ශ්රීමද්වාල්මීකීය රාමායණේ අයෝධ්යාකාංඩම් ।
අථ පංචවිංශස්සර්ගඃ ।
සාऽවනීය තමායාසමුපස්පෘශ්ය ජලං ශුචිඃ ।
චකාර මාතා රාමස්ය මංගලානි මනස්විනී ॥ 1 ॥
න ශක්යසේ වාරයිතුං ගච්ඡේදානීං රඝූත්තම ।
ශීඝ්රං ච විනිවර්තස්ව වර්තස්ව ච සතාං ක්රමේ ॥ 2 ॥
යං පාලයසි ධර්මං ත්වං ධෘත්යා ච නියමේන ච ।
ස වෛ රාඝවශාර්දූල ධර්මස්ත්වාමභිරක්ෂතු ॥ 3 ॥
යේභ්යඃ ප්රණමසේ පුත්ර චෛත්යේෂ්වායතනේෂු ච ।
තේ ච ත්වාමභිරක්ෂංතු වනේ සහ මහර්ෂිභිඃ ॥ 4 ॥
යානි දත්තානි තේऽස්ත්රාණි විශ්වාමිත්රේණ ධීමතා ।
තානි ත්වාමභිරක්ෂංතු ගුණෛස්සමුදිතං සදා ॥ 5 ॥
පිතෘශුශ්රූෂයා පුත්ර මාතෘශුශ්රූෂයා තථා ।
සත්යේන ච මහාබාහෝ චිරං ජීවාභිරක්ෂිතඃ ॥ 6 ॥
සමිත්කුශ පවිත්රාණි වේද්යශ්චායතනානි ච ।
ස්ථංඩිලානි විචිත්රාණි ශෛලා වෘක්ෂාඃ ක්ෂුපා හ්රදාඃ ॥ 7 ॥
පතංගාඃ පන්නගාස්සිංහාස්ත්වාං රක්ෂංතු නරෝත්තම ।
ස්වස්තිසාධ්යාශ්ච විශ්වේ ච මරුතශ්ච මහර්ෂයඃ ।
ස්වස්ති ධාතා විධාතා ච ස්වස්ති පූෂා භගෝऽර්යමා ॥ 8 ॥
ලෝකපාලාශ්ච තේ සර්වේ වාසවප්රමුඛාස්තථා ।
ඍතවශ්චෛව පක්ෂාශ්ච මාසා ස්සංවත්සරාඃ ක්ෂපාඃ ॥ 9 ॥
දිනානි ච මුහූර්තාශ්ච ස්වස්ති කුර්වංතු තේ සදා ।
ස්මෘතිර්ධෘතිශ්ච ධර්මශ්ච පාතු ත්වාං පුත්ර සර්වතඃ ॥ 10 ॥
ස්කංදශ්ච භගවාංදේව ස්සෝමශ්ච ස බෘහස්පතිඃ ।
සප්තර්ෂයෝ නාරදශ්ච තේ ත්වාං රක්ෂංතු සර්වතඃ ॥ 11 ॥
යාශ්චාපි සර්වතස්සිධ්දා දිශශ්ච සදිගීශ්වරාඃ ।
ස්තුතා මයා වනේ තස්මින්පාංතු ත්වාං පුත්ර නිත්යශඃ ॥ 12 ॥
ශෛලාස්සර්වේ සමුද්රාශ්ච රාජා වරුණ ඒව ච ।
ද්යෞරංතරික්ෂං පෘථිවී නද්යස්සර්වාස්තථෛව ච ॥ 13 ॥
නක්ෂත්රාණි ච සර්වාණි ග්රහාශ්ච සහදේවතාඃ ।
අහෝරාත්රේ තථා සංධ්යේ පාංතු ත්වාං වනමාශ්රිතම් ॥ 14 ॥
ඍතවශ්චෛව ෂට්පුණ්යා මාසාස්සංවත්සරාස්තථා ।
කලාශ්ච කාෂ්ඨාශ්ච තථා තව ශර්ම දිශංතු තේ ॥ 15 ॥
මහාවනේ විචරතෝ මුනිවේෂස්ය ධීමතඃ ।
