శ్రీమద్వాల్మీకీయ రామాయణే బాలకాండమ్ ।
అథ సప్తషష్టితమస్సర్గః ।
. జనకస్య వచశ్శ్రుత్వా విశ్వామిత్రో మహామునిః ।
ధనుర్దర్శయ రామాయ ఇతి హోవాచ పార్థివమ్ ॥ 1 ॥
తతస్స రాజా జనకః సామంతాన్వ్యాదిదేశ హ ।
ధనురానీయతాం దివ్యం గంధమాల్యవిభూషితమ్ ॥ 2 ॥
జనకేన సమాదిష్టాః సచివా ప్రావిశన్ పురీమ్ ।
తద్ధనుః పురతః కృత్వా నిర్జగ్ముః పార్థివాజ్ఞయా ॥ 3 ॥
నృణాం శతాని పంచాశద్వ్యాయతానాం మహాత్మనామ్ ।
మంజూషామష్టచక్రాం తాం సమూహుస్తే కథంచన ॥ 4 ॥
తామాదాయ తు మంజూషామాయసీం యత్ర తద్ధనుః ।
సురోపమం తే జనకమూచుర్నృపతిమంత్రిణః ॥ 5 ॥
ఇదం ధనుర్వరం రాజన్ పూజితం సర్వరాజభిః ।
మిథిలాధిప రాజేంద్ర దర్శనీయం యదిచ్ఛసి ॥ 6 ॥
తేషాం నృపో వచః శ్రుత్వా కృతాంజలిరభాషత ।
విశ్వామిత్రం మహాత్మానం తౌ చోభౌ రామలక్ష్మణౌ ॥ 7 ॥
ఇదం ధనుర్వరం బ్రహ్మన్ జనకైరభిపూజితమ్ ।
రాజభిశ్చ మహావీర్యైః అశక్తైః పూరితుం పురా ॥ 8 ॥
నైతత్సురగణాస్సర్వే నాసురా న చ రాక్షసాః ।
గంధర్వయక్షప్రవరాః సకిన్నరమహోరగాః ॥ 9 ॥
క్వ గతిర్మానుషాణాం చ ధనుషోఽస్య ప్రపూరణే ।
ఆరోపణే సమాయోగే వేపనే తోలనేఽపి వా ॥ 10 ॥
తదేతద్ధనుషాం శ్రేష్ఠమానీతం మునిపుంగవ ।
దర్శయైతన్మహాభాగ అనయోః రాజపుత్రయోః ॥ 11 ॥
విశ్వామిత్రస్తు ధర్మాత్మా శ్రుత్వా జనకభాషితమ్ ।
వత్స రామ ధనుః పశ్య ఇతి రాఘవమబ్రవీత్ ॥ 12 ॥
బ్రహ్మర్షేర్వచనాద్రామో యత్ర తిష్ఠతి తద్ధనుః ।
మంజూషాం తామపావృత్య దృష్ట్వా ధనురథాబ్రవీత్ ॥ 13 ॥
ఇదం ధనుర్వరం బ్రహ్మన్ సంస్పృశామీహ పాణినా ।
యత్నవాంశ్చ భవిష్యామి తోలనే పూరణేఽపి వా ॥ 14 ॥
బాఢమిత్యేవ తం రాజా మునిశ్చ సమభాషత ।
లీలయా స ధనుర్మధ్యే జగ్రాహ వచనాన్మునేః ॥ 15 ॥
పశ్యతాం నృపసహస్రాణాం బహూనాం రఘునందనః ।
ఆరోపయత్స ధర్మాత్మా సలీలమివ తద్ధనుః ॥ 16 ॥
ఆరోపయిత్వా ధర్మాత్మా పూరయామాస తద్ధనుః ।
తద్బభంజ ధనుర్మధ్యే నరశ్రేష్ఠో మహాయశాః ॥ 17 ॥
తస్య శబ్దో మహానాసీత్ నిర్ఘాతసమనిస్వనః ।
భూమికంపశ్చ సుమహాన్ పర్వతస్యేవ దీర్యతః ॥ 18 ॥
నిపేతుశ్చ నరా స్సర్వే తేన శబ్దేన మోహితాః ।
వర్జయిత్వా మునివరం రాజానం తౌ చ రాఘవౌ ॥ 19 ॥
ప్రత్యాశ్వస్తే జనే తస్మిన్రాజా విగతసాధ్వసః ।
ఉవాచ ప్రాంజలిర్వాక్యం వాక్యజ్ఞో మునిపుంగవమ్ ॥ 20 ॥
భగవన్ దృష్టవీర్యో మే రామో దశరథాత్మజః ।
అత్యద్భుతమచింత్యం చ న తర్కితమిదం మయా ॥ 21 ॥
జనకానాం కులే కీర్తిమాహరిష్యతి మే సుతా ।
సీతా భర్తారమాసాద్య రామం దశరథాత్మజమ్ ॥ 22 ॥
మమ సత్యా ప్రతిజ్ఞా చ వీర్యశుల్కేతి కౌశిక ।
సీతా ప్రాణైర్బహుమతా దేయా రామాయ మే సుతా ॥ 23 ॥
భవతోఽనుమతే బ్రహ్మన్ శీఘ్రం గచ్ఛంతు మంత్రిణః ।
మమ కౌశిక భద్రం తే అయోధ్యాం త్వరితా రథైః ॥ 24 ॥
రాజానం ప్రశ్రితైర్వాక్యైరానయంతు పురం మమ ।
ప్రదానం వీర్యశుల్కాయాః కథయంతు చ సర్వశః ॥ 25 ॥
మునిగుప్తౌ చ కాకుత్స్థౌ కథయంతు నృపాయ వై ।
ప్రీయమాణం తు రాజానమానయంతు సుశీఘ్రగాః ॥ 26 ॥
కౌశికశ్చ తథేత్యాహ రాజా చాభాష్య మంత్రిణః ॥ 27 ॥
అయోధ్యాం ప్రేషయామాస ధర్మాత్మా కృతశాసనాన్ ।
యథావృత్తం సమాఖ్యాతుమానేతుం చ నృపం తదా ॥ 28 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే సప్తషష్టితమస్సర్గః ॥
