ශ්රීමද්වාල්මීකීය රාමායණේ අයෝධ්යාකාංඩම් ।
අථ ද්වාදශස්සර්ගඃ ।
තතශ්ශෘත්වා මහාරාජඃ කෛකේය්යා දාරුණං වචඃ ।
චිංතාමභිසමාපේදේ මුහූර්තං ප්රතතාප ච ॥ 1 ॥
කින්නු මේ යදි වා ස්වප්නශ්චිත්තමෝහෝऽපි වා මම ।
අනුභූතෝපසර්ගෝ වා මනසෝ වාප්යුපද්රවඃ ॥ 2 ॥
ඉති සංචිංත්ය තද්රාජා නාධ්යගච්ඡත්තදාසුඛම් ।
ප්රතිලභ්ය චිරාත්සංජ්ඤාං කෛකේයීවාක්යතාඩිතඃ ॥ 3 ॥
ව්යථිතෝ වික්ලබශ්චෛව ව්යාඝ්රීං දෘෂ්ට්වා යථා මෘගඃ ।
අසංවෘතායාමාසීනෝ ජගත්යාං දීර්ඝමුච්ඡවසන් ॥ 4 ॥
මංඩලේ පන්නගෝ රුද්ධෝ මංත්රෛරිව මහාවිෂඃ ।
අහෝ ධිගිති සාමර්ෂෝ වාචමුක්ත්වා නරාධිපඃ ॥ 5 ॥
මෝහමාපේදිවාන්භූය ශ්ශෝකෝපහතචේතනඃ ।
චිරේණ තු නෘප ස්සංජ්ඤාං ප්රතිලභ්ය සුදුඃඛිතඃ ॥ 6 ॥
කෛකේයීමබ්රවීත්ක්රුද්ධඃප්රදහන්නිව චක්ෂුෂා ।
නෘශංසේ දුෂ්ටචාරිත්රේ කුලස්යාස්ය විනාශිනි ॥ 7 ॥
කිං කෘතං තව රාමේණ පාපං පාපේ මයාපි වා ।
යදා තේ ජනනීතුල්යාං වෘත්තිං වහති රාඝවඃ ॥ 8 ॥
තස්යෛව ත්වමනර්ථාය කිංනිමිත්තමිහෝද්යතා ।
ත්වං මයාऽऽත්මවිනාශාර්ථං භවනං ස්වං ප්රවේශිතා ॥ 9 ॥
අවිජ්ඤානාන්නෘපසුතා ව්යාලී තීක්ෂ්ණවිෂා යථා ।
ජීවලෝකෝ යදා සර්වෝ රාමස්යාහ ගුණස්තවම් ॥ 10 ॥
අපරාධං කිමුද්දිශ්ය ත්යක්ෂ්යාමීෂ්ටමහං සුතම් ।
කෞසල්යාං වා සුමිත්රාං වා ත්යජේයමපි වා ශ්රියම් ॥ 11 ॥
ජීවිතං වාऽත්මනෝ රාමං න ත්වේව පිතෘවත්සලම් ।
පරා භවති මේ ප්රීතිර්දෘෂ්ට්වා තනයමග්රජම් ॥ 12 ॥
අපශ්යතස්තු මේ රාමං නෂ්ටා භවති චේතනා ।
තිෂ්ඨේල්ලෝකෝ විනා සූර්යං ශස්යං වා සලිලං විනා ॥ 13 ॥
න තු රාමං විනා දේහේ තිෂ්ඨේත්තු මම ජීවිතම් ।
තදලං ත්යජ්යතාමේෂ නිශ්චයඃ පාපනිශ්චයේ ॥ 14 ॥
අපි තේ චරණෛ මූර්ධ්නා ස්පෘශාම්යේෂ ප්රසීද මේ ।
කිමිදං චිංතිතං පාපේ ත්වයා පරමදාරුණම් ॥ 15 ॥
අථ ජිජ්ඤාසසේ මාං ත්වං භරතස්ය ප්රියාප්රියේ ।
අස්තු යත්තත්ත්වයා පූර්වං ව්යාහෘතං රාඝවං ප්රති ॥ 16 ॥
ස මේ ජ්යේෂ්ඨස්සුත ශ්රීමාංධර්මජ්යේෂ්ඨ ඉතීව මේ ।