තවාදිත්යාශ්ච දෛත්යාශ්ච භවංතු සුඛදාස්සදා ॥ 16 ॥
රාක්ෂසානාං පිශාචානාං රෞද්රාණාං ක්රූරකර්මණාම් ।
ක්රව්යාදානාං ච සර්වේෂාං මා භූත්පුත්රක තේ භයම් ॥ 17 ॥
ප්ලවගා වෘශ්චිකා දංශාමශකාශ්චෛව කානනේ ।
සරීසෘපාශ්ච කීටාශ්ච මා භූවන්ගහනේ තව ॥ 18 ॥
මහාද්විපාශ්ච සිංහාශ්ච ව්යාඝ්රා ඍක්ෂාශ්ච දංෂ්ට්රිණඃ ।
මහිෂා ශ්ශෘංගිණෝ රෞද්රා න තේ ද්රුහ්යංතු පුත්රක ॥ 19 ॥
නෘමාංසභෝජනා රෞද්රා යේ චාන්යේ සත්වජාතයඃ ।
මා ච ත්වාං හිංසිෂුඃ පුත්ර මයා සංපූජිතාස්ත්විහ ॥ 20 ॥
ආගමාස්තේ ශිවාස්සංතු සිධ්යංතු ච පරාක්රමාඃ ।
සර්වසංපත්තයේ රාම ස්වස්තිමාන්ගච්ඡ පුත්රක ॥ 21 ॥
ස්වස්ති තේ ऽස්ත්වංතරික්ෂේභ්යඃ පාර්ථිවේභ්යඃ පුනඃ පුනඃ ।
සර්වේභ්යශ්චෛව දේවේභ්යෝ යේ ච වෛ පරිපංථිනඃ ॥ 22 ॥
ගුරුස්සෝමශ්ච සූර්යශ්ච ධනදෝऽථ යමස්තථා ।
පාංතු ත්වාමර්චිතා රාම දංඩකාරණ්යවාසිනම් ॥ 23 ॥
අග්නිර්වායුස්තථා ධූමෝ මංත්රාශ්චර්ෂිමුඛාච්ච්යුතාඃ ।
උපස්පර්ශනකාලේ තු පාංතු ත්වාං රඝුනංදන ॥ 24 ॥
සර්වලෝකප්රභුර්බ්රහ්මා භූතභර්තා තථර්ෂයඃ ।
යේ ච ශේෂාස්සුරාස්තේ ත්වාං රක්ෂංතු වනවාසිනම් ॥ 25 ॥
ඉති මාල්යෛස්සුරගණාන්ගංධෛශ්චාපි යශස්විනී ।
ස්තුතිභිශ්චානුරූපාභිරානර්චාऽයතලෝචනා ॥ 26 ॥
ජ්වලනං සමුපාදාය බ්රාහ්මණේන මහාත්මනා ।
හාවයාමාස විධිනා රාමමංගලකාරණාත් ॥ 27 ॥
ඝෘතං ශ්වේතානි මාල්යානි සමිධශ්ශ්වේතසර්ෂපාන් ।
උපසංපාදයාමාස කෞශල්යා පරමාංගනා ॥ 28 ॥
උපාධ්යාය ස්සවිධිනා හුත්වා ශාංතිමනාමයම් ।
හුතහව්යාවශේෂේණ බාහ්යං බලිමකල්පයත් ॥ 29 ॥
මධු දධ්යක්ෂතඝෘතෛඃ ස්වස්තිවාච්යද්විජාංස්තතඃ ।
වාචයාමාස රාමස්ය වනේස්වස්ත්යයනක්රියාඃ ॥ 30 ॥
තතස්තස්මෛ ද්විජේංද්රාය රාමමාතා යශස්විනී ।
දක්ෂිණාං ප්රදදෞ කාම්යාං රාඝවං චේදමබ්රවීත් ॥ 31 ॥
යන්මංගලං සහස්රාක්ෂේ සර්වදේවනමස්කෘතේ ।
වෘත්රනාශේ සමභවත්තත්තේ භවතු මංගලම් ॥ 32 ॥
