ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଦ୍ଵିଷଷ୍ଟିତମସ୍ସର୍ଗଃ ।
ଶୁନଶ୍ଶେଫଂ ନରଶ୍ରେଷ୍ଠ ଗୃହୀତ୍ଵା ତୁ ମହାୟଶାଃ ।
ଵ୍ୟଶ୍ରାମ୍ୟତ୍ ପୁଷ୍କରେ ରାଜା ମଧ୍ୟାହ୍ନେ ରଘୁନଂଦନ ॥ 1 ॥
ତସ୍ୟ ଵିଶ୍ରମମାଣସ୍ୟ ଶୁନଶ୍ଶେଫୋ ମହାୟଶାଃ ।
ପୁଷ୍କରକ୍ଷେତ୍ରମାଗମ୍ୟ ଵିଶ୍ଵାମିତ୍ରଂ ଦଦର୍ଶ ହ ॥ 2 ॥
ତପ୍ୟଂତମୃଷିଭିସ୍ସାର୍ଧଂ ମାତୁଲଂ ପରମାତୁରଃ ।
ଵିଵର୍ଣଵଦନୋ ଦୀନସ୍ତୃଷ୍ଣୟା ଚ ଶ୍ରମେଣ ଚ ॥ 3 ॥
ପପାତାଂକେ ମୁନେରାଶୁ ଵାକ୍ୟଂ ଚେଦମୁଵାଚ ହ ।
ନ ମେଽସ୍ତି ମାତା ନ ପିତା ଜ୍ଞାତୟୋ ବାଂଧଵାଃ କୁତଃ ॥ 4 ॥
ତ୍ରାତୁମର୍ହସି ମାଂ ସୌମ୍ୟ ଧର୍ମେଣ ମୁନିପୁଂଗଵ ।
ତ୍ରାତା ତ୍ଵଂ ହି ମୁନିଶ୍ରେଷ୍ଠ ସର୍ଵେଷାଂ ତ୍ଵଂ ହି ଭାଵନଃ ॥ 5 ॥
ରାଜା ଚ କୃତକାର୍ୟସ୍ସ୍ୟାଦହଂ ଦୀର୍ଘାୟୁରଵ୍ୟୟଃ ।
ସ୍ଵର୍ଗଲୋକମୁପାଶ୍ନୀୟାଂ ତପସ୍ତପ୍ତ୍ଵାହ୍ୟନୁତ୍ତମମ୍ ॥ 6 ॥
ତ୍ଵଂ ମେ ନାଥୋ ହ୍ୟନାଥସ୍ୟ ଭଵ ଭଵ୍ୟେନ ଚେତସା ।
ପିତେଵ ପୁତ୍ରଂ ଧର୍ମାତ୍ମଂ ସ୍ତ୍ରାତୁମର୍ହସି କିଲ୍ବିଷାତ୍ ॥ 7 ॥
ତସ୍ୟ ତଦ୍ଵଚନଂ ଶ୍ରୁତ୍ଵା ଵିଶ୍ଵାମିତ୍ରୋ ମହାତପାଃ ।
ସାଂତ୍ଵୟିତ୍ଵା ବହୁଵିଧଂ ପୁତ୍ରାନିଦମୁଵାଚ ହ ॥ 8 ॥
ୟତ୍କୃତେ ପିତରଃ ପୁତ୍ରାନ୍ ଜନୟଂତି ଶୁଭାର୍ଥିନଃ ।
ପରଲୋକହିତାର୍ଥାୟ ତସ୍ୟ କାଲୋଽୟମାଗତଃ ॥ 9 ॥
ଅୟଂ ମୁନିସୁତୋ ବାଲୋ ମତ୍ତଶ୍ଶରଣମିଚ୍ଛତି ।
ଅସ୍ୟ ଜୀଵିତମାତ୍ରେଣ ପ୍ରିୟଂ କୁରୁତ ପୁତ୍ରକାଃ ॥ 10 ॥
ସର୍ଵେ ସୁକୃତକର୍ମାଣସ୍ସର୍ଵେ ଧର୍ମପରାୟଣାଃ ।
ପଶୁଭୂତା ନରେଂଦ୍ରସ୍ୟ ତୃପ୍ତିମଗ୍ନେଃ ପ୍ରୟଚ୍ଛତ ॥ 11 ॥
ନାଥଵାଂଶ୍ଚ ଶୁନଶ୍ଶେଫୋ ୟଜ୍ଞଶ୍ଚାଵିଘ୍ନିତୋ ଭଵେତ୍ ।
ଦେଵତାସ୍ତର୍ପିତାଶ୍ଚସ୍ୟୁର୍ମମ ଚାପି କୃତଂ ଵଚଃ ॥ 12 ॥
ମୁନେସ୍ତୁ ଵଚନଂ ଶ୍ରୁତ୍ଵା ମଧୁଚ୍ଛଂଦାଦୟ ସ୍ସୁତାଃ ।
ସାଭିମାନଂ ନରଶ୍ରେଷ୍ଠ ସଲୀଲମିଦମବ୍ରୁଵନ୍ ॥ 13 ॥
କଥମାତ୍ମସୁତାନ୍ ହିତ୍ଵା ତ୍ରାୟସେଽନ୍ୟସୁତଂ ଵିଭୋ ।
ଅକାର୍ୟମିଵ ପଶ୍ୟାମ ଶ୍ଶ୍ଵମାଂସ ଇଵ ଭୋଜନେ ॥ 14 ॥
