ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଏକୋନସପ୍ତତିତମସ୍ସର୍ଗଃ ।
ତତୋ ରାତ୍ର୍ୟାଂ ଵ୍ୟତୀତାୟାଂ ସୋପାଧ୍ୟାୟଃ ସବାଂଧଵଃ ।
ରାଜା ଦଶରଥୋ ହୃଷ୍ଟ ସ୍ସୁମଂତ୍ରମିଦମବ୍ରଵୀତ୍ ॥ 1 ॥
ଅଦ୍ୟ ସର୍ଵେ ଧନାଧ୍ୟକ୍ଷା ଧନମାଦାୟ ପୁଷ୍କଲମ୍ ।
ଵ୍ରଜଂତ୍ଵଗ୍ରେ ସୁଵିହିତା ନାନାରତ୍ନସମନ୍ଵିତାଃ ॥ 2 ॥
ଚତୁରଂଗବଲଂ ଚାପି ଶୀଘ୍ରଂ ନିର୍ୟାତୁ ସର୍ଵଶଃ ।
ମମଜ୍ଞାସମକାଲଂ ଚ ୟାନୟୁଗ୍ୟମନୁତ୍ତମମ୍ ॥ 3 ॥
ଵସିଷ୍ଠୋ ଵାମଦେଵଶ୍ଚ ଜାବାଲିରଥ କାଶ୍ୟପଃ ।
ମାର୍କଂଡେୟଶ୍ଚ ଦୀର୍ଘାୟୁଃଋଷିଃ କାତ୍ୟାୟନସ୍ତଥା ॥ 4 ॥
ଏତେ ଦ୍ଵିଜାଃ ପ୍ରୟାଂତ୍ଵଗ୍ରେ ସ୍ୟଂଦନଂ ୟୋଜୟସ୍ଵ ମେ ।
ୟଥା କାଲାତ୍ୟୟୋ ନ ସ୍ୟା ଦ୍ଦୂତା ହି ତ୍ଵରୟଂତି ମାମ୍ ॥ 5 ॥
ଵଚନାତ୍ତୁ ନରେଂଦ୍ରସ୍ୟ ସା ସେନା ଚତୁରଂଗିଣୀ ।
ରାଜାନମୃଷିଭି ସ୍ସାର୍ଧଂ ଵ୍ରଜଂତଂ ପୃଷ୍ଠତୋଽନ୍ଵଗାତ୍ ॥ 6 ॥
ଗତ୍ଵା ଚତୁରହଂ ମାର୍ଗଂ ଵିଦେହାନଭ୍ୟୁପେୟିଵାନ୍ ।
ରାଜା ତୁ ଜନକ ଶ୍ଶ୍ରୀମାନ୍ ଶ୍ଶ୍ରୁତ୍ଵା ପୂଜାମକଲ୍ପୟତ୍ ॥ 7 ॥
ତତୋ ରାଜାନମାସାଦ୍ୟ ଵୃଦ୍ଧଂ ଦଶରଥଂ ନୃପମ୍ ।
ଜନକୋ ମୁଦିତୋ ରାଜା ହର୍ଷଂ ଚ ପରମଂ ୟୟୌ ॥ 8 ॥
ଉଵାଚ ଚ ନରଶ୍ରେଷ୍ଠୋ ନରଶ୍ରେଷ୍ଠଂ ମୁଦାଽନ୍ଵିତଃ ।
ସ୍ଵାଗତଂ ତେ ମହାରାଜ ଦିଷ୍ଟ୍ୟା ପ୍ରାପ୍ତୋଽସି ରାଘଵ ॥ 9 ॥
ପୁତ୍ରୟୋରୁଭୟୋଃ ପ୍ରୀତିଂ ଲପ୍ସ୍ୟସେ ଵୀର୍ୟନିର୍ଜିତାମ୍ ।
ଦିଷ୍ଟ୍ୟା ପ୍ରାପ୍ତୋ ମହାତେଜା ଵସିଷ୍ଠୋ ଭଗଵାନୃଷିଃ ॥ 10 ॥
ସହ ସର୍ଵୈର୍ଦ୍ଵିଜଶ୍ରେଷ୍ଠୈର୍ଦେଵୈରିଵ ଶତକ୍ରତୁଃ ।
ଦିଷ୍ଟ୍ୟା ମେ ନିର୍ଜିତା ଵିଘ୍ନା ଦିଷ୍ଟ୍ୟା ମେ ପୂଜିତଂ କୁଲମ୍ ॥ 11 ॥
ରାଘଵୈ ସ୍ସହ ସଂବଂଧାଦ୍ଵୀର୍ୟଶ୍ରେଷ୍ଠୈର୍ମହାତ୍ମଭିଃ ।
ଶ୍ଵଃ ପ୍ରଭାତେ ନରେଂଦ୍ରେଂଦ୍ର ନିର୍ଵର୍ତୟିତୁମର୍ହସି ॥ 12 ॥
ୟଜ୍ଞସ୍ୟାଂତେ ନରଶ୍ରେଷ୍ଠ ଵିଵାହମୃଷିସମ୍ମତମ୍ ।
ତସ୍ୟ ତଦ୍ଵଚନଂ ଶ୍ରୁତ୍ଵା ଋଷିମଧ୍ୟେ ନରାଧିପଃ ॥ 13 ॥
ଵାକ୍ୟଂ ଵାକ୍ୟଵିଦାଂ ଶ୍ରେଷ୍ଠଃ ପ୍ରତ୍ୟୁଵାଚ ମହୀପତିମ୍ ।
ପ୍ରତିଗ୍ରହୋ ଦାତୃଵଶ ଶ୍ଶ୍ରୃତମେତନ୍ମୟା ପୁରା ॥ 14 ॥
ୟଥା ଵକ୍ଷ୍ୟସି ଧର୍ମଜ୍ଞ ତତ୍କରିଷ୍ୟାମହେ ଵୟମ୍ ।
ଧର୍ମିଷ୍ଠଂ ଚ ୟଶସ୍ୟଂ ଚ ଵଚନଂ ସତ୍ୟଵାଦିନଃ ॥ 15 ॥
ଶ୍ରୁତ୍ଵା ଵିଦେହାଧିପତିଃ ପରଂ ଵିସ୍ମୟମାଗତଃ ।
ତତ ସ୍ସର୍ଵେ ମୁନିଗଣାଃ ପରସ୍ପରସମାଗମେ ॥ 16 ॥
ହର୍ଷେଣ ମହତା ୟୁକ୍ତାସ୍ତାଂ ନିଶାମଵସନ୍ ସୁଖମ୍ ।
ରାଜା ଚ ରାଘଵୌ ପୁତ୍ରୌ ନିଶାମ୍ୟ ପରିହର୍ଷିତଃ ॥ 17 ॥
ଉଵାସ ପରମପ୍ରୀତୋ ଜନକେନ ସୁପୂଜିତଃ ।
ଜନକୋଽପି ମହାତେଜାଃ କ୍ରିୟାଂ ଧର୍ମେଣ ତତ୍ତ୍ଵଵିତ୍ ॥ 18 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଏକୋନସପ୍ତତିତମସ୍ସର୍ଗଃ ॥
