શ્રીમદ્વાલ્મીકીય રામાયણે બાલકાંડમ્ ।
અથ એકોનસપ્તતિતમસ્સર્ગઃ ।
તતો રાત્ર્યાં વ્યતીતાયાં સોપાધ્યાયઃ સબાંધવઃ ।
રાજા દશરથો હૃષ્ટ સ્સુમંત્રમિદમબ્રવીત્ ॥ 1 ॥
અદ્ય સર્વે ધનાધ્યક્ષા ધનમાદાય પુષ્કલમ્ ।
વ્રજંત્વગ્રે સુવિહિતા નાનારત્નસમન્વિતાઃ ॥ 2 ॥
ચતુરંગબલં ચાપિ શીઘ્રં નિર્યાતુ સર્વશઃ ।
મમજ્ઞાસમકાલં ચ યાનયુગ્યમનુત્તમમ્ ॥ 3 ॥
વસિષ્ઠો વામદેવશ્ચ જાબાલિરથ કાશ્યપઃ ।
માર્કંડેયશ્ચ દીર્ઘાયુઃઋષિઃ કાત્યાયનસ્તથા ॥ 4 ॥
એતે દ્વિજાઃ પ્રયાંત્વગ્રે સ્યંદનં યોજયસ્વ મે ।
યથા કાલાત્યયો ન સ્યા દ્દૂતા હિ ત્વરયંતિ મામ્ ॥ 5 ॥
વચનાત્તુ નરેંદ્રસ્ય સા સેના ચતુરંગિણી ।
રાજાનમૃષિભિ સ્સાર્ધં વ્રજંતં પૃષ્ઠતોઽન્વગાત્ ॥ 6 ॥
ગત્વા ચતુરહં માર્ગં વિદેહાનભ્યુપેયિવાન્ ।
રાજા તુ જનક શ્શ્રીમાન્ શ્શ્રુત્વા પૂજામકલ્પયત્ ॥ 7 ॥
તતો રાજાનમાસાદ્ય વૃદ્ધં દશરથં નૃપમ્ ।
જનકો મુદિતો રાજા હર્ષં ચ પરમં યયૌ ॥ 8 ॥
ઉવાચ ચ નરશ્રેષ્ઠો નરશ્રેષ્ઠં મુદાઽન્વિતઃ ।
સ્વાગતં તે મહારાજ દિષ્ટ્યા પ્રાપ્તોઽસિ રાઘવ ॥ 9 ॥
પુત્રયોરુભયોઃ પ્રીતિં લપ્સ્યસે વીર્યનિર્જિતામ્ ।
દિષ્ટ્યા પ્રાપ્તો મહાતેજા વસિષ્ઠો ભગવાનૃષિઃ ॥ 10 ॥
સહ સર્વૈર્દ્વિજશ્રેષ્ઠૈર્દેવૈરિવ શતક્રતુઃ ।
દિષ્ટ્યા મે નિર્જિતા વિઘ્ના દિષ્ટ્યા મે પૂજિતં કુલમ્ ॥ 11 ॥
રાઘવૈ સ્સહ સંબંધાદ્વીર્યશ્રેષ્ઠૈર્મહાત્મભિઃ ।
શ્વઃ પ્રભાતે નરેંદ્રેંદ્ર નિર્વર્તયિતુમર્હસિ ॥ 12 ॥
યજ્ઞસ્યાંતે નરશ્રેષ્ઠ વિવાહમૃષિસમ્મતમ્ ।
તસ્ય તદ્વચનં શ્રુત્વા ઋષિમધ્યે નરાધિપઃ ॥ 13 ॥
વાક્યં વાક્યવિદાં શ્રેષ્ઠઃ પ્રત્યુવાચ મહીપતિમ્ ।
પ્રતિગ્રહો દાતૃવશ શ્શ્રૃતમેતન્મયા પુરા ॥ 14 ॥
યથા વક્ષ્યસિ ધર્મજ્ઞ તત્કરિષ્યામહે વયમ્ ।
ધર્મિષ્ઠં ચ યશસ્યં ચ વચનં સત્યવાદિનઃ ॥ 15 ॥
શ્રુત્વા વિદેહાધિપતિઃ પરં વિસ્મયમાગતઃ ।
તત સ્સર્વે મુનિગણાઃ પરસ્પરસમાગમે ॥ 16 ॥
હર્ષેણ મહતા યુક્તાસ્તાં નિશામવસન્ સુખમ્ ।
રાજા ચ રાઘવૌ પુત્રૌ નિશામ્ય પરિહર્ષિતઃ ॥ 17 ॥
ઉવાસ પરમપ્રીતો જનકેન સુપૂજિતઃ ।
જનકોઽપિ મહાતેજાઃ ક્રિયાં ધર્મેણ તત્ત્વવિત્ ॥ 18 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે એકોનસપ્તતિતમસ્સર્ગઃ ॥
