ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ସପ୍ତଷଷ୍ଟିତମସ୍ସର୍ଗଃ ।
. ଜନକସ୍ୟ ଵଚଶ୍ଶ୍ରୁତ୍ଵା ଵିଶ୍ଵାମିତ୍ରୋ ମହାମୁନିଃ ।
ଧନୁର୍ଦର୍ଶୟ ରାମାୟ ଇତି ହୋଵାଚ ପାର୍ଥିଵମ୍ ॥ 1 ॥
ତତସ୍ସ ରାଜା ଜନକଃ ସାମଂତାନ୍ଵ୍ୟାଦିଦେଶ ହ ।
ଧନୁରାନୀୟତାଂ ଦିଵ୍ୟଂ ଗଂଧମାଲ୍ୟଵିଭୂଷିତମ୍ ॥ 2 ॥
ଜନକେନ ସମାଦିଷ୍ଟାଃ ସଚିଵା ପ୍ରାଵିଶନ୍ ପୁରୀମ୍ ।
ତଦ୍ଧନୁଃ ପୁରତଃ କୃତ୍ଵା ନିର୍ଜଗ୍ମୁଃ ପାର୍ଥିଵାଜ୍ଞୟା ॥ 3 ॥
ନୃଣାଂ ଶତାନି ପଂଚାଶଦ୍ଵ୍ୟାୟତାନାଂ ମହାତ୍ମନାମ୍ ।
ମଂଜୂଷାମଷ୍ଟଚକ୍ରାଂ ତାଂ ସମୂହୁସ୍ତେ କଥଂଚନ ॥ 4 ॥
ତାମାଦାୟ ତୁ ମଂଜୂଷାମାୟସୀଂ ୟତ୍ର ତଦ୍ଧନୁଃ ।
ସୁରୋପମଂ ତେ ଜନକମୂଚୁର୍ନୃପତିମଂତ୍ରିଣଃ ॥ 5 ॥
ଇଦଂ ଧନୁର୍ଵରଂ ରାଜନ୍ ପୂଜିତଂ ସର୍ଵରାଜଭିଃ ।
ମିଥିଲାଧିପ ରାଜେଂଦ୍ର ଦର୍ଶନୀୟଂ ୟଦିଚ୍ଛସି ॥ 6 ॥
ତେଷାଂ ନୃପୋ ଵଚଃ ଶ୍ରୁତ୍ଵା କୃତାଂଜଲିରଭାଷତ ।
ଵିଶ୍ଵାମିତ୍ରଂ ମହାତ୍ମାନଂ ତୌ ଚୋଭୌ ରାମଲକ୍ଷ୍ମଣୌ ॥ 7 ॥
ଇଦଂ ଧନୁର୍ଵରଂ ବ୍ରହ୍ମନ୍ ଜନକୈରଭିପୂଜିତମ୍ ।
ରାଜଭିଶ୍ଚ ମହାଵୀର୍ୟୈଃ ଅଶକ୍ତୈଃ ପୂରିତୁଂ ପୁରା ॥ 8 ॥
ନୈତତ୍ସୁରଗଣାସ୍ସର୍ଵେ ନାସୁରା ନ ଚ ରାକ୍ଷସାଃ ।
ଗଂଧର୍ଵୟକ୍ଷପ୍ରଵରାଃ ସକିନ୍ନରମହୋରଗାଃ ॥ 9 ॥
କ୍ଵ ଗତିର୍ମାନୁଷାଣାଂ ଚ ଧନୁଷୋଽସ୍ୟ ପ୍ରପୂରଣେ ।
ଆରୋପଣେ ସମାୟୋଗେ ଵେପନେ ତୋଲନେଽପି ଵା ॥ 10 ॥
ତଦେତଦ୍ଧନୁଷାଂ ଶ୍ରେଷ୍ଠମାନୀତଂ ମୁନିପୁଂଗଵ ।
ଦର୍ଶୟୈତନ୍ମହାଭାଗ ଅନୟୋଃ ରାଜପୁତ୍ରୟୋଃ ॥ 11 ॥
ଵିଶ୍ଵାମିତ୍ରସ୍ତୁ ଧର୍ମାତ୍ମା ଶ୍ରୁତ୍ଵା ଜନକଭାଷିତମ୍ ।
ଵତ୍ସ ରାମ ଧନୁଃ ପଶ୍ୟ ଇତି ରାଘଵମବ୍ରଵୀତ୍ ॥ 12 ॥
ବ୍ରହ୍ମର୍ଷେର୍ଵଚନାଦ୍ରାମୋ ୟତ୍ର ତିଷ୍ଠତି ତଦ୍ଧନୁଃ ।
ମଂଜୂଷାଂ ତାମପାଵୃତ୍ୟ ଦୃଷ୍ଟ୍ଵା ଧନୁରଥାବ୍ରଵୀତ୍ ॥ 13 ॥
ଇଦଂ ଧନୁର୍ଵରଂ ବ୍ରହ୍ମନ୍ ସଂସ୍ପୃଶାମୀହ ପାଣିନା ।
ୟତ୍ନଵାଂଶ୍ଚ ଭଵିଷ୍ୟାମି ତୋଲନେ ପୂରଣେଽପି ଵା ॥ 14 ॥
