শ্রীমদ্বাল্মীকীয় রামাযণে অয়োধ্য়াকাংডম্ ।
অথ দ্বাদশস্সর্গঃ ।
ততশ্শৃত্বা মহারাজঃ কৈকেয়্য়া দারুণং বচঃ ।
চিংতামভিসমাপেদে মুহূর্তং প্রততাপ চ ॥ 1 ॥
কিন্নু মে যদি বা স্বপ্নশ্চিত্তমোহোঽপি বা মম ।
অনুভূতোপসর্গো বা মনসো বাপ্য়ুপদ্রবঃ ॥ 2 ॥
ইতি সংচিংত্য় তদ্রাজা নাধ্যগচ্ছত্তদাসুখম্ ।
প্রতিলভ্য় চিরাত্সংজ্ঞাং কৈকেয়ীবাক্যতাডিতঃ ॥ 3 ॥
ব্যথিতো বিক্লবশ্চৈব ব্য়াঘ্রীং দৃষ্ট্বা যথা মৃগঃ ।
অসংবৃতায়ামাসীনো জগত্য়াং দীর্ঘমুচ্ছবসন্ ॥ 4 ॥
মংডলে পন্নগো রুদ্ধো মংত্রৈরিব মহাবিষঃ ।
অহো ধিগিতি সামর্ষো বাচমুক্ত্বা নরাধিপঃ ॥ 5 ॥
মোহমাপেদিবান্ভূয় শ্শোকোপহতচেতনঃ ।
চিরেণ তু নৃপ স্সংজ্ঞাং প্রতিলভ্য় সুদুঃখিতঃ ॥ 6 ॥
কৈকেয়ীমব্রবীত্ক্রুদ্ধঃপ্রদহন্নিব চক্ষুষা ।
নৃশংসে দুষ্টচারিত্রে কুলস্য়াস্য় বিনাশিনি ॥ 7 ॥
কিং কৃতং তব রামেণ পাপং পাপে ময়াপি বা ।
যদা তে জননীতুল্য়াং বৃত্তিং বহতি রাঘবঃ ॥ 8 ॥
তস্য়ৈব ত্বমনর্থায় কিংনিমিত্তমিহোদ্যতা ।
ত্বং ময়াঽঽত্মবিনাশার্থং ভবনং স্বং প্রবেশিতা ॥ 9 ॥
অবিজ্ঞানান্নৃপসুতা ব্য়ালী তীক্ষ্ণবিষা যথা ।
জীবলোকো যদা সর্বো রামস্য়াহ গুণস্তবম্ ॥ 10 ॥
অপরাধং কিমুদ্দিশ্য় ত্যক্ষ্য়ামীষ্টমহং সুতম্ ।
কৌসল্য়াং বা সুমিত্রাং বা ত্যজেযমপি বা শ্রিযম্ ॥ 11 ॥
জীবিতং বাঽত্মনো রামং ন ত্বেব পিতৃবত্সলম্ ।
পরা ভবতি মে প্রীতির্দৃষ্ট্বা তনযমগ্রজম্ ॥ 12 ॥
অপশ্যতস্তু মে রামং নষ্টা ভবতি চেতনা ।
তিষ্ঠেল্লোকো বিনা সূর্য়ং শস্য়ং বা সলিলং বিনা ॥ 13 ॥
ন তু রামং বিনা দেহে তিষ্ঠেত্তু মম জীবিতম্ ।
তদলং ত্যজ্যতামেষ নিশ্চয়ঃ পাপনিশ্চয়ে ॥ 14 ॥
অপি তে চরণৈ মূর্ধ্না স্পৃশাম্য়েষ প্রসীদ মে ।
কিমিদং চিংতিতং পাপে ত্বয়া পরমদারুণম্ ॥ 15 ॥
অথ জিজ্ঞাসসে মাং ত্বং ভরতস্য় প্রিয়াপ্রিয়ে ।
অস্তু যত্তত্ত্বয়া পূর্বং ব্য়াহৃতং রাঘবং প্রতি ॥ 16 ॥
স মে জ্য়েষ্ঠস্সুত শ্রীমাংধর্মজ্য়েষ্ঠ ইতীব মে ।