තත්ත්වයා ප්රියවාදින්යා සේවාර්ථං කථිතං භවේත් ॥ 17 ॥
තච්ඡ්රුත්වා ශෝකසංතප්තා සංතාපයසි මාං භෘශම් ।
ආවිෂ්ටාऽසි ගෘහං ශූන්යං සා ත්වං පරවශං ගතා ॥ 18 ॥
ඉක්ෂ්වාකූණාං කුලේ දේවි සංප්රාප්තස්සුමහානයම් ।
අනයෝ නයසංපන්නේ යත්ර තේ විකෘතා මතිඃ ॥ 19 ॥
නහි කිංචිදයුක්තං වා විප්රියං වා පුරා මම ।
අකරෝස්ත්වං විශාලාක්ෂි තේන න ශ්රද්දධාම්යහම් ॥ 20 ॥
නනු තේ රාඝවස්තුල්යෝ භරතේන මහාත්මනා ।
බහුශෝ හි සුබාලේ ත්වං කථාඃ කථයසේ මම ॥ 21 ॥
තස්ය ධර්මාත්මනෝ දේවි වනවාසං යශස්විනඃ ।
කථං රෝචයසේ භීරු නව වර්ෂාණි පංච ච ॥ 22 ॥
අත්යංතසුකුමාරස්ය තස්ය ධර්මේ ධෘතාත්මනඃ ।
කථං රෝචයසේ වාසමරණ්යේ භෘශදාරුණේ ॥ 23 ॥
රෝචයස්යභිරාමස්ය රාමස්ය ශුභලෝචනේ ।
තව ශුශ්රූෂමාණස්ය කිමර්ථං විප්රවාසනම් ॥ 24 ॥
රාමෝ හි භරතාද්භූයස්තව ශුශ්රූෂතේ සදා ।
විශේෂං ත්වයි තස්මාත්තු භරතස්ය න ලක්ෂයේ ॥ 25 ॥
ශුශ්රූෂාං ගෞරවං චෛව ප්රමාණං වචනක්රියාම් ।
කස්තේ භූයස්තරං කුර්යාදන්යත්ර මනුජර්ෂභාත් ॥ 26 ॥
බහූනාං ස්ත්රීසහස්රාණාං බහූනාං චෝපජීවිනාම් ।
පරිවාදෝऽපවාදෝ වා රාඝවේ නෝපපද්යතේ ॥ 27 ॥
සාංත්වයන්සර්වභූතානි රාම ශ්ශුද්ධේන චේතසා ।
ගෘහ්ණාති මනුජව්යාඝ්ර ප්රියෛර්විෂයවාසිනඃ ॥ 28 ॥
සත්යේන ලෝකාන් ජයති දීනාන් දානේන රාඝවඃ ।
ගුරූංඡුශ්රූෂයා වීරෝ ධනුෂා යුධි ශාත්රවාන් ॥ 29 ॥
සත්යං දානං තපස්ත්යාගෝ මිත්රතා ශෞචමාර්ජවම් ।
විද්යා ච ගුරුශුශ්රූෂා ධ්රුවාණ්යේතානි රාඝවේ ॥ 30 ॥
තස්මින්නාර්ජවසංපන්නේ දේවි දේවෝපමේ කථම් ।
පාපමාශංසසේ රාමේ මහර්ෂිසමතේජසි ॥ 31 ॥
න ස්මරාම්යප්රියං වාක්යං ලෝකස්ය ප්රියවාදිනඃ ।
ස කථං ත්වත්කෘතේ රාමං වක්ෂ්යාමි ප්රියමප්රියම් ॥ 32 ॥
ක්ෂමා යස්මිංදමස්ත්යාග සත්යං ධර්මඃ කෘතජ්ඤතා ।
අප්යහිංසා ච භූතානාං තමෘතේ කා ගතිර්මම ॥ 33 ॥
මම වෘද්ධස්ය කෛකේයි ගතාංතස්ය තපස්විනඃ ।
දීනං ලාලප්යමානස්ය කාරුණ්යං කර්තුමර්හසි ॥ 34 ॥
