శ్రీమద్వాల్మీకీయ రామాయణే బాలకాండమ్ ।
అథ ఏకోనసప్తతితమస్సర్గః ।
తతో రాత్ర్యాం వ్యతీతాయాం సోపాధ్యాయః సబాంధవః ।
రాజా దశరథో హృష్ట స్సుమంత్రమిదమబ్రవీత్ ॥ 1 ॥
అద్య సర్వే ధనాధ్యక్షా ధనమాదాయ పుష్కలమ్ ।
వ్రజంత్వగ్రే సువిహితా నానారత్నసమన్వితాః ॥ 2 ॥
చతురంగబలం చాపి శీఘ్రం నిర్యాతు సర్వశః ।
మమజ్ఞాసమకాలం చ యానయుగ్యమనుత్తమమ్ ॥ 3 ॥
వసిష్ఠో వామదేవశ్చ జాబాలిరథ కాశ్యపః ।
మార్కండేయశ్చ దీర్ఘాయుఃఋషిః కాత్యాయనస్తథా ॥ 4 ॥
ఏతే ద్విజాః ప్రయాంత్వగ్రే స్యందనం యోజయస్వ మే ।
యథా కాలాత్యయో న స్యా ద్దూతా హి త్వరయంతి మామ్ ॥ 5 ॥
వచనాత్తు నరేంద్రస్య సా సేనా చతురంగిణీ ।
రాజానమృషిభి స్సార్ధం వ్రజంతం పృష్ఠతోఽన్వగాత్ ॥ 6 ॥
గత్వా చతురహం మార్గం విదేహానభ్యుపేయివాన్ ।
రాజా తు జనక శ్శ్రీమాన్ శ్శ్రుత్వా పూజామకల్పయత్ ॥ 7 ॥
తతో రాజానమాసాద్య వృద్ధం దశరథం నృపమ్ ।
జనకో ముదితో రాజా హర్షం చ పరమం యయౌ ॥ 8 ॥
ఉవాచ చ నరశ్రేష్ఠో నరశ్రేష్ఠం ముదాఽన్వితః ।
స్వాగతం తే మహారాజ దిష్ట్యా ప్రాప్తోఽసి రాఘవ ॥ 9 ॥
పుత్రయోరుభయోః ప్రీతిం లప్స్యసే వీర్యనిర్జితామ్ ।
దిష్ట్యా ప్రాప్తో మహాతేజా వసిష్ఠో భగవానృషిః ॥ 10 ॥
సహ సర్వైర్ద్విజశ్రేష్ఠైర్దేవైరివ శతక్రతుః ।
దిష్ట్యా మే నిర్జితా విఘ్నా దిష్ట్యా మే పూజితం కులమ్ ॥ 11 ॥
రాఘవై స్సహ సంబంధాద్వీర్యశ్రేష్ఠైర్మహాత్మభిః ।
శ్వః ప్రభాతే నరేంద్రేంద్ర నిర్వర్తయితుమర్హసి ॥ 12 ॥
యజ్ఞస్యాంతే నరశ్రేష్ఠ వివాహమృషిసమ్మతమ్ ।
తస్య తద్వచనం శ్రుత్వా ఋషిమధ్యే నరాధిపః ॥ 13 ॥
వాక్యం వాక్యవిదాం శ్రేష్ఠః ప్రత్యువాచ మహీపతిమ్ ।
ప్రతిగ్రహో దాతృవశ శ్శ్రృతమేతన్మయా పురా ॥ 14 ॥
యథా వక్ష్యసి ధర్మజ్ఞ తత్కరిష్యామహే వయమ్ ।
ధర్మిష్ఠం చ యశస్యం చ వచనం సత్యవాదినః ॥ 15 ॥
శ్రుత్వా విదేహాధిపతిః పరం విస్మయమాగతః ।
తత స్సర్వే మునిగణాః పరస్పరసమాగమే ॥ 16 ॥
హర్షేణ మహతా యుక్తాస్తాం నిశామవసన్ సుఖమ్ ।
రాజా చ రాఘవౌ పుత్రౌ నిశామ్య పరిహర్షితః ॥ 17 ॥
ఉవాస పరమప్రీతో జనకేన సుపూజితః ।
జనకోఽపి మహాతేజాః క్రియాం ధర్మేణ తత్త్వవిత్ ॥ 18 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే ఏకోనసప్తతితమస్సర్గః ॥
