śrīmadvālmīkīya rāmāyaṇē bālakāṇḍam ।
atha dviṣaṣṭitamassargaḥ ।
śunaśśēphaṃ naraśrēṣṭha gṛhītvā tu mahāyaśāḥ ।
vyaśrāmyat puṣkarē rājā madhyāhnē raghunandana ॥ 1 ॥
tasya viśramamāṇasya śunaśśēphō mahāyaśāḥ ।
puṣkarakṣētramāgamya viśvāmitraṃ dadarśa ha ॥ 2 ॥
tapyantamṛṣibhissārdhaṃ mātulaṃ paramāturaḥ ।
vivarṇavadanō dīnastṛṣṇayā cha śramēṇa cha ॥ 3 ॥
papātāṅkē munērāśu vākyaṃ chēdamuvācha ha ।
na mē'sti mātā na pitā jñātayō bāndhavāḥ kutaḥ ॥ 4 ॥
trātumarhasi māṃ saumya dharmēṇa munipuṅgava ।
trātā tvaṃ hi muniśrēṣṭha sarvēṣāṃ tvaṃ hi bhāvanaḥ ॥ 5 ॥
rājā cha kṛtakāryassyādahaṃ dīrghāyuravyayaḥ ।
svargalōkamupāśnīyāṃ tapastaptvāhyanuttamam ॥ 6 ॥
tvaṃ mē nāthō hyanāthasya bhava bhavyēna chētasā ।
pitēva putraṃ dharmātmaṃ strātumarhasi kilbiṣāt ॥ 7 ॥
tasya tadvachanaṃ śrutvā viśvāmitrō mahātapāḥ ।
sāntvayitvā bahuvidhaṃ putrānidamuvācha ha ॥ 8 ॥
yatkṛtē pitaraḥ putrān janayanti śubhārthinaḥ ।
paralōkahitārthāya tasya kālō'yamāgataḥ ॥ 9 ॥
ayaṃ munisutō bālō mattaśśaraṇamichChati ।
asya jīvitamātrēṇa priyaṃ kuruta putrakāḥ ॥ 10 ॥
sarvē sukṛtakarmāṇassarvē dharmaparāyaṇāḥ ।
paśubhūtā narēndrasya tṛptimagnēḥ prayachChata ॥ 11 ॥
nāthavāṃścha śunaśśēphō yajñaśchāvighnitō bhavēt ।
dēvatāstarpitāśchasyurmama chāpi kṛtaṃ vachaḥ ॥ 12 ॥
munēstu vachanaṃ śrutvā madhuchChandādaya ssutāḥ ।
sābhimānaṃ naraśrēṣṭha salīlamidamabruvan ॥ 13 ॥
kathamātmasutān hitvā trāyasē'nyasutaṃ vibhō ।
akāryamiva paśyāma śśvamāṃsa iva bhōjanē ॥ 14 ॥
tēṣāṃ tadvachanaṃ śrutvā putrāṇāṃ munipuṅgavaḥ ।
krōdhasaṃraktanayanō vyāhartumupachakramē ॥ 15 ॥
nissādhvasamidaṃ prōktaṃ dharmādapi vigarhitam ।
atikramya tu madvākyaṃ dāruṇaṃ rōmaharṣaṇam ॥ 16 ॥
śvamāṃsabhōjinassarvē vāsiṣṭhā iva jātiṣu ।
pūrṇaṃ varṣasahasraṃ tu pṛthivyāmanuvatsyatha ॥ 17 ॥
kṛtvā śāpasamāyuktān putrān munivarastathā ।
śunaśśēphamuvāchārtaṃ kṛtvā rakṣāṃ nirāmayam ॥ 18 ॥
pavitrapāśairāsaktō raktamālyānulēpanaḥ ।
vaiṣṇavaṃ yūpamāsādya vāgbhiragnimudāhara ॥ 19 ॥
imē tu gāthē dvē divyē gāyēthā muniputraka ।
ambarīṣasya yajñē'smiṃstata ssiddhimavāpsyasi ॥ 20 ॥
śunaśśēphō gṛhītvā tē dvē gāthē susamāhitaḥ ।
tvarayā rājasiṃhaṃ tamambarīṣamuvācha ha ॥ 21 ॥
rājasiṃha mahāsattva śīghraṃ gachChāvahē sadaḥ ।
nirvartayasva rājēndra dīkṣāṃ cha samupāviśa ॥ 22 ॥
tadvākyamṛṣiputrasya śrutvā harṣasamutsukaḥ ।
jagāma nṛpati śśīghraṃ yajñavāṭamatandritaḥ ॥ 23 ॥
sadasyānumatē rājā pavitrakṛtalakṣaṇam ।
paśuṃ raktāmbaraṃ kṛtvā yūpē taṃ samabandhayat ॥ 24 ॥
sabaddhō vāgbhiragyrābhirabhituṣṭāva vai surau ।
indramindrānujaṃ chaiva yathāvanmuniputrakaḥ ॥ 25 ॥
tataḥ prīta ssahasrākṣō rahasyastutitarpitaḥ ।
dīrghamāyustadā prādāchChunaśśēphāya rāghava ॥ 26 ॥
sa cha rājā naraśrēṣṭha yajñasya cha samāptavān ।
phalaṃ bahuguṇaṃ rāma sahasrākṣaprasādajam ॥ 27 ॥
viśvāmitrō 'pi dharmātmā bhūyastēpē mahātapāḥ ।
puṣkarēṣu naraśrēṣṭha daśavarṣaśatāni cha ॥ 28 ॥
ityārṣē śrīmadrāmāyaṇē vālmīkīya ādikāvyē bālakāṇḍē dviṣaṣṭitamassargaḥ ॥
