuṅgava ।
daivamēva paraṃ manyē pauruṣaṃ tu nirarthakam ॥ 22 ॥
daivēnākramyatē sarvaṃ daivaṃ hi paramā gatiḥ ।
tasya mē paramārtasya prasādamabhikāṅkṣataḥ ॥ 23 ॥
kartumarhasi bhadraṃ tē daivōpahatakarmaṇaḥ ।
nānyāṃ gatiṃ gamiṣyāmi nānyaśśaraṇamasti mē ॥ 24 ॥
ityārṣē śrīmadrāmāyaṇē vālmīkīya ādikāvyē bālakāṇḍē aṣṭapañchāśassargaḥ ॥
