ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଅଷ୍ଟପଂଚାଶସ୍ସର୍ଗଃ ।
ତତସ୍ତ୍ରିଶଂକୋର୍ଵଚନଂ ଶ୍ରୁତ୍ଵା କ୍ରୋଧସମନ୍ଵିତମ୍ ।
ଋଷିପୁତ୍ରଶତଂ ରାମ ରାଜାନମିଦମବ୍ରଵୀତ୍ ॥ 1 ॥
ପ୍ରତ୍ୟାଖ୍ୟାତୋ ହି ଦୁର୍ବୁଦ୍ଧେ ଗୁରୁଣା ସତ୍ୟଵାଦିନା ।
ତଂ କଥଂ ସମତିକ୍ରମ୍ୟ ଶାଖାଂତରମୁପେୟିଵାନ୍ ॥ 2 ॥
ଇକ୍ଷ୍ଵାକୂଣାଂ ହି ସର୍ଵେଷାଂ ପୁରୋଧାଃ ପରମୋ ଗୁରୁଃ ।
ନ ଚାତିକ୍ରମିତୁଂ ଶକ୍ୟଂ ଵଚନଂ ସତ୍ୟଵାଦିନଃ ॥ 3 ॥
ଅଶକ୍ୟମିତି ଚୋଵାଚ ଵସିଷ୍ଠୋ ଭଗଵାନୃଷିଃ ।
ତଂ ଵୟଂ ଵୈ ସମାହର୍ତୁଂ କ୍ରତୁଂ ଶକ୍ତାଃକଥଂ ତଵ ॥ 4 ॥
ବାଲିଶସ୍ତ୍ଵଂ ନରଶ୍ରେଷ୍ଠ ଗମ୍ୟତାଂ ସ୍ଵପୁରଂ ପୁନଃ ।
ୟାଜନେ ଭଗଵାଂଛକ୍ତସ୍ତ୍ରୈଲୋକ୍ୟସ୍ୟାପି ପାର୍ଥିଵ ॥ 5 ॥
ଅଵମାନଂ ଚ ତତ୍କର୍ତୁଂ ତସ୍ୟ ଶକ୍ଷ୍ୟାମହେ କଥମ୍ ।
ତେଷାଂ ତଦ୍ଵଚନଂ ଶ୍ରୁତ୍ଵା କ୍ରୋଧପର୍ୟାକୁଲାକ୍ଷରମ୍ ॥ 6 ॥
ସ ରାଜା ପୁନରେଵୈତାନିଦଂ ଵଚନମବ୍ରଵୀତ୍ ।
ପ୍ରତ୍ୟାଖ୍ୟାତୋଽସ୍ମି ଗୁରୁଣା ଗୁରୁପୁତ୍ରୈସ୍ତଥୈଵ ଚ ॥ 7 ॥
ଅନ୍ୟାଂ ଗତିଂ ଗମିଷ୍ୟାମି ସ୍ଵସ୍ତି ଵୋଽସ୍ତୁ ତପୋଧନାଃ ।
ଋଷିପୁତ୍ରାସ୍ତୁ ତଚ୍ଛ୍ରୁତ୍ଵା ଵାକ୍ୟଂ ଘୋରାଭିସଂହିତମ୍ ॥ 8 ॥
ଶେପୁଃ ପରମସଂକୃଦ୍ଧାଶ୍ଚଂଡାଲତ୍ଵଂ ଗମିଷ୍ୟସି ।
ଏଵମୁକ୍ତ୍ଵା ମହାତ୍ମନୋ ଵିଵିଶୁସ୍ତେ ସ୍ଵମାଶ୍ରମମ୍ ॥ 9 ॥
ଅଥ ରାତ୍ର୍ୟାଂ ଵ୍ୟତୀତାୟାଂ ରାଜା ଚଂଡାଲତାଂ ଗତଃ ।
ନୀଲଵସ୍ତ୍ରଧରୋ ନୀଲଃ ପୁରୁଷୋ ଧ୍ଵସ୍ତମୂର୍ଧଜଃ ॥ 10 ॥
ଚିତ୍ୟମାଲ୍ୟାନୁଲେପଶ୍ଚ ଆୟସାଭରଣୋଽଭଵତ୍ ।
ତଂ ଦୃଷ୍ଟଵା ମଂତ୍ରିଣସ୍ସର୍ଵେ ତ୍ୟଜ୍ୟ ଚଂଡାଲରୂପିଣମ୍ ॥ 11 ॥
ପ୍ରାଦ୍ରଵନ୍ ସହିତା ରାମ ପୌରା ୟେଽସ୍ୟାନୁଗାମିନଃ ।
ଏକୋ ହି ରାଜା କାକୁତ୍ସ୍ଥ ଜଗାମ ପରମାତ୍ମଵାନ୍ ॥ 12 ॥