පෘථිව්යාං සාගරාංතායාං යත්කිංචිදධිගම්යතේ ।
තත්සර්වං තව දාස්යාමි මා ච ත්වාං මන්යුරාවිශේත් ॥ 35 ॥
අංජලිං කරෝමි කෛකේයි පාදෞ චාපි ස්පෘශාමි තේ ।
ශරණං භව රාමස්ය මාऽධර්මෝ මාමිහ ස්පෘශේත් ॥ 36 ॥
ඉති දුඃඛාභිසංතප්තං විලපංතමචේතනම් ।
ඝූර්ණමානං මහාරාජං ශෝකේන සමභිප්ලුතම් ॥ 37 ॥
පාරං ශෝකාර්ණවස්යාශු ප්රාර්ථයංතං පුනඃ පුනඃ ।
ප්රත්යුවාචාථ කෛකේයී රෞද්රා රෞද්රතරං වචඃ ॥ 38 ॥
යදි දත්ත්වා වරෞ රාජන්පුනඃ ප්රත්යනුතප්යසේ ।
ධාර්මිකත්වං කථං වීර පෘථිව්යාං කථයිෂ්යසි ॥ 39 ॥
යදා සමේතා බහවස්ත්වයා රාජර්ෂය ස්සහ ।
කථයිෂ්යංති ධර්මජ්ඤ තත්ර කිං ප්රතිවක්ෂ්යසි ॥ 40 ॥
යස්යාඃ ප්රසාදේ ජීවාමි යා ච මාමභ්යපාලයත් ।
තස්යාඃ කෘතං මයා මිථ්යා කෛකේය්යා ඉති වක්ෂයසි ॥ 41 ॥
කිල්බිෂත්වං නරේංද්රාණාං කරිෂ්යසි නරාධිප ।
යෝ දත්වා වරමද්යෛව පුනරන්යානි භාෂසේ ॥ 42 ॥
ශෛබ්යශ්ශ්යේනකපෝතීයේ ස්වමාංසං පක්ෂිණේ දදෞ ।
අලර්කශ්චක්ෂුෂී දත්වා ජගාම ගතිමුත්තමාම් ॥ 43 ॥
සාගරස්සමයං කෘත්වා න වේලාමතිවර්තතේ ।
සමයං මාऽනෘතං කාර්ෂීඃ පූර්වවෘත්තමනුස්මරන් ॥ 44 ॥
ස ත්වං ධර්මං පරිත්යජ්ය රාමං රාජ්යේऽභිෂිච්ය ච ।
සහ කෞසල්යයා නිත්යං රංතුමිච්ඡසි දුර්මතේ ॥ 45 ॥
භවත්වධර්මෝ ධර්මෝ වා සත්යං වා යදි වාऽනෘතම් ।
යත්ත්වයා සංශ්රුතං මහ්යං තස්ය නාස්ති ව්යතික්රමඃ ॥ 46 ॥
අහං හි විෂමද්යෛව පීත්වා බහු තවාග්රතඃ ।
පශ්යතස්තේ මරිෂ්යාමි රාමෝ යද්යභිෂිච්යතේ ॥ 47 ॥
ඒකාහමපි පශ්යේයං යද්යහං රාමමාතරම් ।
අංජලිං ප්රතිගෘහ්ණංතීං ශ්රේයෝ නනු මෘතිර්මම ॥ 48 ॥
භරතේනාත්මනා චාහං ශපේ තේ මනුජාධිප ।
යථා නාන්යේන තුෂ්යේයමෘතේ රාමවිවාසනාත් ॥ 49 ॥
ඒතාවදුක්ත්වා වචනං කෛකේයී විරරාම හ ।
විලපංතං ච රාජානං න ප්රතිව්යාජහාර සා ॥ 50 ॥
ශ්රුත්වා තු රාජා කෛකේය්යා වෘතං පරමශෝභනම් ।
රාමස්ය ච වනේ වාසමෛශ්වර්යං භරතස්ය ච ॥ 51 ॥
නාභ්යභාෂත කෛකේයීං මුහූර්තං ව්යාකුලේංද්රියඃ ।
