ശ്രീമദ്വാല്മീകീയ രാമായണേ ബാലകാംഡമ് ।
അഥ സപ്തഷഷ്ടിതമസ്സര്ഗഃ ।
. ജനകസ്യ വചശ്ശ്രുത്വാ വിശ്വാമിത്രോ മഹാമുനിഃ ।
ധനുര്ദര്ശയ രാമായ ഇതി ഹോവാച പാര്ഥിവമ് ॥ 1 ॥
തതസ്സ രാജാ ജനകഃ സാമംതാന്വ്യാദിദേശ ഹ ।
ധനുരാനീയതാം ദിവ്യം ഗംധമാല്യവിഭൂഷിതമ് ॥ 2 ॥
ജനകേന സമാദിഷ്ടാഃ സചിവാ പ്രാവിശന് പുരീമ് ।
തദ്ധനുഃ പുരതഃ കൃത്വാ നിര്ജഗ്മുഃ പാര്ഥിവാജ്ഞയാ ॥ 3 ॥
നൃണാം ശതാനി പംചാശദ്വ്യായതാനാം മഹാത്മനാമ് ।
മംജൂഷാമഷ്ടചക്രാം താം സമൂഹുസ്തേ കഥംചന ॥ 4 ॥
താമാദായ തു മംജൂഷാമായസീം യത്ര തദ്ധനുഃ ।
സുരോപമം തേ ജനകമൂചുര്നൃപതിമംത്രിണഃ ॥ 5 ॥
ഇദം ധനുർവരം രാജന് പൂജിതം സർവരാജഭിഃ ।
മിഥിലാധിപ രാജേംദ്ര ദര്ശനീയം യദിച്ഛസി ॥ 6 ॥
തേഷാം നൃപോ വചഃ ശ്രുത്വാ കൃതാംജലിരഭാഷത ।
വിശ്വാമിത്രം മഹാത്മാനം തൌ ചോഭൌ രാമലക്ഷ്മണൌ ॥ 7 ॥
ഇദം ധനുർവരം ബ്രഹ്മന് ജനകൈരഭിപൂജിതമ് ।
രാജഭിശ്ച മഹാവീര്യൈഃ അശക്തൈഃ പൂരിതും പുരാ ॥ 8 ॥
നൈതത്സുരഗണാസ്സർവേ നാസുരാ ന ച രാക്ഷസാഃ ।
ഗംധർവയക്ഷപ്രവരാഃ സകിന്നരമഹോരഗാഃ ॥ 9 ॥
ക്വ ഗതിര്മാനുഷാണാം ച ധനുഷോഽസ്യ പ്രപൂരണേ ।
ആരോപണേ സമായോഗേ വേപനേ തോലനേഽപി വാ ॥ 10 ॥
തദേതദ്ധനുഷാം ശ്രേഷ്ഠമാനീതം മുനിപുംഗവ ।
ദര്ശയൈതന്മഹാഭാഗ അനയോഃ രാജപുത്രയോഃ ॥ 11 ॥
വിശ്വാമിത്രസ്തു ധര്മാത്മാ ശ്രുത്വാ ജനകഭാഷിതമ് ।
വത്സ രാമ ധനുഃ പശ്യ ഇതി രാഘവമബ്രവീത് ॥ 12 ॥
ബ്രഹ്മര്ഷേർവചനാദ്രാമോ യത്ര തിഷ്ഠതി തദ്ധനുഃ ।
മംജൂഷാം താമപാവൃത്യ ദൃഷ്ട്വാ ധനുരഥാബ്രവീത് ॥ 13 ॥
ഇദം ധനുർവരം ബ്രഹ്മന് സംസ്പൃശാമീഹ പാണിനാ ।
യത്നവാംശ്ച ഭവിഷ്യാമി തോലനേ പൂരണേഽപി വാ ॥ 14 ॥
ബാഢമിത്യേവ തം രാജാ മുനിശ്ച സമഭാഷത ।
ലീലയാ സ ധനുര്മധ്യേ ജഗ്രാഹ വചനാന്മുനേഃ ॥ 15 ॥
പശ്യതാം നൃപസഹസ്രാണാം ബഹൂനാം രഘുനംദനഃ ।
ആരോപയത്സ ധര്മാത്മാ സലീലമിവ തദ്ധനുഃ ॥ 16 ॥
ആരോപയിത്വാ ധര്മാത്മാ പൂരയാമാസ തദ്ധനുഃ ।
തദ്ബഭംജ ധനുര്മധ്യേ നരശ്രേഷ്ഠോ മഹായശാഃ ॥ 17 ॥
തസ്യ ശബ്ദോ മഹാനാസീത് നിര്ഘാതസമനിസ്വനഃ ।
ഭൂമികംപശ്ച സുമഹാന് പർവതസ്യേവ ദീര്യതഃ ॥ 18 ॥
നിപേതുശ്ച നരാ സ്സർവേ തേന ശബ്ദേന മോഹിതാഃ ।
വര്ജയിത്വാ മുനിവരം രാജാനം തൌ ച രാഘവൌ ॥ 19 ॥
പ്രത്യാശ്വസ്തേ ജനേ തസ്മിന്രാജാ വിഗതസാധ്വസഃ ।
ഉവാച പ്രാംജലിർവാക്യം വാക്യജ്ഞോ മുനിപുംഗവമ് ॥ 20 ॥
ഭഗവന് ദൃഷ്ടവീര്യോ മേ രാമോ ദശരഥാത്മജഃ ।
അത്യദ്ഭുതമചിംത്യം ച ന തര്കിതമിദം മയാ ॥ 21 ॥
ജനകാനാം കുലേ കീര്തിമാഹരിഷ്യതി മേ സുതാ ।
സീതാ ഭര്താരമാസാദ്യ രാമം ദശരഥാത്മജമ് ॥ 22 ॥
മമ സത്യാ പ്രതിജ്ഞാ ച വീര്യശുല്കേതി കൌശിക ।
സീതാ പ്രാണൈര്ബഹുമതാ ദേയാ രാമായ മേ സുതാ ॥ 23 ॥
ഭവതോഽനുമതേ ബ്രഹ്മന് ശീഘ്രം ഗച്ഛംതു മംത്രിണഃ ।
മമ കൌശിക ഭദ്രം തേ അയോധ്യാം ത്വരിതാ രഥൈഃ ॥ 24 ॥
രാജാനം പ്രശ്രിതൈർവാക്യൈരാനയംതു പുരം മമ ।
പ്രദാനം വീര്യശുല്കായാഃ കഥയംതു ച സർവശഃ ॥ 25 ॥
മുനിഗുപ്തൌ ച കാകുത്സ്ഥൌ കഥയംതു നൃപായ വൈ ।
പ്രീയമാണം തു രാജാനമാനയംതു സുശീഘ്രഗാഃ ॥ 26 ॥
കൌശികശ്ച തഥേത്യാഹ രാജാ ചാഭാഷ്യ മംത്രിണഃ ॥ 27 ॥
അയോധ്യാം പ്രേഷയാമാസ ധര്മാത്മാ കൃതശാസനാന് ।
യഥാവൃത്തം സമാഖ്യാതുമാനേതും ച നൃപം തദാ ॥ 28 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ സപ്തഷഷ്ടിതമസ്സര്ഗഃ ॥