তত্ত্বয়া প্রিযবাদিন্য়া সেবার্থং কথিতং ভবেত্ ॥ 17 ॥
তচ্ছ্রুত্বা শোকসংতপ্তা সংতাপযসি মাং ভৃশম্ ।
আবিষ্টাঽসি গৃহং শূন্য়ং সা ত্বং পরবশং গতা ॥ 18 ॥
ইক্ষ্বাকূণাং কুলে দেবি সংপ্রাপ্তস্সুমহানযম্ ।
অনয়ো নযসংপন্নে যত্র তে বিকৃতা মতিঃ ॥ 19 ॥
নহি কিংচিদয়ুক্তং বা বিপ্রিয়ং বা পুরা মম ।
অকরোস্ত্বং বিশালাক্ষি তেন ন শ্রদ্দধাম্যহম্ ॥ 20 ॥
ননু তে রাঘবস্তুল্য়ো ভরতেন মহাত্মনা ।
বহুশো হি সুবালে ত্বং কথাঃ কথযসে মম ॥ 21 ॥
তস্য় ধর্মাত্মনো দেবি বনবাসং যশস্বিনঃ ।
কথং রোচযসে ভীরু নব বর্ষাণি পংচ চ ॥ 22 ॥
অত্য়ংতসুকুমারস্য় তস্য় ধর্মে ধৃতাত্মনঃ ।
কথং রোচযসে বাসমরণ্য়ে ভৃশদারুণে ॥ 23 ॥
রোচযস্যভিরামস্য় রামস্য় শুভলোচনে ।
তব শুশ্রূষমাণস্য় কিমর্থং বিপ্রবাসনম্ ॥ 24 ॥
রামো হি ভরতাদ্ভূযস্তব শুশ্রূষতে সদা ।
বিশেষং ত্বয়ি তস্মাত্তু ভরতস্য় ন লক্ষয়ে ॥ 25 ॥
শুশ্রূষাং গৌরবং চৈব প্রমাণং বচনক্রিয়াম্ ।
কস্তে ভূযস্তরং কুর্য়াদন্যত্র মনুজর্ষভাত্ ॥ 26 ॥
বহূনাং স্ত্রীসহস্রাণাং বহূনাং চোপজীবিনাম্ ।
পরিবাদোঽপবাদো বা রাঘবে নোপপদ্যতে ॥ 27 ॥
সাংত্বযন্সর্বভূতানি রাম শ্শুদ্ধেন চেতসা ।
গৃহ্ণাতি মনুজব্য়াঘ্র প্রিয়ৈর্বিষযবাসিনঃ ॥ 28 ॥
সত্য়েন লোকান্ জযতি দীনান্ দানেন রাঘবঃ ।
গুরূংছুশ্রূষয়া বীরো ধনুষা যুধি শাত্রবান্ ॥ 29 ॥
সত্য়ং দানং তপস্ত্য়াগো মিত্রতা শৌচমার্জবম্ ।
বিদ্য়া চ গুরুশুশ্রূষা ধ্রুবাণ্য়েতানি রাঘবে ॥ 30 ॥
তস্মিন্নার্জবসংপন্নে দেবি দেবোপমে কথম্ ।
পাপমাশংসসে রামে মহর্ষিসমতেজসি ॥ 31 ॥
ন স্মরাম্যপ্রিয়ং বাক্য়ং লোকস্য় প্রিযবাদিনঃ ।
স কথং ত্বত্কৃতে রামং বক্ষ্য়ামি প্রিযমপ্রিযম্ ॥ 32 ॥
ক্ষমা যস্মিংদমস্ত্য়াগ সত্য়ং ধর্মঃ কৃতজ্ঞতা ।
অপ্যহিংসা চ ভূতানাং তমৃতে কা গতির্মম ॥ 33 ॥
মম বৃদ্ধস্য় কৈকেয়ি গতাংতস্য় তপস্বিনঃ ।
দীনং লালপ্যমানস্য় কারুণ্য়ং কর্তুমর্হসি ॥ 34 ॥