ප්රෛක්ෂතානිමිෂෝ දේවීං ප්රියාමප්රියවාදිනීම් ॥ 52 ॥
තාං හි වජ්රසමාං වාචමාකර්ණ්ය හෘදයාප්රියාම් ।
දුඃඛශෝකමයීං ඝෝරාං රාජා න සුඛිතෝऽභවත් ॥ 53 ॥
ස දේව්යා ව්යවසායං ච ඝෝරං ච ශපථං කෘතම් ।
ධ්යාත්වා රාමේති නිශ්ශ්වස්ය ඡින්න ස්තරුරිවාපතත් ॥ 54 ॥
නෂ්ටචිත්තෝ යථෝන්මත්තෝ විපරීතෝ යථාऽතුරඃ ।
හෘතතේජා යථා සර්පෝ බභූව ජගතීපතිඃ ॥ 55 ॥
දීනයා තු ගිරා රාජා ඉති හෝවාච කෛකයීම් ।
අනර්ථමිමමර්ථාභං කේන ත්වමුපදර්ශිතා ॥ 56 ॥
භූතෝපහතචිත්තේව බ්රුවංතී මාං න ලජ්ජසේ ।
ශීලව්යසනමේතත්තේ නාභිජානාම්යහං පුරා ॥ 57 ॥
බාලායාස්තත්ත්විතිදානීං තේ ලක්ෂයේ විපරීතවත් ।
කුතෝ වා තේ භයං ජාතං යා ත්වමේවංවිධං වරම් ॥ 58 ॥
රාෂ්ට්රේ භරතමාසීනං වෘණීෂේ රාඝවං වනේ ।
විරමෛතේන භාවේන ත්වමේතේනානෘතේන වා ॥ 59 ॥
යදි භර්තුඃ ප්රියං කාර්යං ලෝකස්ය භරතස්ය ච ।
නෘශංසේ පාපසංකල්පේ ක්ෂුද්රේ දුෂ්කෘතකාරිණි ॥ 60 ॥
කින්නු දුඛමලීකං වා මයි රාමේ ච පශ්යසි ।
න කථංචිදෘතේ රාමාද්භරතෝ රාජ්යමාවසේත් ॥ 61 ॥
රාමාදපි හි තං මන්යේ ධර්මතෝ බලවත්තරම් ।
කථං ද්රක්ෂ්යාමි රාමස්ය වනං ගච්ඡේති භාෂිතේ ॥ 62 ॥
මුඛවර්ණං විවර්ණං තු තං යථෛවේංදුමුපප්ලුතම් ।
තාං හි මේ සුකෘතාං බුද්ධිං සුහෘද්භිස්සහ නිශ්චිතාම් ॥ 63 ॥
කථං ද්රක්ෂ්යාම්යපාවෘත්තාං පරෛරිව හතාං චමූම් ।
කිං මාං වක්ෂ්යංති රාජානෝ නානාදිග්භ්ය ස්සමාගතාඃ ॥ 64 ॥
බාලෝ බතාऽයමෛක්ෂ්වාකශ්චිරං රාජ්යමකාරයත් ।
යදා තු බහවෝ වෘද්ධා ගුණවංතෝ බහුශ්රුතාඃ ॥ 65 ॥
පරිප්රක්ෂ්යංති කාකුත්ස්ථං වක්ෂ්යාමි කිමහං තදා ।
කෛකේය්යා ක්ලිශ්යමානේන රාමඃ ප්රව්රාජිතෝ මයා ॥ 66 ॥
යදි සත්යං බ්රවීම්යේතත්තදසත්යං භවිෂ්යති ।
කිං මාං වක්ෂ්යති කෞශල්යා රාඝවේ වනමාස්ථිතේ ॥ 67 ॥
කිං චෛනාං ප්රතිවක්ෂ්යාමි කෘත්වා විප්රියමීදෘශම් ।
යදා යදා හි කෞශල්යා දාසීවච්ච සඛීව ච ॥ 68 ॥
භාර්යාවද්භගිනීවච්ච මාතෘවච්චෝපතිෂ්ඨති ।
