શ્રીમદ્વાલ્મીકીય રામાયણે બાલકાંડમ્ ।
અથ દ્વિષષ્ટિતમસ્સર્ગઃ ।
શુનશ્શેફં નરશ્રેષ્ઠ ગૃહીત્વા તુ મહાયશાઃ ।
વ્યશ્રામ્યત્ પુષ્કરે રાજા મધ્યાહ્ને રઘુનંદન ॥ 1 ॥
તસ્ય વિશ્રમમાણસ્ય શુનશ્શેફો મહાયશાઃ ।
પુષ્કરક્ષેત્રમાગમ્ય વિશ્વામિત્રં દદર્શ હ ॥ 2 ॥
તપ્યંતમૃષિભિસ્સાર્ધં માતુલં પરમાતુરઃ ।
વિવર્ણવદનો દીનસ્તૃષ્ણયા ચ શ્રમેણ ચ ॥ 3 ॥
પપાતાંકે મુનેરાશુ વાક્યં ચેદમુવાચ હ ।
ન મેઽસ્તિ માતા ન પિતા જ્ઞાતયો બાંધવાઃ કુતઃ ॥ 4 ॥
ત્રાતુમર્હસિ માં સૌમ્ય ધર્મેણ મુનિપુંગવ ।
ત્રાતા ત્વં હિ મુનિશ્રેષ્ઠ સર્વેષાં ત્વં હિ ભાવનઃ ॥ 5 ॥
રાજા ચ કૃતકાર્યસ્સ્યાદહં દીર્ઘાયુરવ્યયઃ ।
સ્વર્ગલોકમુપાશ્નીયાં તપસ્તપ્ત્વાહ્યનુત્તમમ્ ॥ 6 ॥
ત્વં મે નાથો હ્યનાથસ્ય ભવ ભવ્યેન ચેતસા ।
પિતેવ પુત્રં ધર્માત્મં સ્ત્રાતુમર્હસિ કિલ્બિષાત્ ॥ 7 ॥
તસ્ય તદ્વચનં શ્રુત્વા વિશ્વામિત્રો મહાતપાઃ ।
સાંત્વયિત્વા બહુવિધં પુત્રાનિદમુવાચ હ ॥ 8 ॥
યત્કૃતે પિતરઃ પુત્રાન્ જનયંતિ શુભાર્થિનઃ ।
પરલોકહિતાર્થાય તસ્ય કાલોઽયમાગતઃ ॥ 9 ॥
અયં મુનિસુતો બાલો મત્તશ્શરણમિચ્છતિ ।
અસ્ય જીવિતમાત્રેણ પ્રિયં કુરુત પુત્રકાઃ ॥ 10 ॥
સર્વે સુકૃતકર્માણસ્સર્વે ધર્મપરાયણાઃ ।
પશુભૂતા નરેંદ્રસ્ય તૃપ્તિમગ્નેઃ પ્રયચ્છત ॥ 11 ॥
નાથવાંશ્ચ શુનશ્શેફો યજ્ઞશ્ચાવિઘ્નિતો ભવેત્ ।
દેવતાસ્તર્પિતાશ્ચસ્યુર્મમ ચાપિ કૃતં વચઃ ॥ 12 ॥
મુનેસ્તુ વચનં શ્રુત્વા મધુચ્છંદાદય સ્સુતાઃ ।
સાભિમાનં નરશ્રેષ્ઠ સલીલમિદમબ્રુવન્ ॥ 13 ॥
કથમાત્મસુતાન્ હિત્વા ત્રાયસેઽન્યસુતં વિભો ।
અકાર્યમિવ પશ્યામ શ્શ્વમાંસ ઇવ ભોજને ॥ 14 ॥
તેષાં તદ્વચનં શ્રુત્વા પુત્રાણાં મુનિપુંગવઃ ।
ક્રોધસંરક્તનયનો વ્યાહર્તુમુપચક્રમે ॥ 15 ॥
નિસ્સાધ્વસમિદં પ્રોક્તં ધર્માદપિ વિગર્હિતમ્ ।
અતિક્રમ્ય તુ મદ્વાક્યં દારુણં રોમહર્ષણમ્ ॥ 16 ॥
શ્વમાંસભોજિનસ્સર્વે વાસિષ્ઠા ઇવ જાતિષુ ।
પૂર્ણં વર્ષસહસ્રં તુ પૃથિવ્યામનુવત્સ્યથ ॥ 17 ॥
કૃત્વા શાપસમાયુક્તાન્ પુત્રાન્ મુનિવરસ્તથા ।
શુનશ્શેફમુવાચાર્તં કૃત્વા રક્ષાં નિરામયમ્ ॥ 18 ॥
પવિત્રપાશૈરાસક્તો રક્તમાલ્યાનુલેપનઃ ।
વૈષ્ણવં યૂપમાસાદ્ય વાગ્ભિરગ્નિમુદાહર ॥ 19 ॥
ઇમે તુ ગાથે દ્વે દિવ્યે ગાયેથા મુનિપુત્રક ।
અંબરીષસ્ય યજ્ઞેઽસ્મિંસ્તત સ્સિદ્ધિમવાપ્સ્યસિ ॥ 20 ॥
શુનશ્શેફો ગૃહીત્વા તે દ્વે ગાથે સુસમાહિતઃ ।
ત્વરયા રાજસિંહં તમંબરીષમુવાચ હ ॥ 21 ॥
રાજસિંહ મહાસત્ત્વ શીઘ્રં ગચ્છાવહે સદઃ ।
નિર્વર્તયસ્વ રાજેંદ્ર દીક્ષાં ચ સમુપાવિશ ॥ 22 ॥
તદ્વાક્યમૃષિપુત્રસ્ય શ્રુત્વા હર્ષસમુત્સુકઃ ।
જગામ નૃપતિ શ્શીઘ્રં યજ્ઞવાટમતંદ્રિતઃ ॥ 23 ॥
સદસ્યાનુમતે રાજા પવિત્રકૃતલક્ષણમ્ ।
પશું રક્તાંબરં કૃત્વા યૂપે તં સમબંધયત્ ॥ 24 ॥
સબદ્ધો વાગ્ભિરગ્ય્રાભિરભિતુષ્ટાવ વૈ સુરૌ ।
ઇંદ્રમિંદ્રાનુજં ચૈવ યથાવન્મુનિપુત્રકઃ ॥ 25 ॥
તતઃ પ્રીત સ્સહસ્રાક્ષો રહસ્યસ્તુતિતર્પિતઃ ।
દીર્ઘમાયુસ્તદા પ્રાદાચ્છુનશ્શેફાય રાઘવ ॥ 26 ॥
સ ચ રાજા નરશ્રેષ્ઠ યજ્ઞસ્ય ચ સમાપ્તવાન્ ।
ફલં બહુગુણં રામ સહસ્રાક્ષપ્રસાદજમ્ ॥ 27 ॥
વિશ્વામિત્રો ઽપિ ધર્માત્મા ભૂયસ્તેપે મહાતપાઃ ।
પુષ્કરેષુ નરશ્રેષ્ઠ દશવર્ષશતાનિ ચ ॥ 28 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે દ્વિષષ્ટિતમસ્સર્ગઃ ॥
