శ్రీమద్వాల్మీకీయ రామాయణే అయోధ్యాకాండమ్ ।
అథ పంచవింశస్సర్గః ।
సాఽవనీయ తమాయాసముపస్పృశ్య జలం శుచిః ।
చకార మాతా రామస్య మంగలాని మనస్వినీ ॥ 1 ॥
న శక్యసే వారయితుం గచ్ఛేదానీం రఘూత్తమ ।
శీఘ్రం చ వినివర్తస్వ వర్తస్వ చ సతాం క్రమే ॥ 2 ॥
యం పాలయసి ధర్మం త్వం ధృత్యా చ నియమేన చ ।
స వై రాఘవశార్దూల ధర్మస్త్వామభిరక్షతు ॥ 3 ॥
యేభ్యః ప్రణమసే పుత్ర చైత్యేష్వాయతనేషు చ ।
తే చ త్వామభిరక్షంతు వనే సహ మహర్షిభిః ॥ 4 ॥
యాని దత్తాని తేఽస్త్రాణి విశ్వామిత్రేణ ధీమతా ।
తాని త్వామభిరక్షంతు గుణైస్సముదితం సదా ॥ 5 ॥
పితృశుశ్రూషయా పుత్ర మాతృశుశ్రూషయా తథా ।
సత్యేన చ మహాబాహో చిరం జీవాభిరక్షితః ॥ 6 ॥
సమిత్కుశ పవిత్రాణి వేద్యశ్చాయతనాని చ ।
స్థండిలాని విచిత్రాణి శైలా వృక్షాః క్షుపా హ్రదాః ॥ 7 ॥
పతంగాః పన్నగాస్సింహాస్త్వాం రక్షంతు నరోత్తమ ।
స్వస్తిసాధ్యాశ్చ విశ్వే చ మరుతశ్చ మహర్షయః ।
స్వస్తి ధాతా విధాతా చ స్వస్తి పూషా భగోఽర్యమా ॥ 8 ॥
లోకపాలాశ్చ తే సర్వే వాసవప్రముఖాస్తథా ।
ఋతవశ్చైవ పక్షాశ్చ మాసా స్సంవత్సరాః క్షపాః ॥ 9 ॥
దినాని చ ముహూర్తాశ్చ స్వస్తి కుర్వంతు తే సదా ।
స్మృతిర్ధృతిశ్చ ధర్మశ్చ పాతు త్వాం పుత్ర సర్వతః ॥ 10 ॥
స్కందశ్చ భగవాందేవ స్సోమశ్చ స బృహస్పతిః ।
సప్తర్షయో నారదశ్చ తే త్వాం రక్షంతు సర్వతః ॥ 11 ॥
యాశ్చాపి సర్వతస్సిధ్దా దిశశ్చ సదిగీశ్వరాః ।
స్తుతా మయా వనే తస్మిన్పాంతు త్వాం పుత్ర నిత్యశః ॥ 12 ॥
శైలాస్సర్వే సముద్రాశ్చ రాజా వరుణ ఏవ చ ।
ద్యౌరంతరిక్షం పృథివీ నద్యస్సర్వాస్తథైవ చ ॥ 13 ॥
నక్షత్రాణి చ సర్వాణి గ్రహాశ్చ సహదేవతాః ।
అహోరాత్రే తథా సంధ్యే పాంతు త్వాం వనమాశ్రితమ్ ॥ 14 ॥
ఋతవశ్చైవ షట్పుణ్యా మాసాస్సంవత్సరాస్తథా ।
కలాశ్చ కాష్ఠాశ్చ తథా తవ శర్మ దిశంతు తే ॥ 15 ॥
మహావనే విచరతో మునివేషస్య ధీమతః ।
తవాదిత్యాశ్చ దైత్యాశ్చ భవంతు సుఖదాస్సదా ॥ 16 ॥
రాక్షసానాం పిశాచానాం రౌద్రాణాం క్రూరకర్మణామ్ ।
క్రవ్యాదానాం చ సర్వేషాం మా భూత్పుత్రక తే భయమ్ ॥ 17 ॥
ప్లవగా వృశ్చికా దంశామశకాశ్చైవ కాననే ।
సరీసృపాశ్చ కీటాశ్చ మా భూవన్గహనే తవ ॥ 18 ॥
మహాద్విపాశ్చ సింహాశ్చ వ్యాఘ్రా ఋక్షాశ్చ దంష్ట్రిణః ।
మహిషా శ్శృంగిణో రౌద్రా న తే ద్రుహ్యంతు పుత్రక ॥ 19 ॥
నృమాంసభోజనా రౌద్రా యే చాన్యే సత్వజాతయః ।
మా చ త్వాం హింసిషుః పుత్ర మయా సంపూజితాస్త్విహ ॥ 20 ॥
ఆగమాస్తే శివాస్సంతు సిధ్యంతు చ పరాక్రమాః ।
సర్వసంపత్తయే రామ స్వస్తిమాన్గచ్ఛ పుత్రక ॥ 21 ॥
స్వస్తి తే ఽస్త్వంతరిక్షేభ్యః పార్థివేభ్యః పునః పునః ।
సర్వేభ్యశ్చైవ దేవేభ్యో యే చ వై పరిపంథినః ॥ 22 ॥
గురుస్సోమశ్చ సూర్యశ్చ ధనదోఽథ యమస్తథా ।
పాంతు త్వామర్చితా రామ దండకారణ్యవాసినమ్ ॥ 23 ॥
అగ్నిర్వాయుస్తథా ధూమో మంత్రాశ్చర్షిముఖాచ్చ్యుతాః ।