සතතං ප්රියකාමා මේ ප්රියපුත්රා ප්රියංවදා ॥ 69 ॥
න මයා සත්කෘතා දේවී සත්කාරාර්හා කෘතේ තව ।
ඉදානීං තත්තපති මාං යන්මයා සුකෘතං ත්වයි ॥ 70 ॥
අපථ්යව්යංජනෝපේතං භුක්තමන්නමිවාතුරම් ।
විප්රකාරං ච රාමස්ය සංප්රයාණං වනස්ය ච ॥ 71 ॥
සුමිත්රා ප්රේක්ෂ්ය වෛ භීතා කථං මේ විශ්වසිෂ්යති ।
කෘපණං බත වෛදේහී ශ්රෝෂ්යති ද්වයමප්රියම් ॥ 72 ॥
මාං ච පංචත්වමාපන්නං රාමං ච වනමාශ්රිතම් ।
වෛදේහී බත මේ ප්රාණාන්ශෝචංතී ක්ෂපයිෂ්යති ॥ 73 ॥
හීනා හිමවතඃ පාර්ශ්වේ කින්නරේණේව කින්නරී ।
න හි රාමමහං දෘෂ්ට්වා ප්රවසංතං මහාවනේ ॥ 74 ॥
චිරං ජීවිතුමාශංසේ රුදංතීං චාපි මෛථිලීම් ।
සා නූනං විධවා රාජ්යං සපුත්රා කාරයිෂ්යසි ॥ 75 ॥
න හි ප්රව්රාජිතේ රාමේ දේවි ජීවිතුමුත්සහේ ।
සතීං ත්වාමහමත්යංතං ව්යවස්යාම්යසතීං සතීම් ।
රූපිණීං විෂසංයුක්තාං පීත්වේව මදිරාං නරඃ ॥ 76 ॥
අනෘතෛර්බහු මාං සාංත්වෛ ස්සාංත්වයංතී ස්ම භාෂසේ ।
ගීතශබ්දේන සංරුධ්ය ලුබ්ධෝ මෘගමිවාවධීඃ ॥ 77 ॥
අනාර්ය ඉති මාමාර්යාඃ පුත්රවික්රායකං ධ්රුවම් ।
ධික්කරිෂ්යංති රථ්යාසු සුරාපං බ්රාහ්මණං යථා ॥ 78 ॥
අහෝ දුඃඛමහෝ කෘච්ඡ්රං යත්ර වාචඃ ක්ෂමේ තව ।
දුඃඛමේවංවිධං ප්රාප්තං පුරාකෘතමිවාශුභම් ॥ 79 ॥
චිරං ඛලු මයා පාපේ ත්වං පාපේනාභිරක්ෂිතා ।
අජ්ඤානාදුපසංපන්නා රජ්ජුරුද්බංධිනී යථා ॥ 80 ॥
රමමාණස්ත්වයා සාර්ධං මෘත්යුං ත්වාං නාභිලක්ෂයේ ।
බාලෝ රහසි හස්තේන කෘෂ්ණසර්පමිවාස්පෘශම් ॥ 81 ॥
මයා හ්යපිතෘකඃ පුත්ර ස්සමහාත්මා දුරාත්මනා ।
තං තු මාං ජීවලෝකෝऽයං නූනමාක්රෝෂ්ටුමර්හති ॥ 82 ॥
බාලිශෝ බත කාමාත්මා රාජා දශරථෝ භෘශම් ।
යඃ ස්ත්රීකෘතේ ප්රියං පුත්රං වනං ප්රස්ථාපයිෂ්යති ॥ 83 ॥
ව්රතෛශ්ච බ්රහ්මචර්යෛශ්ච ගුරුභිශ්චෝපකර්ශිතඃ ।
භෝගකාලේ මහත්කෘච්ඡ්රං පුනරේව ප්රපත්ස්යතේ ॥ 84 ॥
නාලං ද්විතීයං වචනං පුත්රෝ මාං ප්රතිභාෂිතුම් ।
ස වනං ප්රව්රජේත්යුක්තෝ බාඪමිත්යේව වක්ෂ්යති ॥ 85 ॥
