śrīmadvālmīkīya rāmāyaṇē ayōdhyākāṇḍam ।
atha pañchaviṃśassargaḥ ।
sā'vanīya tamāyāsamupaspṛśya jalaṃ śuchiḥ ।
chakāra mātā rāmasya maṅgalāni manasvinī ॥ 1 ॥
na śakyasē vārayituṃ gachChēdānīṃ raghūttama ।
śīghraṃ cha vinivartasva vartasva cha satāṃ kramē ॥ 2 ॥
yaṃ pālayasi dharmaṃ tvaṃ dhṛtyā cha niyamēna cha ।
sa vai rāghavaśārdūla dharmastvāmabhirakṣatu ॥ 3 ॥
yēbhyaḥ praṇamasē putra chaityēṣvāyatanēṣu cha ।
tē cha tvāmabhirakṣantu vanē saha maharṣibhiḥ ॥ 4 ॥
yāni dattāni tē'strāṇi viśvāmitrēṇa dhīmatā ।
tāni tvāmabhirakṣantu guṇaissamuditaṃ sadā ॥ 5 ॥
pitṛśuśrūṣayā putra mātṛśuśrūṣayā tathā ।
satyēna cha mahābāhō chiraṃ jīvābhirakṣitaḥ ॥ 6 ॥
samitkuśa pavitrāṇi vēdyaśchāyatanāni cha ।
sthaṇḍilāni vichitrāṇi śailā vṛkṣāḥ kṣupā hradāḥ ॥ 7 ॥
pataṅgāḥ pannagāssiṃhāstvāṃ rakṣantu narōttama ।
svastisādhyāścha viśvē cha marutaścha maharṣayaḥ ।
svasti dhātā vidhātā cha svasti pūṣā bhagō'ryamā ॥ 8 ॥
lōkapālāścha tē sarvē vāsavapramukhāstathā ।
ṛtavaśchaiva pakṣāścha māsā ssaṃvatsarāḥ kṣapāḥ ॥ 9 ॥
dināni cha muhūrtāścha svasti kurvantu tē sadā ।
smṛtirdhṛtiścha dharmaścha pātu tvāṃ putra sarvataḥ ॥ 10 ॥
skandaścha bhagavāndēva ssōmaścha sa bṛhaspatiḥ ।
saptarṣayō nāradaścha tē tvāṃ rakṣantu sarvataḥ ॥ 11 ॥
yāśchāpi sarvatassidhdā diśaścha sadigīśvarāḥ ।
stutā mayā vanē tasminpāntu tvāṃ putra nityaśaḥ ॥ 12 ॥
śailāssarvē samudrāścha rājā varuṇa ēva cha ।
dyaurantarikṣaṃ pṛthivī nadyassarvāstathaiva cha ॥ 13 ॥
nakṣatrāṇi cha sarvāṇi grahāścha sahadēvatāḥ ।
ahōrātrē tathā sandhyē pāntu tvāṃ vanamāśritam ॥ 14 ॥
ṛtavaśchaiva ṣaṭpuṇyā māsāssaṃvatsarāstathā ।
kalāścha kāṣṭhāścha tathā tava śarma diśantu tē ॥ 15 ॥
mahāvanē vicharatō munivēṣasya dhīmataḥ ।
tavādityāścha daityāścha bhavantu sukhadāssadā ॥ 16 ॥
rākṣasānāṃ piśāchānāṃ raudrāṇāṃ krūrakarmaṇām ।
kravyādānāṃ cha sarvēṣāṃ mā bhūtputraka tē bhayam ॥ 17 ॥
plavagā vṛśchikā daṃśāmaśakāśchaiva kānanē ।
sarīsṛpāścha kīṭāścha mā bhūvangahanē tava ॥ 18 ॥
mahādvipāścha siṃhāścha vyāghrā ṛkṣāścha daṃṣṭriṇaḥ ।
mahiṣā śśṛṅgiṇō raudrā na tē druhyantu putraka ॥ 19 ॥
nṛmāṃsabhōjanā raudrā yē chānyē satvajātayaḥ ।
mā cha tvāṃ hiṃsiṣuḥ putra mayā sampūjitāstviha ॥ 20 ॥
āgamāstē śivāssantu sidhyantu cha parākramāḥ ।
sarvasampattayē rāma svastimāngachCha putraka ॥ 21 ॥
svasti tē 'stvantarikṣēbhyaḥ pārthivēbhyaḥ punaḥ punaḥ ।
sarvēbhyaśchaiva dēvēbhyō yē cha vai paripanthinaḥ ॥ 22 ॥
gurussōmaścha sūryaścha dhanadō'tha yamastathā ।
pāntu tvāmarchitā rāma daṇḍakāraṇyavāsinam ॥ 23 ॥
agnirvāyustathā dhūmō mantrāścharṣimukhāchchyutāḥ ।