পৃথিব্য়াং সাগরাংতায়াং যত্কিংচিদধিগম্যতে ।
তত্সর্বং তব দাস্য়ামি মা চ ত্বাং মন্য়ুরাবিশেত্ ॥ 35 ॥
অংজলিং করোমি কৈকেয়ি পাদৌ চাপি স্পৃশামি তে ।
শরণং ভব রামস্য় মাঽধর্মো মামিহ স্পৃশেত্ ॥ 36 ॥
ইতি দুঃখাভিসংতপ্তং বিলপংতমচেতনম্ ।
ঘূর্ণমানং মহারাজং শোকেন সমভিপ্লুতম্ ॥ 37 ॥
পারং শোকার্ণবস্য়াশু প্রার্থয়ংতং পুনঃ পুনঃ ।
প্রত্য়ুবাচাথ কৈকেয়ী রৌদ্রা রৌদ্রতরং বচঃ ॥ 38 ॥
যদি দত্ত্বা বরৌ রাজন্পুনঃ প্রত্যনুতপ্যসে ।
ধার্মিকত্বং কথং বীর পৃথিব্য়াং কথয়িষ্যসি ॥ 39 ॥
যদা সমেতা বহবস্ত্বয়া রাজর্ষয় স্সহ ।
কথয়িষ্য়ংতি ধর্মজ্ঞ তত্র কিং প্রতিবক্ষ্যসি ॥ 40 ॥
যস্য়াঃ প্রসাদে জীবামি যা চ মামভ্যপালযত্ ।
তস্য়াঃ কৃতং ময়া মিথ্য়া কৈকেয়্য়া ইতি বক্ষযসি ॥ 41 ॥
কিল্বিষত্বং নরেংদ্রাণাং করিষ্যসি নরাধিপ ।
যো দত্বা বরমদ্য়ৈব পুনরন্য়ানি ভাষসে ॥ 42 ॥
শৈব্যশ্শ্য়েনকপোতীয়ে স্বমাংসং পক্ষিণে দদৌ ।
অলর্কশ্চক্ষুষী দত্বা জগাম গতিমুত্তমাম্ ॥ 43 ॥
সাগরস্সময়ং কৃত্বা ন বেলামতিবর্ততে ।
সময়ং মাঽনৃতং কার্ষীঃ পূর্ববৃত্তমনুস্মরন্ ॥ 44 ॥
স ত্বং ধর্মং পরিত্যজ্য় রামং রাজ্য়েঽভিষিচ্য় চ ।
সহ কৌসল্যয়া নিত্য়ং রংতুমিচ্ছসি দুর্মতে ॥ 45 ॥
ভবত্বধর্মো ধর্মো বা সত্য়ং বা যদি বাঽনৃতম্ ।
যত্ত্বয়া সংশ্রুতং মহ্য়ং তস্য় নাস্তি ব্যতিক্রমঃ ॥ 46 ॥
অহং হি বিষমদ্য়ৈব পীত্বা বহু তবাগ্রতঃ ।
পশ্যতস্তে মরিষ্য়ামি রামো যদ্যভিষিচ্যতে ॥ 47 ॥
একাহমপি পশ্য়েয়ং যদ্যহং রামমাতরম্ ।
অংজলিং প্রতিগৃহ্ণংতীং শ্রেয়ো ননু মৃতির্মম ॥ 48 ॥
ভরতেনাত্মনা চাহং শপে তে মনুজাধিপ ।
যথা নান্য়েন তুষ্য়েযমৃতে রামবিবাসনাত্ ॥ 49 ॥
এতাবদুক্ত্বা বচনং কৈকেয়ী বিররাম হ ।
বিলপংতং চ রাজানং ন প্রতিব্য়াজহার সা ॥ 50 ॥
শ্রুত্বা তু রাজা কৈকেয়্য়া বৃতং পরমশোভনম্ ।
রামস্য় চ বনে বাসমৈশ্বর্য়ং ভরতস্য় চ ॥ 51 ॥