ଦହ୍ୟମାନୋ ଦିଵାରାତ୍ରଂ ଵିଶ୍ଵାମିତ୍ରଂ ତପୋନିଧିମ୍ ।
ଵିଶ୍ଵାମିତ୍ରସ୍ତୁ ତଂ ଦୃଷ୍ଟ୍ଵା ରାଜାନଂ ଵିଫଲୀକୃତମ୍ ।
ଚଂଡାଲରୂପିଣଂ ରାମ ମୁନିଃ କାରୁଣ୍ୟମାଗତଃ ॥ 13 ॥
କାରୁଣ୍ୟାତ୍ସ ମହାତେଜା ଵାକ୍ୟଂ ପରମଧାର୍ମିକଃ ।
ଇଦଂ ଜଗାଦ ଭଦ୍ରଂ ତେ ରାଜାନଂ ଘୋରରୂପିଣମ୍ ॥ 14 ॥
କିମାଗମନକାର୍ୟଂ ତେ ରାଜପୁତ୍ର ମହାବଲ ।
ଅୟୋଧ୍ୟାଧିପତେ ଵୀର ଶାପାଚ୍ଚଂଡାଲତାଂ ଗତଃ ॥ 15 ॥
ଅଥ ତଦ୍ଵାକ୍ୟମାଜ୍ଞାୟ ରାଜା ଚଂଡାଲତାଂ ଗତଃ ।
ଅବ୍ରଵୀତ୍ପ୍ରାଂଜଲିର୍ଵାକ୍ୟଂ ଵାକ୍ୟଜ୍ଞୋ ଵାକ୍ୟକୋଵିଦମ୍ ॥ 16 ॥
ପ୍ରତ୍ୟାଖ୍ୟାତୋଽସ୍ମି ଗୁରୁଣା ଗୁରୁପୁତ୍ରୈସ୍ତଥୈଵ ଚ ।
ଅନଵାପ୍ୟୈଵ ତଂ କାମଂ ମୟା ପ୍ରାପ୍ତୋ ଵିପର୍ୟୟଃ ॥ 17 ॥
ସଶରୀରୋ ଦିଵଂ ୟାୟାମିତି ମେ ସୌମ୍ୟଦର୍ଶନମ୍ ।
ମୟା ଚେଷ୍ଟଂ କ୍ରତୁଶତଂ ତଚ୍ଚ ନାଽଵାପ୍ୟତେ ଫଲମ୍ ॥ 18 ॥
ଅନୃତଂ ନୋକ୍ତପୂର୍ଵଂ ମେ ନ ଚ ଵକ୍ଷ୍ୟେ କଦାଚନ ।
କୃଚ୍ଛ୍ରେଷ୍ଵପି ଗତ ସ୍ସୌମ୍ୟ କ୍ଷତ୍ରଧର୍ମେଣ ତେ ଶପେ ॥ 19 ॥
ୟଜ୍ଞୈର୍ବହୁଵିଧୈରିଷ୍ଟଂ ପ୍ରଜା ଧର୍ମେଣ ପାଲିତାଃ ॥ 20 ॥
ଗୁରଵଶ୍ଚ ମହାତ୍ମାନ ଶ୍ଶୀଲଵୃତ୍ତେନ ତୋଷିତାଃ ।
ଧର୍ମେ ପ୍ରୟତମାନସ୍ୟ ୟଜ୍ଞଂ ଚାହର୍ତୁମିଚ୍ଛତଃ ॥ 21 ॥
ପରିତୋଷଂ ନ ଗଚ୍ଛଂତି ଗୁରଵୋ ମୁନିପୁଂଗଵ ।
ଦୈଵମେଵ ପରଂ ମନ୍ୟେ ପୌରୁଷଂ ତୁ ନିରର୍ଥକମ୍ ॥ 22 ॥
ଦୈଵେନାକ୍ରମ୍ୟତେ ସର୍ଵଂ ଦୈଵଂ ହି ପରମା ଗତିଃ ।
ତସ୍ୟ ମେ ପରମାର୍ତସ୍ୟ ପ୍ରସାଦମଭିକାଂକ୍ଷତଃ ॥ 23 ॥
କର୍ତୁମର୍ହସି ଭଦ୍ରଂ ତେ ଦୈଵୋପହତକର୍ମଣଃ ।
ନାନ୍ୟାଂ ଗତିଂ ଗମିଷ୍ୟାମି ନାନ୍ୟଶ୍ଶରଣମସ୍ତି ମେ ॥ 24 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଅଷ୍ଟପଂଚାଶସ୍ସର୍ଗଃ ॥
