ශ්රීමද්වාල්මීකීය රාමායණේ බාලකාංඩම් ।
අථ අෂ්ටපංචාශස්සර්ගඃ ।
තතස්ත්රිශංකෝර්වචනං ශ්රුත්වා ක්රෝධසමන්විතම් ।
ඍෂිපුත්රශතං රාම රාජානමිදමබ්රවීත් ॥ 1 ॥
ප්රත්යාඛ්යාතෝ හි දුර්බුද්ධේ ගුරුණා සත්යවාදිනා ।
තං කථං සමතික්රම්ය ශාඛාංතරමුපේයිවාන් ॥ 2 ॥
ඉක්ෂ්වාකූණාං හි සර්වේෂාං පුරෝධාඃ පරමෝ ගුරුඃ ।
න චාතික්රමිතුං ශක්යං වචනං සත්යවාදිනඃ ॥ 3 ॥
අශක්යමිති චෝවාච වසිෂ්ඨෝ භගවානෘෂිඃ ।
තං වයං වෛ සමාහර්තුං ක්රතුං ශක්තාඃකථං තව ॥ 4 ॥
බාලිශස්ත්වං නරශ්රේෂ්ඨ ගම්යතාං ස්වපුරං පුනඃ ।
යාජනේ භගවාංඡක්තස්ත්රෛලෝක්යස්යාපි පාර්ථිව ॥ 5 ॥
අවමානං ච තත්කර්තුං තස්ය ශක්ෂ්යාමහේ කථම් ।
තේෂාං තද්වචනං ශ්රුත්වා ක්රෝධපර්යාකුලාක්ෂරම් ॥ 6 ॥
ස රාජා පුනරේවෛතානිදං වචනමබ්රවීත් ।
ප්රත්යාඛ්යාතෝऽස්මි ගුරුණා ගුරුපුත්රෛස්තථෛව ච ॥ 7 ॥
අන්යාං ගතිං ගමිෂ්යාමි ස්වස්ති වෝऽස්තු තපෝධනාඃ ।
ඍෂිපුත්රාස්තු තච්ඡ්රුත්වා වාක්යං ඝෝරාභිසංහිතම් ॥ 8 ॥
ශේපුඃ පරමසංකෘද්ධාශ්චංඩාලත්වං ගමිෂ්යසි ।
ඒවමුක්ත්වා මහාත්මනෝ විවිශුස්තේ ස්වමාශ්රමම් ॥ 9 ॥
අථ රාත්ර්යාං ව්යතීතායාං රාජා චංඩාලතාං ගතඃ ।
නීලවස්ත්රධරෝ නීලඃ පුරුෂෝ ධ්වස්තමූර්ධජඃ ॥ 10 ॥
චිත්යමාල්යානුලේපශ්ච ආයසාභරණෝऽභවත් ।
තං දෘෂ්ටවා මංත්රිණස්සර්වේ ත්යජ්ය චංඩාලරූපිණම් ॥ 11 ॥
ප්රාද්රවන් සහිතා රාම පෞරා යේऽස්යානුගාමිනඃ ।
ඒකෝ හි රාජා කාකුත්ස්ථ ජගාම පරමාත්මවාන් ॥ 12 ॥
දහ්යමානෝ දිවාරාත්රං විශ්වාමිත්රං තපෝනිධිම් ।
විශ්වාමිත්රස්තු තං දෘෂ්ට්වා රාජානං විඵලීකෘතම් ।
චංඩාලරූපිණං රාම මුනිඃ කාරුණ්යමාගතඃ ॥ 13 ॥
කාරුණ්යාත්ස මහාතේජා වාක්යං පරමධාර්මිකඃ ।
ඉදං ජගාද භද්රං තේ රාජානං ඝෝරරූපිණම් ॥ 14 ॥
කිමාගමනකාර්යං තේ රාජපුත්ර මහාබල ।
අයෝධ්යාධිපතේ වීර ශාපාච්චංඩාලතාං ගතඃ ॥ 15 ॥
අථ තද්වාක්යමාජ්ඤාය රාජා චංඩාලතාං ගතඃ ।
අබ්රවීත්ප්රාංජලිර්වාක්යං වාක්යජ්ඤෝ වාක්යකෝවිදම් ॥ 16 ॥
ප්රත්යාඛ්යාතෝऽස්මි ගුරුණා ගුරුපුත්රෛස්තථෛව ච ।
අනවාප්යෛව තං කාමං මයා ප්රාප්තෝ විපර්යයඃ ॥ 17 ॥
සශරීරෝ දිවං යායාමිති මේ සෞම්යදර්ශනම් ।
මයා චේෂ්ටං ක්රතුශතං තච්ච නාऽවාප්යතේ ඵලම් ॥ 18 ॥
අනෘතං නෝක්තපූර්වං මේ න ච වක්ෂ්යේ කදාචන ।
කෘච්ඡ්රේෂ්වපි ගත ස්සෞම්ය ක්ෂත්රධර්මේණ තේ ශපේ ॥ 19 ॥
යජ්ඤෛර්බහුවිධෛරිෂ්ටං ප්රජා ධර්මේණ පාලිතාඃ ॥ 20 ॥
ගුරවශ්ච මහාත්මාන ශ්ශීලවෘත්තේන තෝෂිතාඃ ।
ධර්මේ ප්රයතමානස්ය යජ්ඤං චාහර්තුමිච්ඡතඃ ॥ 21 ॥
පරිතෝෂං න ගච්ඡංති ගුරවෝ මුනිපුංගව ।
දෛවමේව පරං මන්යේ පෞරුෂං තු නිරර්ථකම් ॥ 22 ॥
දෛවේනාක්රම්යතේ සර්වං දෛවං හි පරමා ගතිඃ ।
තස්ය මේ පරමාර්තස්ය ප්රසාදමභිකාංක්ෂතඃ ॥ 23 ॥
කර්තුමර්හසි භද්රං තේ දෛවෝපහතකර්මණඃ ।
නාන්යාං ගතිං ගමිෂ්යාමි නාන්යශ්ශරණමස්ති මේ ॥ 24 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ අෂ්ටපංචාශස්සර්ගඃ ॥
