ശ്രീമദ്വാല്മീകീയ രാമായണേ ബാലകാംഡമ് ।
അഥ ദ്വിഷഷ്ടിതമസ്സര്ഗഃ ।
ശുനശ്ശേഫം നരശ്രേഷ്ഠ ഗൃഹീത്വാ തു മഹായശാഃ ।
വ്യശ്രാമ്യത് പുഷ്കരേ രാജാ മധ്യാഹ്നേ രഘുനംദന ॥ 1 ॥
തസ്യ വിശ്രമമാണസ്യ ശുനശ്ശേഫോ മഹായശാഃ ।
പുഷ്കരക്ഷേത്രമാഗമ്യ വിശ്വാമിത്രം ദദര്ശ ഹ ॥ 2 ॥
തപ്യംതമൃഷിഭിസ്സാര്ധം മാതുലം പരമാതുരഃ ।
വിവര്ണവദനോ ദീനസ്തൃഷ്ണയാ ച ശ്രമേണ ച ॥ 3 ॥
പപാതാംകേ മുനേരാശു വാക്യം ചേദമുവാച ഹ ।
ന മേഽസ്തി മാതാ ന പിതാ ജ്ഞാതയോ ബാംധവാഃ കുതഃ ॥ 4 ॥
ത്രാതുമര്ഹസി മാം സൌമ്യ ധര്മേണ മുനിപുംഗവ ।
ത്രാതാ ത്വം ഹി മുനിശ്രേഷ്ഠ സർവേഷാം ത്വം ഹി ഭാവനഃ ॥ 5 ॥
രാജാ ച കൃതകാര്യസ്സ്യാദഹം ദീര്ഘായുരവ്യയഃ ।
സ്വര്ഗലോകമുപാശ്നീയാം തപസ്തപ്ത്വാഹ്യനുത്തമമ് ॥ 6 ॥
ത്വം മേ നാഥോ ഹ്യനാഥസ്യ ഭവ ഭവ്യേന ചേതസാ ।
പിതേവ പുത്രം ധര്മാത്മം സ്ത്രാതുമര്ഹസി കില്ബിഷാത് ॥ 7 ॥
തസ്യ തദ്വചനം ശ്രുത്വാ വിശ്വാമിത്രോ മഹാതപാഃ ।
സാംത്വയിത്വാ ബഹുവിധം പുത്രാനിദമുവാച ഹ ॥ 8 ॥
യത്കൃതേ പിതരഃ പുത്രാന് ജനയംതി ശുഭാര്ഥിനഃ ।
പരലോകഹിതാര്ഥായ തസ്യ കാലോഽയമാഗതഃ ॥ 9 ॥
അയം മുനിസുതോ ബാലോ മത്തശ്ശരണമിച്ഛതി ।
അസ്യ ജീവിതമാത്രേണ പ്രിയം കുരുത പുത്രകാഃ ॥ 10 ॥
സർവേ സുകൃതകര്മാണസ്സർവേ ധര്മപരായണാഃ ।
പശുഭൂതാ നരേംദ്രസ്യ തൃപ്തിമഗ്നേഃ പ്രയച്ഛത ॥ 11 ॥
നാഥവാംശ്ച ശുനശ്ശേഫോ യജ്ഞശ്ചാവിഘ്നിതോ ഭവേത് ।
ദേവതാസ്തര്പിതാശ്ചസ്യുര്മമ ചാപി കൃതം വചഃ ॥ 12 ॥
മുനേസ്തു വചനം ശ്രുത്വാ മധുച്ഛംദാദയ സ്സുതാഃ ।
സാഭിമാനം നരശ്രേഷ്ഠ സലീലമിദമബ്രുവന് ॥ 13 ॥
കഥമാത്മസുതാന് ഹിത്വാ ത്രായസേഽന്യസുതം വിഭോ ।
അകാര്യമിവ പശ്യാമ ശ്ശ്വമാംസ ഇവ ഭോജനേ ॥ 14 ॥
