ශ්රීමද්වාල්මීකීය රාමායණේ බාලකාංඩම් ।
අථ සප්තෂෂ්ටිතමස්සර්ගඃ ।
. ජනකස්ය වචශ්ශ්රුත්වා විශ්වාමිත්රෝ මහාමුනිඃ ।
ධනුර්දර්ශය රාමාය ඉති හෝවාච පාර්ථිවම් ॥ 1 ॥
තතස්ස රාජා ජනකඃ සාමංතාන්ව්යාදිදේශ හ ।
ධනුරානීයතාං දිව්යං ගංධමාල්යවිභූෂිතම් ॥ 2 ॥
ජනකේන සමාදිෂ්ටාඃ සචිවා ප්රාවිශන් පුරීම් ।
තද්ධනුඃ පුරතඃ කෘත්වා නිර්ජග්මුඃ පාර්ථිවාජ්ඤයා ॥ 3 ॥
නෘණාං ශතානි පංචාශද්ව්යායතානාං මහාත්මනාම් ।
මංජූෂාමෂ්ටචක්රාං තාං සමූහුස්තේ කථංචන ॥ 4 ॥
තාමාදාය තු මංජූෂාමායසීං යත්ර තද්ධනුඃ ।
සුරෝපමං තේ ජනකමූචුර්නෘපතිමංත්රිණඃ ॥ 5 ॥
ඉදං ධනුර්වරං රාජන් පූජිතං සර්වරාජභිඃ ।
මිථිලාධිප රාජේංද්ර දර්ශනීයං යදිච්ඡසි ॥ 6 ॥
තේෂාං නෘපෝ වචඃ ශ්රුත්වා කෘතාංජලිරභාෂත ।
විශ්වාමිත්රං මහාත්මානං තෞ චෝභෞ රාමලක්ෂ්මණෞ ॥ 7 ॥
ඉදං ධනුර්වරං බ්රහ්මන් ජනකෛරභිපූජිතම් ।
රාජභිශ්ච මහාවීර්යෛඃ අශක්තෛඃ පූරිතුං පුරා ॥ 8 ॥
නෛතත්සුරගණාස්සර්වේ නාසුරා න ච රාක්ෂසාඃ ।
ගංධර්වයක්ෂප්රවරාඃ සකින්නරමහෝරගාඃ ॥ 9 ॥
ක්ව ගතිර්මානුෂාණාං ච ධනුෂෝऽස්ය ප්රපූරණේ ।
ආරෝපණේ සමායෝගේ වේපනේ තෝලනේऽපි වා ॥ 10 ॥
තදේතද්ධනුෂාං ශ්රේෂ්ඨමානීතං මුනිපුංගව ।
දර්ශයෛතන්මහාභාග අනයෝඃ රාජපුත්රයෝඃ ॥ 11 ॥
විශ්වාමිත්රස්තු ධර්මාත්මා ශ්රුත්වා ජනකභාෂිතම් ।
වත්ස රාම ධනුඃ පශ්ය ඉති රාඝවමබ්රවීත් ॥ 12 ॥
බ්රහ්මර්ෂේර්වචනාද්රාමෝ යත්ර තිෂ්ඨති තද්ධනුඃ ।
මංජූෂාං තාමපාවෘත්ය දෘෂ්ට්වා ධනුරථාබ්රවීත් ॥ 13 ॥
ඉදං ධනුර්වරං බ්රහ්මන් සංස්පෘශාමීහ පාණිනා ।
යත්නවාංශ්ච භවිෂ්යාමි තෝලනේ පූරණේऽපි වා ॥ 14 ॥
බාඪමිත්යේව තං රාජා මුනිශ්ච සමභාෂත ।
ලීලයා ස ධනුර්මධ්යේ ජග්රාහ වචනාන්මුනේඃ ॥ 15 ॥
පශ්යතාං නෘපසහස්රාණාං බහූනාං රඝුනංදනඃ ।
ආරෝපයත්ස ධර්මාත්මා සලීලමිව තද්ධනුඃ ॥ 16 ॥
ආරෝපයිත්වා ධර්මාත්මා පූරයාමාස තද්ධනුඃ ।
තද්බභංජ ධනුර්මධ්යේ නරශ්රේෂ්ඨෝ මහායශාඃ ॥ 17 ॥
තස්ය ශබ්දෝ මහානාසීත් නිර්ඝාතසමනිස්වනඃ ।
භූමිකංපශ්ච සුමහාන් පර්වතස්යේව දීර්යතඃ ॥ 18 ॥
නිපේතුශ්ච නරා ස්සර්වේ තේන ශබ්දේන මෝහිතාඃ ।
වර්ජයිත්වා මුනිවරං රාජානං තෞ ච රාඝවෞ ॥ 19 ॥
ප්රත්යාශ්වස්තේ ජනේ තස්මින්රාජා විගතසාධ්වසඃ ।
උවාච ප්රාංජලිර්වාක්යං වාක්යජ්ඤෝ මුනිපුංගවම් ॥ 20 ॥
භගවන් දෘෂ්ටවීර්යෝ මේ රාමෝ දශරථාත්මජඃ ।
අත්යද්භුතමචිංත්යං ච න තර්කිතමිදං මයා ॥ 21 ॥
ජනකානාං කුලේ කීර්තිමාහරිෂ්යති මේ සුතා ।
සීතා භර්තාරමාසාද්ය රාමං දශරථාත්මජම් ॥ 22 ॥
මම සත්යා ප්රතිජ්ඤා ච වීර්යශුල්කේති කෞශික ।
සීතා ප්රාණෛර්බහුමතා දේයා රාමාය මේ සුතා ॥ 23 ॥
භවතෝऽනුමතේ බ්රහ්මන් ශීඝ්රං ගච්ඡංතු මංත්රිණඃ ।
මම කෞශික භද්රං තේ අයෝධ්යාං ත්වරිතා රථෛඃ ॥ 24 ॥
රාජානං ප්රශ්රිතෛර්වාක්යෛරානයංතු පුරං මම ।
ප්රදානං වීර්යශුල්කායාඃ කථයංතු ච සර්වශඃ ॥ 25 ॥
මුනිගුප්තෞ ච කාකුත්ස්ථෞ කථයංතු නෘපාය වෛ ।
ප්රීයමාණං තු රාජානමානයංතු සුශීඝ්රගාඃ ॥ 26 ॥
කෞශිකශ්ච තථේත්යාහ රාජා චාභාෂ්ය මංත්රිණඃ ॥ 27 ॥
අයෝධ්යාං ප්රේෂයාමාස ධර්මාත්මා කෘතශාසනාන් ।
යථාවෘත්තං සමාඛ්යාතුමානේතුං ච නෘපං තදා ॥ 28 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ සප්තෂෂ්ටිතමස්සර්ගඃ ॥