নাভ্যভাষত কৈকেয়ীং মুহূর্তং ব্য়াকুলেংদ্রিয়ঃ ।
প্রৈক্ষতানিমিষো দেবীং প্রিয়ামপ্রিযবাদিনীম্ ॥ 52 ॥
তাং হি বজ্রসমাং বাচমাকর্ণ্য় হৃদয়াপ্রিয়াম্ ।
দুঃখশোকময়ীং ঘোরাং রাজা ন সুখিতোঽভবত্ ॥ 53 ॥
স দেব্য়া ব্যবসায়ং চ ঘোরং চ শপথং কৃতম্ ।
ধ্য়াত্বা রামেতি নিশ্শ্বস্য় ছিন্ন স্তরুরিবাপতত্ ॥ 54 ॥
নষ্টচিত্তো যথোন্মত্তো বিপরীতো যথাঽতুরঃ ।
হৃততেজা যথা সর্পো বভূব জগতীপতিঃ ॥ 55 ॥
দীনয়া তু গিরা রাজা ইতি হোবাচ কৈকয়ীম্ ।
অনর্থমিমমর্থাভং কেন ত্বমুপদর্শিতা ॥ 56 ॥
ভূতোপহতচিত্তেব ব্রুবংতী মাং ন লজ্জসে ।
শীলব্যসনমেতত্তে নাভিজানাম্যহং পুরা ॥ 57 ॥
বালায়াস্তত্ত্বিতিদানীং তে লক্ষয়ে বিপরীতবত্ ।
কুতো বা তে ভয়ং জাতং যা ত্বমেবংবিধং বরম্ ॥ 58 ॥
রাষ্ট্রে ভরতমাসীনং বৃণীষে রাঘবং বনে ।
বিরমৈতেন ভাবেন ত্বমেতেনানৃতেন বা ॥ 59 ॥
যদি ভর্তুঃ প্রিয়ং কার্য়ং লোকস্য় ভরতস্য় চ ।
নৃশংসে পাপসংকল্পে ক্ষুদ্রে দুষ্কৃতকারিণি ॥ 60 ॥
কিন্নু দুখমলীকং বা ময়ি রামে চ পশ্যসি ।
ন কথংচিদৃতে রামাদ্ভরতো রাজ্যমাবসেত্ ॥ 61 ॥
রামাদপি হি তং মন্য়ে ধর্মতো বলবত্তরম্ ।
কথং দ্রক্ষ্য়ামি রামস্য় বনং গচ্ছেতি ভাষিতে ॥ 62 ॥
মুখবর্ণং বিবর্ণং তু তং যথৈবেংদুমুপপ্লুতম্ ।
তাং হি মে সুকৃতাং বুদ্ধিং সুহৃদ্ভিস্সহ নিশ্চিতাম্ ॥ 63 ॥
কথং দ্রক্ষ্য়াম্যপাবৃত্তাং পরৈরিব হতাং চমূম্ ।
কিং মাং বক্ষ্য়ংতি রাজানো নানাদিগ্ভ্য় স্সমাগতাঃ ॥ 64 ॥
বালো বতাঽযমৈক্ষ্বাকশ্চিরং রাজ্যমকারযত্ ।
যদা তু বহবো বৃদ্ধা গুণবংতো বহুশ্রুতাঃ ॥ 65 ॥
পরিপ্রক্ষ্য়ংতি কাকুত্স্থং বক্ষ্য়ামি কিমহং তদা ।
কৈকেয়্য়া ক্লিশ্যমানেন রামঃ প্রব্রাজিতো ময়া ॥ 66 ॥
যদি সত্য়ং ব্রবীম্য়েতত্তদসত্য়ং ভবিষ্যতি ।
কিং মাং বক্ষ্যতি কৌশল্য়া রাঘবে বনমাস্থিতে ॥ 67 ॥
কিং চৈনাং প্রতিবক্ষ্য়ামি কৃত্বা বিপ্রিযমীদৃশম্ ।
যদা যদা হি কৌশল্য়া দাসীবচ্চ সখীব চ ॥ 68 ॥
ভার্য়াবদ্ভগিনীবচ্চ মাতৃবচ্চোপতিষ্ঠতি ।