തേഷാം തദ്വചനം ശ്രുത്വാ പുത്രാണാം മുനിപുംഗവഃ ।
ക്രോധസംരക്തനയനോ വ്യാഹര്തുമുപചക്രമേ ॥ 15 ॥
നിസ്സാധ്വസമിദം പ്രോക്തം ധര്മാദപി വിഗര്ഹിതമ് ।
അതിക്രമ്യ തു മദ്വാക്യം ദാരുണം രോമഹര്ഷണമ് ॥ 16 ॥
ശ്വമാംസഭോജിനസ്സർവേ വാസിഷ്ഠാ ഇവ ജാതിഷു ।
പൂര്ണം വര്ഷസഹസ്രം തു പൃഥിവ്യാമനുവത്സ്യഥ ॥ 17 ॥
കൃത്വാ ശാപസമായുക്താന് പുത്രാന് മുനിവരസ്തഥാ ।
ശുനശ്ശേഫമുവാചാര്തം കൃത്വാ രക്ഷാം നിരാമയമ് ॥ 18 ॥
പവിത്രപാശൈരാസക്തോ രക്തമാല്യാനുലേപനഃ ।
വൈഷ്ണവം യൂപമാസാദ്യ വാഗ്ഭിരഗ്നിമുദാഹര ॥ 19 ॥
ഇമേ തു ഗാഥേ ദ്വേ ദിവ്യേ ഗായേഥാ മുനിപുത്രക ।
അംബരീഷസ്യ യജ്ഞേഽസ്മിംസ്തത സ്സിദ്ധിമവാപ്സ്യസി ॥ 20 ॥
ശുനശ്ശേഫോ ഗൃഹീത്വാ തേ ദ്വേ ഗാഥേ സുസമാഹിതഃ ।
ത്വരയാ രാജസിംഹം തമംബരീഷമുവാച ഹ ॥ 21 ॥
രാജസിംഹ മഹാസത്ത്വ ശീഘ്രം ഗച്ഛാവഹേ സദഃ ।
നിർവര്തയസ്വ രാജേംദ്ര ദീക്ഷാം ച സമുപാവിശ ॥ 22 ॥
തദ്വാക്യമൃഷിപുത്രസ്യ ശ്രുത്വാ ഹര്ഷസമുത്സുകഃ ।
ജഗാമ നൃപതി ശ്ശീഘ്രം യജ്ഞവാടമതംദ്രിതഃ ॥ 23 ॥
സദസ്യാനുമതേ രാജാ പവിത്രകൃതലക്ഷണമ് ।
പശും രക്താംബരം കൃത്വാ യൂപേ തം സമബംധയത് ॥ 24 ॥
സബദ്ധോ വാഗ്ഭിരഗ്യ്രാഭിരഭിതുഷ്ടാവ വൈ സുരൌ ।
ഇംദ്രമിംദ്രാനുജം ചൈവ യഥാവന്മുനിപുത്രകഃ ॥ 25 ॥
തതഃ പ്രീത സ്സഹസ്രാക്ഷോ രഹസ്യസ്തുതിതര്പിതഃ ।
ദീര്ഘമായുസ്തദാ പ്രാദാച്ഛുനശ്ശേഫായ രാഘവ ॥ 26 ॥
സ ച രാജാ നരശ്രേഷ്ഠ യജ്ഞസ്യ ച സമാപ്തവാന് ।
ഫലം ബഹുഗുണം രാമ സഹസ്രാക്ഷപ്രസാദജമ് ॥ 27 ॥
വിശ്വാമിത്രോ ഽപി ധര്മാത്മാ ഭൂയസ്തേപേ മഹാതപാഃ ।
പുഷ്കരേഷു നരശ്രേഷ്ഠ ദശവര്ഷശതാനി ച ॥ 28 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ദ്വിഷഷ്ടിതമസ്സര്ഗഃ ॥