යදි මේ රාඝවඃ කුර්යාද්වනං ගච්ඡේති චෝදිතඃ ।
ප්රතිකූලං ප්රියං මේ ස්යාන්න තු වත්සඃ කරිෂ්යති ॥ 86 ॥
ශුද්ධභාවෝ හි භාවං මේ න තු ජ්ඤාස්යති රාඝවඃ ॥ 87 ॥
ස වනං ප්රබ්රජේ ත්යුක්තෝ බාඪ මිත්යේව වක්ෂයති ।
රාඝවේ හි වනං ප්රාප්තේ සර්වලෝකස්ය ධික්කෘතම් ॥ 88 ॥
මෘත්යුරක්ෂමණීයං මාං නයිෂ්යති යමක්ෂයම් ।
මෘතේ මයි ගතේ රාමේ වනං මනුජපුංගවේ ॥ 89 ॥
ඉෂ්ටේ මම ජනේ ශේෂේ කිං පාපං ප්රතිපත්ස්යසේ ।
කෞශල්යා මාං ච රාමං ච පුත්රෞ ච යදි හාස්යති ॥ 90 ॥
දුඃඛාන්යසහතී දේවී මාමේවානුමරිෂ්යති ।
කෞසල්යාං ච සුමිත්රාං ච මාං ච පුත්රෛස්ත්රිභිස්සහ ॥ 91 ॥
ප්රක්ෂිප්ය නරකේ සා ත්වං කෛකේයි සුඛිතා භව ।
මයා රාමේණ ච ත්යක්තං ශාශ්වතං සත්කෘතං ගුණෛඃ ॥ 92 ॥
ඉක්ෂ්වාකුකුලමක්ෂෝභ්යමාකුලං පාලයිෂ්යසි ।
ප්රියං චේද්භරතස්යෛතද්රාමප්රව්රාජනං භවේත් ॥ 93 ॥
මා ස්ම මේ භරතඃ කාර්ෂීත්ප්රේතකෘත්යං ගතායුෂඃ ।
හංතානාර්යේ මමාමිත්රේ සකාමා භව කෛකයි ॥ 94 ॥
මෘතේ මයි ගතේ රාමේ වනං පුරුෂපුංගවේ ।
සේදානීං විධවා රාජ්යං සපුත්රා කාරයිෂ්යසි ॥ 95 ॥
ත්වං රාජපුත්රීවාදේන න්යවසෝ මම වේශ්මනි ।
අකීර්තිශ්චාතුලා ලෝකේ ධ්රුවඃ පරිභවශ්ච මේ ॥ 96 ॥
සර්වභූතේෂු චාවජ්ඤා යථා පාපකෘතස්තථා ।
කථං රථෛර්විභුර්යාත්වා ගජාශ්වෛශ්ච මුහුර්මුහුඃ ॥ 97 ॥
පද්භ්යාං රාමෝ මහාරණ්යේ වත්සෝ මේ විචරිෂ්යති ।
යස්ය ත්වාහාරසමයේ සූදාඃ කුංඩලධාරිණඃ ॥ 98 ॥
අහංපූර්වාඃ පචංති ස්ම ප්රශස්තං පානභෝජනම් ।
ස කථන්නු කෂායාණි තික්තානි කටුකානි ච ॥ 99 ॥
භක්ෂයන්වන්යමාහාරං සුතෝ මේ වර්තයිෂ්යති ।
මහාර්හවස්ත්රසංවීතෝ භූත්වා චිරසුඛෝෂිතඃ ॥ 100 ॥
කාෂායපරිධානස්තු කථං භූමෞනිවත්ස්යති ।
කස්යෛතද්ධාරුණං වාක්යමේවංවිධමචිංතිතම් ॥ 101 ॥
රාමස්යාරණ්යගමනං භරතස්යාභිෂේචනම් ।
ධිගස්තු යෝෂිතෝ නාම ශඨා ස්ස්වාර්ථපරාස්සදා ।
න බ්රවීමි ස්ත්රිය ස්සර්වා භරතස්යෛව මාතරම් ॥ 102 ॥