সততং প্রিযকামা মে প্রিযপুত্রা প্রিয়ংবদা ॥ 69 ॥
ন ময়া সত্কৃতা দেবী সত্কারার্হা কৃতে তব ।
ইদানীং তত্তপতি মাং যন্ময়া সুকৃতং ত্বয়ি ॥ 70 ॥
অপথ্যব্য়ংজনোপেতং ভুক্তমন্নমিবাতুরম্ ।
বিপ্রকারং চ রামস্য় সংপ্রয়াণং বনস্য় চ ॥ 71 ॥
সুমিত্রা প্রেক্ষ্য় বৈ ভীতা কথং মে বিশ্বসিষ্যতি ।
কৃপণং বত বৈদেহী শ্রোষ্যতি দ্বযমপ্রিযম্ ॥ 72 ॥
মাং চ পংচত্বমাপন্নং রামং চ বনমাশ্রিতম্ ।
বৈদেহী বত মে প্রাণান্শোচংতী ক্ষপয়িষ্যতি ॥ 73 ॥
হীনা হিমবতঃ পার্শ্বে কিন্নরেণেব কিন্নরী ।
ন হি রামমহং দৃষ্ট্বা প্রবসংতং মহাবনে ॥ 74 ॥
চিরং জীবিতুমাশংসে রুদংতীং চাপি মৈথিলীম্ ।
সা নূনং বিধবা রাজ্য়ং সপুত্রা কারয়িষ্যসি ॥ 75 ॥
ন হি প্রব্রাজিতে রামে দেবি জীবিতুমুত্সহে ।
সতীং ত্বামহমত্য়ংতং ব্যবস্য়াম্যসতীং সতীম্ ।
রূপিণীং বিষসংয়ুক্তাং পীত্বেব মদিরাং নরঃ ॥ 76 ॥
অনৃতৈর্বহু মাং সাংত্বৈ স্সাংত্বয়ংতী স্ম ভাষসে ।
গীতশব্দেন সংরুধ্য় লুব্ধো মৃগমিবাবধীঃ ॥ 77 ॥
অনার্য় ইতি মামার্য়াঃ পুত্রবিক্রাযকং ধ্রুবম্ ।
ধিক্করিষ্য়ংতি রথ্য়াসু সুরাপং ব্রাহ্মণং যথা ॥ 78 ॥
অহো দুঃখমহো কৃচ্ছ্রং যত্র বাচঃ ক্ষমে তব ।
দুঃখমেবংবিধং প্রাপ্তং পুরাকৃতমিবাশুভম্ ॥ 79 ॥
চিরং খলু ময়া পাপে ত্বং পাপেনাভিরক্ষিতা ।
অজ্ঞানাদুপসংপন্না রজ্জুরুদ্বংধিনী যথা ॥ 80 ॥
রমমাণস্ত্বয়া সার্ধং মৃত্য়ুং ত্বাং নাভিলক্ষয়ে ।
বালো রহসি হস্তেন কৃষ্ণসর্পমিবাস্পৃশম্ ॥ 81 ॥
ময়া হ্যপিতৃকঃ পুত্র স্সমহাত্মা দুরাত্মনা ।
তং তু মাং জীবলোকোঽয়ং নূনমাক্রোষ্টুমর্হতি ॥ 82 ॥
বালিশো বত কামাত্মা রাজা দশরথো ভৃশম্ ।
যঃ স্ত্রীকৃতে প্রিয়ং পুত্রং বনং প্রস্থাপয়িষ্যতি ॥ 83 ॥
ব্রতৈশ্চ ব্রহ্মচর্য়ৈশ্চ গুরুভিশ্চোপকর্শিতঃ ।
ভোগকালে মহত্কৃচ্ছ্রং পুনরেব প্রপত্স্যতে ॥ 84 ॥
নালং দ্বিতীয়ং বচনং পুত্রো মাং প্রতিভাষিতুম্ ।
স বনং প্রব্রজেত্য়ুক্তো বাঢমিত্য়েব বক্ষ্যতি ॥ 85 ॥