ତେଷାଂ ତଦ୍ଵଚନଂ ଶ୍ରୁତ୍ଵା ପୁତ୍ରାଣାଂ ମୁନିପୁଂଗଵଃ ।
କ୍ରୋଧସଂରକ୍ତନୟନୋ ଵ୍ୟାହର୍ତୁମୁପଚକ୍ରମେ ॥ 15 ॥
ନିସ୍ସାଧ୍ଵସମିଦଂ ପ୍ରୋକ୍ତଂ ଧର୍ମାଦପି ଵିଗର୍ହିତମ୍ ।
ଅତିକ୍ରମ୍ୟ ତୁ ମଦ୍ଵାକ୍ୟଂ ଦାରୁଣଂ ରୋମହର୍ଷଣମ୍ ॥ 16 ॥
ଶ୍ଵମାଂସଭୋଜିନସ୍ସର୍ଵେ ଵାସିଷ୍ଠା ଇଵ ଜାତିଷୁ ।
ପୂର୍ଣଂ ଵର୍ଷସହସ୍ରଂ ତୁ ପୃଥିଵ୍ୟାମନୁଵତ୍ସ୍ୟଥ ॥ 17 ॥
କୃତ୍ଵା ଶାପସମାୟୁକ୍ତାନ୍ ପୁତ୍ରାନ୍ ମୁନିଵରସ୍ତଥା ।
ଶୁନଶ୍ଶେଫମୁଵାଚାର୍ତଂ କୃତ୍ଵା ରକ୍ଷାଂ ନିରାମୟମ୍ ॥ 18 ॥
ପଵିତ୍ରପାଶୈରାସକ୍ତୋ ରକ୍ତମାଲ୍ୟାନୁଲେପନଃ ।
ଵୈଷ୍ଣଵଂ ୟୂପମାସାଦ୍ୟ ଵାଗ୍ଭିରଗ୍ନିମୁଦାହର ॥ 19 ॥
ଇମେ ତୁ ଗାଥେ ଦ୍ଵେ ଦିଵ୍ୟେ ଗାୟେଥା ମୁନିପୁତ୍ରକ ।
ଅଂବରୀଷସ୍ୟ ୟଜ୍ଞେଽସ୍ମିଂସ୍ତତ ସ୍ସିଦ୍ଧିମଵାପ୍ସ୍ୟସି ॥ 20 ॥
ଶୁନଶ୍ଶେଫୋ ଗୃହୀତ୍ଵା ତେ ଦ୍ଵେ ଗାଥେ ସୁସମାହିତଃ ।
ତ୍ଵରୟା ରାଜସିଂହଂ ତମଂବରୀଷମୁଵାଚ ହ ॥ 21 ॥
ରାଜସିଂହ ମହାସତ୍ତ୍ଵ ଶୀଘ୍ରଂ ଗଚ୍ଛାଵହେ ସଦଃ ।
ନିର୍ଵର୍ତୟସ୍ଵ ରାଜେଂଦ୍ର ଦୀକ୍ଷାଂ ଚ ସମୁପାଵିଶ ॥ 22 ॥
ତଦ୍ଵାକ୍ୟମୃଷିପୁତ୍ରସ୍ୟ ଶ୍ରୁତ୍ଵା ହର୍ଷସମୁତ୍ସୁକଃ ।
ଜଗାମ ନୃପତି ଶ୍ଶୀଘ୍ରଂ ୟଜ୍ଞଵାଟମତଂଦ୍ରିତଃ ॥ 23 ॥
ସଦସ୍ୟାନୁମତେ ରାଜା ପଵିତ୍ରକୃତଲକ୍ଷଣମ୍ ।
ପଶୁଂ ରକ୍ତାଂବରଂ କୃତ୍ଵା ୟୂପେ ତଂ ସମବଂଧୟତ୍ ॥ 24 ॥
ସବଦ୍ଧୋ ଵାଗ୍ଭିରଗ୍ୟ୍ରାଭିରଭିତୁଷ୍ଟାଵ ଵୈ ସୁରୌ ।
ଇଂଦ୍ରମିଂଦ୍ରାନୁଜଂ ଚୈଵ ୟଥାଵନ୍ମୁନିପୁତ୍ରକଃ ॥ 25 ॥
ତତଃ ପ୍ରୀତ ସ୍ସହସ୍ରାକ୍ଷୋ ରହସ୍ୟସ୍ତୁତିତର୍ପିତଃ ।
ଦୀର୍ଘମାୟୁସ୍ତଦା ପ୍ରାଦାଚ୍ଛୁନଶ୍ଶେଫାୟ ରାଘଵ ॥ 26 ॥
ସ ଚ ରାଜା ନରଶ୍ରେଷ୍ଠ ୟଜ୍ଞସ୍ୟ ଚ ସମାପ୍ତଵାନ୍ ।
ଫଲଂ ବହୁଗୁଣଂ ରାମ ସହସ୍ରାକ୍ଷପ୍ରସାଦଜମ୍ ॥ 27 ॥
ଵିଶ୍ଵାମିତ୍ରୋ ଽପି ଧର୍ମାତ୍ମା ଭୂୟସ୍ତେପେ ମହାତପାଃ ।
ପୁଷ୍କରେଷୁ ନରଶ୍ରେଷ୍ଠ ଦଶଵର୍ଷଶତାନି ଚ ॥ 28 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଦ୍ଵିଷଷ୍ଟିତମସ୍ସର୍ଗଃ ॥