යන්මංගලං සුපර්ණස්ය විනතාऽකල්පයත්පුරා ।
අමෘතං ප්රාර්ථයානස්ය තත්තේ භවතු මංගලම් ॥ 33 ॥
අමෘතෝත්පාදනේ දෛත්යාන් ඝ්නතෝ වජ්රධරස්ය යත් ।
අදිතිර්මංගලං ප්රාදාත්තත්තේ භවතු මංගලම් ॥ 34 ॥
ත්රීන්වික්රමාන්ප්රක්රමතෝ විෂ්ණෝරමිතතේජසඃ ।
යදාසීන්මංගලං රාම තත්තේ භවතු මංගලම් ॥ 35 ॥
ඍතවස්සාගරා ද්වීපා වේදා ලෝකා දිශශ්ච තේ ।
මංගලානි මහාබාහෝ දිශංතු ශුභමංගලාඃ ॥ 36 ॥
ඉති පුත්රස්ය ශේෂාංශ්ච කෘත්වා ශිරසි භාමිනී ।
ගංධෛශ්චාපි සමාලභ්ය රාමමායතලෝචනා ॥ 37 ॥
ඕෂධීං චාපි සිද්ධාර්ථාං විශල්යකරණීං ශුභාම් ।
චකාර රක්ෂාං කෞශල්යා මංත්රෛරභිජජාප ච ॥ 38 ॥
උවාචාතිප්රහෘෂ්ටේව සා දුඃඛවශවර්තිනී ।
වාංග්මාත්රේණ න භාවේන වාචාऽසංසජ්ජමානයා ॥ 39 ॥
ආනම්ය මූර්ධ්නි චාඝ්රාය පරිෂ්වජ්ය යශස්විනී ।
අවදත්පුත්ර සිද්ධාර්ථෝ ගච්ඡ රාම යථාසුඛම් ॥ 40 ॥
අරෝගං සර්වසිද්ධාර්ථමයෝධ්යාං පුනරාගතම් ।
පශ්යාමි ත්වාං සුඛං වත්ස සුස්ථිතං රාජවර්ත්මනි ॥ 41 ॥
ප්රණෂ්ටදුඃඛසංකල්පා හර්ෂවිද්යෝතිතානනා ।
ද්රක්ෂ්යාමි ත්වාං වනාත්ප්රාප්තං පූර්ණචංද්රමිවෝදිතම් ॥ 42 ॥
භද්රාසනගතං රාම වනවාසාදිහාගතම් ।
ද්රක්ෂ්යාමි ච පුනස්ත්වාං තු තීර්ණවංතං පිතුර්වචඃ ॥ 43 ॥
මංගලෛරුපසපන්නෝ වනවාසාදිහාගතඃ ।
වධ්වා මම ච නිත්යං ත්වං කාමාන්සංවර්ධ යාහි භෝඃ ॥ 44 ॥
මයාऽර්චිතා දේවගණාශ්ශිවාදයෝ මහර්ෂයෝ භූතමහාසුරෝරගාඃ ।
අභිප්රයාතස්ය වනං චිරාය තේ හිතානි කාංක්ෂංතු දිශශ්ච රාඝව ॥ 45 ॥
ඉතීව සාऽශ්රුප්රතිපූර්ණලෝචනා සමාප්ය ච ස්වස්ත්යයනං යථාවිධි ।
ප්රදක්ෂිණං චෛව චකාර රාඝවං පුනඃ පුනශ්චාපි නිපීඩ්ය සස්වජේ ॥ 46 ॥
තථා තු දේව්යා ස කෘතප්රදක්ෂිණෝ නිපීඩ්ය මාතුශ්චරණෞ පුනඃ පුනඃ ।
ජගාම සීතානිලයං මහායශා ස්ස රාඝවඃ ප්රජ්වලිත ස්ස්වයා ශ්රියා ॥ 47 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ පංචවිංශස්සර්ගඃ ॥