ବାଢମିତ୍ୟେଵ ତଂ ରାଜା ମୁନିଶ୍ଚ ସମଭାଷତ ।
ଲୀଲୟା ସ ଧନୁର୍ମଧ୍ୟେ ଜଗ୍ରାହ ଵଚନାନ୍ମୁନେଃ ॥ 15 ॥
ପଶ୍ୟତାଂ ନୃପସହସ୍ରାଣାଂ ବହୂନାଂ ରଘୁନଂଦନଃ ।
ଆରୋପୟତ୍ସ ଧର୍ମାତ୍ମା ସଲୀଲମିଵ ତଦ୍ଧନୁଃ ॥ 16 ॥
ଆରୋପୟିତ୍ଵା ଧର୍ମାତ୍ମା ପୂରୟାମାସ ତଦ୍ଧନୁଃ ।
ତଦ୍ବଭଂଜ ଧନୁର୍ମଧ୍ୟେ ନରଶ୍ରେଷ୍ଠୋ ମହାୟଶାଃ ॥ 17 ॥
ତସ୍ୟ ଶବ୍ଦୋ ମହାନାସୀତ୍ ନିର୍ଘାତସମନିସ୍ଵନଃ ।
ଭୂମିକଂପଶ୍ଚ ସୁମହାନ୍ ପର୍ଵତସ୍ୟେଵ ଦୀର୍ୟତଃ ॥ 18 ॥
ନିପେତୁଶ୍ଚ ନରା ସ୍ସର୍ଵେ ତେନ ଶବ୍ଦେନ ମୋହିତାଃ ।
ଵର୍ଜୟିତ୍ଵା ମୁନିଵରଂ ରାଜାନଂ ତୌ ଚ ରାଘଵୌ ॥ 19 ॥
ପ୍ରତ୍ୟାଶ୍ଵସ୍ତେ ଜନେ ତସ୍ମିନ୍ରାଜା ଵିଗତସାଧ୍ଵସଃ ।
ଉଵାଚ ପ୍ରାଂଜଲିର୍ଵାକ୍ୟଂ ଵାକ୍ୟଜ୍ଞୋ ମୁନିପୁଂଗଵମ୍ ॥ 20 ॥
ଭଗଵନ୍ ଦୃଷ୍ଟଵୀର୍ୟୋ ମେ ରାମୋ ଦଶରଥାତ୍ମଜଃ ।
ଅତ୍ୟଦ୍ଭୁତମଚିଂତ୍ୟଂ ଚ ନ ତର୍କିତମିଦଂ ମୟା ॥ 21 ॥
ଜନକାନାଂ କୁଲେ କୀର୍ତିମାହରିଷ୍ୟତି ମେ ସୁତା ।
ସୀତା ଭର୍ତାରମାସାଦ୍ୟ ରାମଂ ଦଶରଥାତ୍ମଜମ୍ ॥ 22 ॥
ମମ ସତ୍ୟା ପ୍ରତିଜ୍ଞା ଚ ଵୀର୍ୟଶୁଲ୍କେତି କୌଶିକ ।
ସୀତା ପ୍ରାଣୈର୍ବହୁମତା ଦେୟା ରାମାୟ ମେ ସୁତା ॥ 23 ॥
ଭଵତୋଽନୁମତେ ବ୍ରହ୍ମନ୍ ଶୀଘ୍ରଂ ଗଚ୍ଛଂତୁ ମଂତ୍ରିଣଃ ।
ମମ କୌଶିକ ଭଦ୍ରଂ ତେ ଅୟୋଧ୍ୟାଂ ତ୍ଵରିତା ରଥୈଃ ॥ 24 ॥
ରାଜାନଂ ପ୍ରଶ୍ରିତୈର୍ଵାକ୍ୟୈରାନୟଂତୁ ପୁରଂ ମମ ।
ପ୍ରଦାନଂ ଵୀର୍ୟଶୁଲ୍କାୟାଃ କଥୟଂତୁ ଚ ସର୍ଵଶଃ ॥ 25 ॥
ମୁନିଗୁପ୍ତୌ ଚ କାକୁତ୍ସ୍ଥୌ କଥୟଂତୁ ନୃପାୟ ଵୈ ।
ପ୍ରୀୟମାଣଂ ତୁ ରାଜାନମାନୟଂତୁ ସୁଶୀଘ୍ରଗାଃ ॥ 26 ॥
କୌଶିକଶ୍ଚ ତଥେତ୍ୟାହ ରାଜା ଚାଭାଷ୍ୟ ମଂତ୍ରିଣଃ ॥ 27 ॥
ଅୟୋଧ୍ୟାଂ ପ୍ରେଷୟାମାସ ଧର୍ମାତ୍ମା କୃତଶାସନାନ୍ ।
ୟଥାଵୃତ୍ତଂ ସମାଖ୍ୟାତୁମାନେତୁଂ ଚ ନୃପଂ ତଦା ॥ 28 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ସପ୍ତଷଷ୍ଟିତମସ୍ସର୍ଗଃ ॥