අනර්ථභාවේऽර්ථපරේ නෘශංසේ මමානුතාපාය නිවිෂ්ටභාවේ ।
කිමප්රියං පශ්යසි මන්නිමිත්තං හිතානුකාරිණ්යථවාऽපි රාමේ ॥ 103 ॥
පරිත්යජේයුඃ පිතරෝ හි පුත්රාන්භාර්යාඃ පතීංශ්චාපි කෘතානුරාගාඃ ।
කෘත්ස්නං හි සර්වං කුපිතං ජගත්ස්යාද්දෘෂ්ට්වෛව රාමං ව්යසනේ නිමග්නම් ॥ 104 ॥
අහං පුනර්දේවකුමාරරූපමලංකෘතං තං සුතමාව්රජංතම් ।
නංදාමි පශ්යන්නපි දර්ශනේන භවාමි දෘෂ්ට්වෛව ච පුනර්යුවේව ॥ 105 ॥
විනාऽපි සූර්යේණ භවේත්ප්රවෘත්තිරවර්ෂතා වජ්රධරේණ වාऽපි ।
රාමං තු ගච්ඡංතමිත ස්සමීක්ෂ්ය ජීවේන්න කශ්චිත්ත්විති චේතනා මේ ॥ 106 ॥
විනාශකාමාමහිතාමමිත්රාමාවාසයං මෘත්යුමිවාත්මනස්ත්වාම් ।
චිරං බතාංකේන ධෘතාසි සර්පී මහාවිෂා තේන හතෝऽස්මි මෝහාත් ॥ 107 ॥
මයා ච රාමේණ ච ලක්ෂ්මණේන ප්රශාස්තු හීනෝ භරතස්ත්වයා සහ ।
පුරං ච රාෂ්ට්රං ච නිහත්ය බාංධවාන් මමාහිතානාං ච භවාභිහර්ෂිණී ॥ 108 ॥
නෘශංසවෘත්තේ ව්යසනප්රහාරිණි ප්රසහ්ය වාක්යං යදිහාද්ය භාෂසේ ।
න නාම තේ කේන මුඛාත්පතංත්යධෝ විශීර්යමාණා දශනා ස්සහස්රධා ॥ 109 ॥
න කිංචිදාහාහිතමප්රියං වචෝ න වේත්ති රාමඃ පරුෂාණි භාෂිතුම් ।
කථන්නු රාමේ හ්යභිරාමවාදිනි බ්රවීෂි දෝෂාන්ගුණනිත්යසම්මතේ ॥ 110 ॥
ප්රතාම්ය වා ප්රජ්වල වා ප්රණශ්ය වා සහස්රශෝ වා ස්ඵුටිතා මහීං ව්රජ ।
න තේ කරිෂ්යාමි වච ස්සුදාරුණං මමාහිතං කේකයරාජපාංසනි ॥ 111 ॥
ක්ෂුරෝපමාං නිත්යමසත්ප්රියංවදාං ප්රදුෂ්ටභාවාං ස්වකුලෝපඝාතිනීම් ।
න ජීවිතුං ත්වාං විෂහේऽමනෝරමාං දිධක්ෂමාණාං හෘදයං සබංධනම් ।
2.12,112 ।
න ජීවිතං මේऽස්ති පුනඃකුත ස්සුඛං විනාऽऽත්මජේනාऽත්මවතඃ කුතෝ රතිඃ ।
මමාහිතං දේවි න කර්තුමර්හසි ස්පෘශාමි පාදාවපි තේ ප්රසීද මේ ॥ 112 ॥
ස භූමිපාලෝ විලපන්නනාථවත්ස්ත්රියා ගෘහීතෝ හෘදයේऽතිමාත්රයා ।
පපාත දේව්යාශ්චරණෞ ප්රසාරිතාවුභාවසම්ස්පෘශ්ය යථාऽතුරස්තථා ॥ 113 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ද්වාදශස්සර්ගඃ ॥