যদি মে রাঘবঃ কুর্য়াদ্বনং গচ্ছেতি চোদিতঃ ।
প্রতিকূলং প্রিয়ং মে স্য়ান্ন তু বত্সঃ করিষ্যতি ॥ 86 ॥
শুদ্ধভাবো হি ভাবং মে ন তু জ্ঞাস্যতি রাঘবঃ ॥ 87 ॥
স বনং প্রব্রজে ত্য়ুক্তো বাঢ মিত্য়েব বক্ষযতি ।
রাঘবে হি বনং প্রাপ্তে সর্বলোকস্য় ধিক্কৃতম্ ॥ 88 ॥
মৃত্য়ুরক্ষমণীয়ং মাং নয়িষ্যতি যমক্ষযম্ ।
মৃতে ময়ি গতে রামে বনং মনুজপুংগবে ॥ 89 ॥
ইষ্টে মম জনে শেষে কিং পাপং প্রতিপত্স্যসে ।
কৌশল্য়া মাং চ রামং চ পুত্রৌ চ যদি হাস্যতি ॥ 90 ॥
দুঃখান্যসহতী দেবী মামেবানুমরিষ্যতি ।
কৌসল্য়াং চ সুমিত্রাং চ মাং চ পুত্রৈস্ত্রিভিস্সহ ॥ 91 ॥
প্রক্ষিপ্য় নরকে সা ত্বং কৈকেয়ি সুখিতা ভব ।
ময়া রামেণ চ ত্যক্তং শাশ্বতং সত্কৃতং গুণৈঃ ॥ 92 ॥
ইক্ষ্বাকুকুলমক্ষোভ্যমাকুলং পালয়িষ্যসি ।
প্রিয়ং চেদ্ভরতস্য়ৈতদ্রামপ্রব্রাজনং ভবেত্ ॥ 93 ॥
মা স্ম মে ভরতঃ কার্ষীত্প্রেতকৃত্য়ং গতায়ুষঃ ।
হংতানার্য়ে মমামিত্রে সকামা ভব কৈকয়ি ॥ 94 ॥
মৃতে ময়ি গতে রামে বনং পুরুষপুংগবে ।
সেদানীং বিধবা রাজ্য়ং সপুত্রা কারয়িষ্যসি ॥ 95 ॥
ত্বং রাজপুত্রীবাদেন ন্যবসো মম বেশ্মনি ।
অকীর্তিশ্চাতুলা লোকে ধ্রুবঃ পরিভবশ্চ মে ॥ 96 ॥
সর্বভূতেষু চাবজ্ঞা যথা পাপকৃতস্তথা ।
কথং রথৈর্বিভুর্য়াত্বা গজাশ্বৈশ্চ মুহুর্মুহুঃ ॥ 97 ॥
পদ্ভ্য়াং রামো মহারণ্য়ে বত্সো মে বিচরিষ্যতি ।
যস্য় ত্বাহারসময়ে সূদাঃ কুংডলধারিণঃ ॥ 98 ॥
অহংপূর্বাঃ পচংতি স্ম প্রশস্তং পানভোজনম্ ।
স কথন্নু কষায়াণি তিক্তানি কটুকানি চ ॥ 99 ॥
ভক্ষযন্বন্যমাহারং সুতো মে বর্তয়িষ্যতি ।
মহার্হবস্ত্রসংবীতো ভূত্বা চিরসুখোষিতঃ ॥ 100 ॥
কাষাযপরিধানস্তু কথং ভূমৌনিবত্স্যতি ।
কস্য়ৈতদ্ধারুণং বাক্যমেবংবিধমচিংতিতম্ ॥ 101 ॥
রামস্য়ারণ্যগমনং ভরতস্য়াভিষেচনম্ ।
ধিগস্তু যোষিতো নাম শঠা স্স্বার্থপরাস্সদা ।
ন ব্রবীমি স্ত্রিয় স্সর্বা ভরতস্য়ৈব মাতরম্ ॥ 102 ॥
