śrīmadvālmīkīya rāmāyaṇē bālakāṇḍam ।
atha ēkōnasaptatitamassargaḥ ।
tatō rātryāṃ vyatītāyāṃ sōpādhyāyaḥ sabāndhavaḥ ।
rājā daśarathō hṛṣṭa ssumantramidamabravīt ॥ 1 ॥
adya sarvē dhanādhyakṣā dhanamādāya puṣkalam ।
vrajantvagrē suvihitā nānāratnasamanvitāḥ ॥ 2 ॥
chaturaṅgabalaṃ chāpi śīghraṃ niryātu sarvaśaḥ ।
mamajñāsamakālaṃ cha yānayugyamanuttamam ॥ 3 ॥
vasiṣṭhō vāmadēvaścha jābāliratha kāśyapaḥ ।
mārkaṇḍēyaścha dīrghāyuḥṛṣiḥ kātyāyanastathā ॥ 4 ॥
ētē dvijāḥ prayāntvagrē syandanaṃ yōjayasva mē ।
yathā kālātyayō na syā ddūtā hi tvarayanti mām ॥ 5 ॥
vachanāttu narēndrasya sā sēnā chaturaṅgiṇī ।
rājānamṛṣibhi ssārdhaṃ vrajantaṃ pṛṣṭhatō'nvagāt ॥ 6 ॥
gatvā chaturahaṃ mārgaṃ vidēhānabhyupēyivān ।
rājā tu janaka śśrīmān śśrutvā pūjāmakalpayat ॥ 7 ॥
tatō rājānamāsādya vṛddhaṃ daśarathaṃ nṛpam ।
janakō muditō rājā harṣaṃ cha paramaṃ yayau ॥ 8 ॥
uvācha cha naraśrēṣṭhō naraśrēṣṭhaṃ mudā'nvitaḥ ।
svāgataṃ tē mahārāja diṣṭyā prāptō'si rāghava ॥ 9 ॥
putrayōrubhayōḥ prītiṃ lapsyasē vīryanirjitām ।
diṣṭyā prāptō mahātējā vasiṣṭhō bhagavānṛṣiḥ ॥ 10 ॥
saha sarvairdvijaśrēṣṭhairdēvairiva śatakratuḥ ।
diṣṭyā mē nirjitā vighnā diṣṭyā mē pūjitaṃ kulam ॥ 11 ॥
rāghavai ssaha sambandhādvīryaśrēṣṭhairmahātmabhiḥ ।
śvaḥ prabhātē narēndrēndra nirvartayitumarhasi ॥ 12 ॥
yajñasyāntē naraśrēṣṭha vivāhamṛṣisammatam ।
tasya tadvachanaṃ śrutvā ṛṣimadhyē narādhipaḥ ॥ 13 ॥
vākyaṃ vākyavidāṃ śrēṣṭhaḥ pratyuvācha mahīpatim ।
pratigrahō dātṛvaśa śśrṛtamētanmayā purā ॥ 14 ॥
yathā vakṣyasi dharmajña tatkariṣyāmahē vayam ।
dharmiṣṭhaṃ cha yaśasyaṃ cha vachanaṃ satyavādinaḥ ॥ 15 ॥
śrutvā vidēhādhipatiḥ paraṃ vismayamāgataḥ ।
tata ssarvē munigaṇāḥ parasparasamāgamē ॥ 16 ॥
harṣēṇa mahatā yuktāstāṃ niśāmavasan sukham ।
rājā cha rāghavau putrau niśāmya pariharṣitaḥ ॥ 17 ॥
uvāsa paramaprītō janakēna supūjitaḥ ।
janakō'pi mahātējāḥ kriyāṃ dharmēṇa tattvavit ॥ 18 ॥
ityārṣē śrīmadrāmāyaṇē vālmīkīya ādikāvyē bālakāṇḍē ēkōnasaptatitamassargaḥ ॥