ఉపస్పర్శనకాలే తు పాంతు త్వాం రఘునందన ॥ 24 ॥
సర్వలోకప్రభుర్బ్రహ్మా భూతభర్తా తథర్షయః ।
యే చ శేషాస్సురాస్తే త్వాం రక్షంతు వనవాసినమ్ ॥ 25 ॥
ఇతి మాల్యైస్సురగణాన్గంధైశ్చాపి యశస్వినీ ।
స్తుతిభిశ్చానురూపాభిరానర్చాఽయతలోచనా ॥ 26 ॥
జ్వలనం సముపాదాయ బ్రాహ్మణేన మహాత్మనా ।
హావయామాస విధినా రామమంగలకారణాత్ ॥ 27 ॥
ఘృతం శ్వేతాని మాల్యాని సమిధశ్శ్వేతసర్షపాన్ ।
ఉపసంపాదయామాస కౌశల్యా పరమాంగనా ॥ 28 ॥
ఉపాధ్యాయ స్సవిధినా హుత్వా శాంతిమనామయమ్ ।
హుతహవ్యావశేషేణ బాహ్యం బలిమకల్పయత్ ॥ 29 ॥
మధు దధ్యక్షతఘృతైః స్వస్తివాచ్యద్విజాంస్తతః ।
వాచయామాస రామస్య వనేస్వస్త్యయనక్రియాః ॥ 30 ॥
తతస్తస్మై ద్విజేంద్రాయ రామమాతా యశస్వినీ ।
దక్షిణాం ప్రదదౌ కామ్యాం రాఘవం చేదమబ్రవీత్ ॥ 31 ॥
యన్మంగలం సహస్రాక్షే సర్వదేవనమస్కృతే ।
వృత్రనాశే సమభవత్తత్తే భవతు మంగలమ్ ॥ 32 ॥
యన్మంగలం సుపర్ణస్య వినతాఽకల్పయత్పురా ।
అమృతం ప్రార్థయానస్య తత్తే భవతు మంగలమ్ ॥ 33 ॥
అమృతోత్పాదనే దైత్యాన్ ఘ్నతో వజ్రధరస్య యత్ ।
అదితిర్మంగలం ప్రాదాత్తత్తే భవతు మంగలమ్ ॥ 34 ॥
త్రీన్విక్రమాన్ప్రక్రమతో విష్ణోరమితతేజసః ।
యదాసీన్మంగలం రామ తత్తే భవతు మంగలమ్ ॥ 35 ॥
ఋతవస్సాగరా ద్వీపా వేదా లోకా దిశశ్చ తే ।
మంగలాని మహాబాహో దిశంతు శుభమంగలాః ॥ 36 ॥
ఇతి పుత్రస్య శేషాంశ్చ కృత్వా శిరసి భామినీ ।
గంధైశ్చాపి సమాలభ్య రామమాయతలోచనా ॥ 37 ॥
ఓషధీం చాపి సిద్ధార్థాం విశల్యకరణీం శుభామ్ ।
చకార రక్షాం కౌశల్యా మంత్రైరభిజజాప చ ॥ 38 ॥
ఉవాచాతిప్రహృష్టేవ సా దుఃఖవశవర్తినీ ।
వాంగ్మాత్రేణ న భావేన వాచాఽసంసజ్జమానయా ॥ 39 ॥
ఆనమ్య మూర్ధ్ని చాఘ్రాయ పరిష్వజ్య యశస్వినీ ।
అవదత్పుత్ర సిద్ధార్థో గచ్ఛ రామ యథాసుఖమ్ ॥ 40 ॥
అరోగం సర్వసిద్ధార్థమయోధ్యాం పునరాగతమ్ ।
పశ్యామి త్వాం సుఖం వత్స సుస్థితం రాజవర్త్మని ॥ 41 ॥
ప్రణష్టదుఃఖసంకల్పా హర్షవిద్యోతితాననా ।
ద్రక్ష్యామి త్వాం వనాత్ప్రాప్తం పూర్ణచంద్రమివోదితమ్ ॥ 42 ॥
భద్రాసనగతం రామ వనవాసాదిహాగతమ్ ।
ద్రక్ష్యామి చ పునస్త్వాం తు తీర్ణవంతం పితుర్వచః ॥ 43 ॥
మంగలైరుపసపన్నో వనవాసాదిహాగతః ।
వధ్వా మమ చ నిత్యం త్వం కామాన్సంవర్ధ యాహి భోః ॥ 44 ॥
మయాఽర్చితా దేవగణాశ్శివాదయో మహర్షయో భూతమహాసురోరగాః ।
అభిప్రయాతస్య వనం చిరాయ తే హితాని కాంక్షంతు దిశశ్చ రాఘవ ॥ 45 ॥
ఇతీవ సాఽశ్రుప్రతిపూర్ణలోచనా సమాప్య చ స్వస్త్యయనం యథావిధి ।
ప్రదక్షిణం చైవ చకార రాఘవం పునః పునశ్చాపి నిపీడ్య సస్వజే ॥ 46 ॥
తథా తు దేవ్యా స కృతప్రదక్షిణో నిపీడ్య మాతుశ్చరణౌ పునః పునః ।
జగామ సీతానిలయం మహాయశా స్స రాఘవః ప్రజ్వలిత స్స్వయా శ్రియా ॥ 47 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అయోధ్యాకాండే పంచవింశస్సర్గః ॥