অনর্থভাবেঽর্থপরে নৃশংসে মমানুতাপায় নিবিষ্টভাবে ।
কিমপ্রিয়ং পশ্যসি মন্নিমিত্তং হিতানুকারিণ্যথবাঽপি রামে ॥ 103 ॥
পরিত্যজেয়ুঃ পিতরো হি পুত্রান্ভার্য়াঃ পতীংশ্চাপি কৃতানুরাগাঃ ।
কৃত্স্নং হি সর্বং কুপিতং জগত্স্য়াদ্দৃষ্ট্বৈব রামং ব্যসনে নিমগ্নম্ ॥ 104 ॥
অহং পুনর্দেবকুমাররূপমলংকৃতং তং সুতমাব্রজংতম্ ।
নংদামি পশ্যন্নপি দর্শনেন ভবামি দৃষ্ট্বৈব চ পুনর্য়ুবেব ॥ 105 ॥
বিনাঽপি সূর্য়েণ ভবেত্প্রবৃত্তিরবর্ষতা বজ্রধরেণ বাঽপি ।
রামং তু গচ্ছংতমিত স্সমীক্ষ্য় জীবেন্ন কশ্চিত্ত্বিতি চেতনা মে ॥ 106 ॥
বিনাশকামামহিতামমিত্রামাবাসয়ং মৃত্য়ুমিবাত্মনস্ত্বাম্ ।
চিরং বতাংকেন ধৃতাসি সর্পী মহাবিষা তেন হতোঽস্মি মোহাত্ ॥ 107 ॥
ময়া চ রামেণ চ লক্ষ্মণেন প্রশাস্তু হীনো ভরতস্ত্বয়া সহ ।
পুরং চ রাষ্ট্রং চ নিহত্য় বাংধবান্ মমাহিতানাং চ ভবাভিহর্ষিণী ॥ 108 ॥
নৃশংসবৃত্তে ব্যসনপ্রহারিণি প্রসহ্য় বাক্য়ং যদিহাদ্য় ভাষসে ।
ন নাম তে কেন মুখাত্পতংত্যধো বিশীর্যমাণা দশনা স্সহস্রধা ॥ 109 ॥
ন কিংচিদাহাহিতমপ্রিয়ং বচো ন বেত্তি রামঃ পরুষাণি ভাষিতুম্ ।
কথন্নু রামে হ্যভিরামবাদিনি ব্রবীষি দোষান্গুণনিত্যসম্মতে ॥ 110 ॥
প্রতাম্য় বা প্রজ্বল বা প্রণশ্য় বা সহস্রশো বা স্ফুটিতা মহীং ব্রজ ।
ন তে করিষ্য়ামি বচ স্সুদারুণং মমাহিতং কেকযরাজপাংসনি ॥ 111 ॥
ক্ষুরোপমাং নিত্যমসত্প্রিয়ংবদাং প্রদুষ্টভাবাং স্বকুলোপঘাতিনীম্ ।
ন জীবিতুং ত্বাং বিষহেঽমনোরমাং দিধক্ষমাণাং হৃদয়ং সবংধনম্ ।
2.12,112 ।
ন জীবিতং মেঽস্তি পুনঃকুত স্সুখং বিনাঽঽত্মজেনাঽত্মবতঃ কুতো রতিঃ ।
মমাহিতং দেবি ন কর্তুমর্হসি স্পৃশামি পাদাবপি তে প্রসীদ মে ॥ 112 ॥
স ভূমিপালো বিলপন্ননাথবত্স্ত্রিয়া গৃহীতো হৃদয়েঽতিমাত্রয়া ।
পপাত দেব্য়াশ্চরণৌ প্রসারিতাবুভাবসম্স্পৃশ্য় যথাঽতুরস্তথা ॥ 113 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে দ্বাদশস্সর্গঃ ॥
