śrīmadvālmīkīya rāmāyaṇē bālakāṇḍam ।
atha saptaṣaṣṭitamassargaḥ ।
. janakasya vachaśśrutvā viśvāmitrō mahāmuniḥ ।
dhanurdarśaya rāmāya iti hōvācha pārthivam ॥ 1 ॥
tatassa rājā janakaḥ sāmantānvyādidēśa ha ।
dhanurānīyatāṃ divyaṃ gandhamālyavibhūṣitam ॥ 2 ॥
janakēna samādiṣṭāḥ sachivā prāviśan purīm ।
taddhanuḥ purataḥ kṛtvā nirjagmuḥ pārthivājñayā ॥ 3 ॥
nṛṇāṃ śatāni pañchāśadvyāyatānāṃ mahātmanām ।
mañjūṣāmaṣṭachakrāṃ tāṃ samūhustē kathañchana ॥ 4 ॥
tāmādāya tu mañjūṣāmāyasīṃ yatra taddhanuḥ ।
surōpamaṃ tē janakamūchurnṛpatimantriṇaḥ ॥ 5 ॥
idaṃ dhanurvaraṃ rājan pūjitaṃ sarvarājabhiḥ ।
mithilādhipa rājēndra darśanīyaṃ yadichChasi ॥ 6 ॥
tēṣāṃ nṛpō vachaḥ śrutvā kṛtāñjalirabhāṣata ।
viśvāmitraṃ mahātmānaṃ tau chōbhau rāmalakṣmaṇau ॥ 7 ॥
idaṃ dhanurvaraṃ brahman janakairabhipūjitam ।
rājabhiścha mahāvīryaiḥ aśaktaiḥ pūrituṃ purā ॥ 8 ॥
naitatsuragaṇāssarvē nāsurā na cha rākṣasāḥ ।
gandharvayakṣapravarāḥ sakinnaramahōragāḥ ॥ 9 ॥
kva gatirmānuṣāṇāṃ cha dhanuṣō'sya prapūraṇē ।
ārōpaṇē samāyōgē vēpanē tōlanē'pi vā ॥ 10 ॥
tadētaddhanuṣāṃ śrēṣṭhamānītaṃ munipuṅgava ।
darśayaitanmahābhāga anayōḥ rājaputrayōḥ ॥ 11 ॥
viśvāmitrastu dharmātmā śrutvā janakabhāṣitam ।
vatsa rāma dhanuḥ paśya iti rāghavamabravīt ॥ 12 ॥
brahmarṣērvachanādrāmō yatra tiṣṭhati taddhanuḥ ।
mañjūṣāṃ tāmapāvṛtya dṛṣṭvā dhanurathābravīt ॥ 13 ॥
idaṃ dhanurvaraṃ brahman saṃspṛśāmīha pāṇinā ।
yatnavāṃścha bhaviṣyāmi tōlanē pūraṇē'pi vā ॥ 14 ॥
bāḍhamityēva taṃ rājā muniścha samabhāṣata ।
līlayā sa dhanurmadhyē jagrāha vachanānmunēḥ ॥ 15 ॥
paśyatāṃ nṛpasahasrāṇāṃ bahūnāṃ raghunandanaḥ ।
ārōpayatsa dharmātmā salīlamiva taddhanuḥ ॥ 16 ॥
ārōpayitvā dharmātmā pūrayāmāsa taddhanuḥ ।
tadbabhañja dhanurmadhyē naraśrēṣṭhō mahāyaśāḥ ॥ 17 ॥
tasya śabdō mahānāsīt nirghātasamanisvanaḥ ।
bhūmikampaścha sumahān parvatasyēva dīryataḥ ॥ 18 ॥
nipētuścha narā ssarvē tēna śabdēna mōhitāḥ ।
varjayitvā munivaraṃ rājānaṃ tau cha rāghavau ॥ 19 ॥
pratyāśvastē janē tasminrājā vigatasādhvasaḥ ।
uvācha prāñjalirvākyaṃ vākyajñō munipuṅgavam ॥ 20 ॥
bhagavan dṛṣṭavīryō mē rāmō daśarathātmajaḥ ।
atyadbhutamachintyaṃ cha na tarkitamidaṃ mayā ॥ 21 ॥
janakānāṃ kulē kīrtimāhariṣyati mē sutā ।
sītā bhartāramāsādya rāmaṃ daśarathātmajam ॥ 22 ॥
mama satyā pratijñā cha vīryaśulkēti kauśika ।
sītā prāṇairbahumatā dēyā rāmāya mē sutā ॥ 23 ॥
bhavatō'numatē brahman śīghraṃ gachChantu mantriṇaḥ ।
mama kauśika bhadraṃ tē ayōdhyāṃ tvaritā rathaiḥ ॥ 24 ॥
rājānaṃ praśritairvākyairānayantu puraṃ mama ।
pradānaṃ vīryaśulkāyāḥ kathayantu cha sarvaśaḥ ॥ 25 ॥
muniguptau cha kākutsthau kathayantu nṛpāya vai ।
prīyamāṇaṃ tu rājānamānayantu suśīghragāḥ ॥ 26 ॥
kauśikaścha tathētyāha rājā chābhāṣya mantriṇaḥ ॥ 27 ॥
ayōdhyāṃ prēṣayāmāsa dharmātmā kṛtaśāsanān ।
yathāvṛttaṃ samākhyātumānētuṃ cha nṛpaṃ tadā ॥ 28 ॥
ityārṣē śrīmadrāmāyaṇē vālmīkīya ādikāvyē bālakāṇḍē saptaṣaṣṭitamassargaḥ ॥