upasparśanakālē tu pāntu tvāṃ raghunandana ॥ 24 ॥
sarvalōkaprabhurbrahmā bhūtabhartā tatharṣayaḥ ।
yē cha śēṣāssurāstē tvāṃ rakṣantu vanavāsinam ॥ 25 ॥
iti mālyaissuragaṇāngandhaiśchāpi yaśasvinī ।
stutibhiśchānurūpābhirānarchā'yatalōchanā ॥ 26 ॥
jvalanaṃ samupādāya brāhmaṇēna mahātmanā ।
hāvayāmāsa vidhinā rāmamaṅgalakāraṇāt ॥ 27 ॥
ghṛtaṃ śvētāni mālyāni samidhaśśvētasarṣapān ।
upasampādayāmāsa kauśalyā paramāṅganā ॥ 28 ॥
upādhyāya ssavidhinā hutvā śāntimanāmayam ।
hutahavyāvaśēṣēṇa bāhyaṃ balimakalpayat ॥ 29 ॥
madhu dadhyakṣataghṛtaiḥ svastivāchyadvijāṃstataḥ ।
vāchayāmāsa rāmasya vanēsvastyayanakriyāḥ ॥ 30 ॥
tatastasmai dvijēndrāya rāmamātā yaśasvinī ।
dakṣiṇāṃ pradadau kāmyāṃ rāghavaṃ chēdamabravīt ॥ 31 ॥
yanmaṅgalaṃ sahasrākṣē sarvadēvanamaskṛtē ।
vṛtranāśē samabhavattattē bhavatu maṅgalam ॥ 32 ॥
yanmaṅgalaṃ suparṇasya vinatā'kalpayatpurā ।
amṛtaṃ prārthayānasya tattē bhavatu maṅgalam ॥ 33 ॥
amṛtōtpādanē daityān ghnatō vajradharasya yat ।
aditirmaṅgalaṃ prādāttattē bhavatu maṅgalam ॥ 34 ॥
trīnvikramānprakramatō viṣṇōramitatējasaḥ ।
yadāsīnmaṅgalaṃ rāma tattē bhavatu maṅgalam ॥ 35 ॥
ṛtavassāgarā dvīpā vēdā lōkā diśaścha tē ।
maṅgalāni mahābāhō diśantu śubhamaṅgalāḥ ॥ 36 ॥
iti putrasya śēṣāṃścha kṛtvā śirasi bhāminī ।
gandhaiśchāpi samālabhya rāmamāyatalōchanā ॥ 37 ॥
ōṣadhīṃ chāpi siddhārthāṃ viśalyakaraṇīṃ śubhām ।
chakāra rakṣāṃ kauśalyā mantrairabhijajāpa cha ॥ 38 ॥
uvāchātiprahṛṣṭēva sā duḥkhavaśavartinī ।
vāṅgmātrēṇa na bhāvēna vāchā'saṃsajjamānayā ॥ 39 ॥
ānamya mūrdhni chāghrāya pariṣvajya yaśasvinī ।
avadatputra siddhārthō gachCha rāma yathāsukham ॥ 40 ॥
arōgaṃ sarvasiddhārthamayōdhyāṃ punarāgatam ।
paśyāmi tvāṃ sukhaṃ vatsa susthitaṃ rājavartmani ॥ 41 ॥
praṇaṣṭaduḥkhasaṅkalpā harṣavidyōtitānanā ।
drakṣyāmi tvāṃ vanātprāptaṃ pūrṇachandramivōditam ॥ 42 ॥
bhadrāsanagataṃ rāma vanavāsādihāgatam ।
drakṣyāmi cha punastvāṃ tu tīrṇavantaṃ piturvachaḥ ॥ 43 ॥
maṅgalairupasapannō vanavāsādihāgataḥ ।
vadhvā mama cha nityaṃ tvaṃ kāmānsaṃvardha yāhi bhōḥ ॥ 44 ॥
mayā'rchitā dēvagaṇāśśivādayō maharṣayō bhūtamahāsurōragāḥ ।
abhiprayātasya vanaṃ chirāya tē hitāni kāṅkṣantu diśaścha rāghava ॥ 45 ॥
itīva sā'śrupratipūrṇalōchanā samāpya cha svastyayanaṃ yathāvidhi ।
pradakṣiṇaṃ chaiva chakāra rāghavaṃ punaḥ punaśchāpi nipīḍya sasvajē ॥ 46 ॥
tathā tu dēvyā sa kṛtapradakṣiṇō nipīḍya mātuścharaṇau punaḥ punaḥ ।
jagāma sītānilayaṃ mahāyaśā ssa rāghavaḥ prajvalita ssvayā śriyā ॥ 47 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē pañchaviṃśassargaḥ ॥
