ശ്രീമദ്വാല്മീകീയ രാമായണേ ബാലകാംഡമ് ।
അഥ ഏകോനസപ്തതിതമസ്സര്ഗഃ ।
തതോ രാത്ര്യാം വ്യതീതായാം സോപാധ്യായഃ സബാംധവഃ ।
രാജാ ദശരഥോ ഹൃഷ്ട സ്സുമംത്രമിദമബ്രവീത് ॥ 1 ॥
അദ്യ സർവേ ധനാധ്യക്ഷാ ധനമാദായ പുഷ്കലമ് ।
വ്രജംത്വഗ്രേ സുവിഹിതാ നാനാരത്നസമന്വിതാഃ ॥ 2 ॥
ചതുരംഗബലം ചാപി ശീഘ്രം നിര്യാതു സർവശഃ ।
മമജ്ഞാസമകാലം ച യാനയുഗ്യമനുത്തമമ് ॥ 3 ॥
വസിഷ്ഠോ വാമദേവശ്ച ജാബാലിരഥ കാശ്യപഃ ।
മാര്കംഡേയശ്ച ദീര്ഘായുഃഋഷിഃ കാത്യായനസ്തഥാ ॥ 4 ॥
ഏതേ ദ്വിജാഃ പ്രയാംത്വഗ്രേ സ്യംദനം യോജയസ്വ മേ ।
യഥാ കാലാത്യയോ ന സ്യാ ദ്ദൂതാ ഹി ത്വരയംതി മാമ് ॥ 5 ॥
വചനാത്തു നരേംദ്രസ്യ സാ സേനാ ചതുരംഗിണീ ।
രാജാനമൃഷിഭി സ്സാര്ധം വ്രജംതം പൃഷ്ഠതോഽന്വഗാത് ॥ 6 ॥
ഗത്വാ ചതുരഹം മാര്ഗം വിദേഹാനഭ്യുപേയിവാന് ।
രാജാ തു ജനക ശ്ശ്രീമാന് ശ്ശ്രുത്വാ പൂജാമകല്പയത് ॥ 7 ॥
തതോ രാജാനമാസാദ്യ വൃദ്ധം ദശരഥം നൃപമ് ।
ജനകോ മുദിതോ രാജാ ഹര്ഷം ച പരമം യയൌ ॥ 8 ॥
ഉവാച ച നരശ്രേഷ്ഠോ നരശ്രേഷ്ഠം മുദാഽന്വിതഃ ।
സ്വാഗതം തേ മഹാരാജ ദിഷ്ട്യാ പ്രാപ്തോഽസി രാഘവ ॥ 9 ॥
പുത്രയോരുഭയോഃ പ്രീതിം ലപ്സ്യസേ വീര്യനിര്ജിതാമ് ।
ദിഷ്ട്യാ പ്രാപ്തോ മഹാതേജാ വസിഷ്ഠോ ഭഗവാനൃഷിഃ ॥ 10 ॥
സഹ സർവൈര്ദ്വിജശ്രേഷ്ഠൈര്ദേവൈരിവ ശതക്രതുഃ ।
ദിഷ്ട്യാ മേ നിര്ജിതാ വിഘ്നാ ദിഷ്ട്യാ മേ പൂജിതം കുലമ് ॥ 11 ॥
രാഘവൈ സ്സഹ സംബംധാദ്വീര്യശ്രേഷ്ഠൈര്മഹാത്മഭിഃ ।
ശ്വഃ പ്രഭാതേ നരേംദ്രേംദ്ര നിർവര്തയിതുമര്ഹസി ॥ 12 ॥
യജ്ഞസ്യാംതേ നരശ്രേഷ്ഠ വിവാഹമൃഷിസമ്മതമ് ।
തസ്യ തദ്വചനം ശ്രുത്വാ ഋഷിമധ്യേ നരാധിപഃ ॥ 13 ॥
വാക്യം വാക്യവിദാം ശ്രേഷ്ഠഃ പ്രത്യുവാച മഹീപതിമ് ।
പ്രതിഗ്രഹോ ദാതൃവശ ശ്ശ്രൃതമേതന്മയാ പുരാ ॥ 14 ॥
യഥാ വക്ഷ്യസി ധര്മജ്ഞ തത്കരിഷ്യാമഹേ വയമ് ।
ധര്മിഷ്ഠം ച യശസ്യം ച വചനം സത്യവാദിനഃ ॥ 15 ॥
ശ്രുത്വാ വിദേഹാധിപതിഃ പരം വിസ്മയമാഗതഃ ।
തത സ്സർവേ മുനിഗണാഃ പരസ്പരസമാഗമേ ॥ 16 ॥
ഹര്ഷേണ മഹതാ യുക്താസ്താം നിശാമവസന് സുഖമ് ।
രാജാ ച രാഘവൌ പുത്രൌ നിശാമ്യ പരിഹര്ഷിതഃ ॥ 17 ॥
ഉവാസ പരമപ്രീതോ ജനകേന സുപൂജിതഃ ।
ജനകോഽപി മഹാതേജാഃ ക്രിയാം ധര്മേണ തത്ത്വവിത് ॥ 18 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ഏകോനസപ്തതിതമസ്സര്ഗഃ ॥
