ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ ഏകോനപംചാശസ്സര്ഗഃ ।
രാമോഽപി രാത്രിശേഷേണ തേനൈവ മഹദംതരമ് ।
ജഗാമ പുരുഷവ്യാഘ്രഃ പിതുരാജ്ഞാമനുസ്മരന് ॥ 1 ॥
തഥൈവ ഗച്ഛതസ്തസ്യ വ്യപായാദ്രജനീ ശിവാ ।
ഉപാസ്യ ശിവാം സംധ്യാം വിഷയാംതം വ്യഗാഹത ॥ 2 ॥
ഗ്രാമാന് വികൃഷ്ടസീമാംതാന് പുഷ്പിതാനി വനാനി ച ।
പശ്യന്നതിയയൌ ശീഘ്രം ശനൈരിവ ഹയോത്തമൈഃ ॥ 3 ॥
ശൃണ്വന് വചോ മനുഷ്യാണാം ഗ്രാമസംവാസവാസിനാമ് ।
രാജാനം ധിഗ്ദശരഥം കാമസ്യ വശമാഗതമ് ॥ 4 ॥
ഹാ നൃശംസാദ്യ കൈകേയീ പാപാ പാപാനുബംധിനീ ।
തീക്ഷ്ണാ സംഭിന്നമര്യാദാ തീക്ഷ്ണകര്മണി വര്തതേ ॥ 5 ॥
യാ പുത്രമീദൃശം രാജ്ഞഃ പ്രവാസയതി ധാര്മികമ് ।
വനവാസേ മഹാപ്രാജ്ഞം സാനുക്രോശം ജിതേംദ്രിയമ് ॥ 6 ॥
കഥം നാമ മഹാഭാഗാ സീതാ ജനകനംദിനീ ।
സദാ സുഖേഷ്വഭിരതാ ദുഃഖാന്യനുഭവിഷ്യതി ॥ 7 ॥
അഹോ ദശരഥോ രാജാ നിസ്നേഹഃ സ്വസുതം പ്രിയമ് ।
പ്രജാനാമനഘം രാമം പരിത്യക്തുമിഹേച്ഛതി ॥ 8 ॥
ഏതാ വാചോ മനുഷ്യാണാം ഗ്രാമസംവാസവാസിനാമ് ।
ശൃണ്വന്നതിയയൌ വീരഃ കോസലാന് കോസലേശ്വരഃ ॥ 9 ॥
തതോ വേദശ്രുതിം നാമ ശിവവാരിവഹാം നദീമ് ।
ഉത്തീര്യാഭിമുഖഃ പ്രായാദഗസ്ത്യാധ്യുഷിതാം ദിശമ് ॥ 10 ॥
ഗത്വാ തു സുചിരം കാലം തതഃ ശീതജലാം നദീമ് ।
ഗോമതീം ഗോയുതാനൂപാമതരത്സാഗരംഗമാമ് ॥ 11 ॥
ഗോമതീം ചാപ്യതിക്രമ്യ രാഘവഃ ശീഘ്രഗൈര്ഹയൈഃ ।
മയൂരഹംസാഭിരുതാം തതാര സ്യംദികാം നദീമ് ॥ 12 ॥
സ മഹീം മനുനാ രാജ്ഞാ ദത്താമിക്ഷ്വാകവേ പുരാ ।
സ്ഫീതാം രാഷ്ട്രാവൃതാം രാമോ വൈദേഹീമന്വദര്ശയത് ॥ 13 ॥
കദാഽഹം പുനരാഗമ്യ സരയ്വാ പുഷ്പിതേ വനേ ।
മൃഗയാം പര്യടിഷ്യാമി മാത്രാ പിത്രാ ച സംഗതഃ ॥ 14 ॥
നാത്യര്ഥമഭികാംക്ഷാമി മൃഗയാം സരയൂവനേ ।
രതിര്ഹ്യേഷാതുലാ ലോകേ രാജര്ഷിഗണസമ്മതാ ॥ 15 ॥
രാജര്ഷീണാം ഹി ലോകേഽസ്മിന് രത്യര്ഥം മൃഗയാ വനേ ।
കാലേ കൃതാം താം മനുജൈര്ഘന്വിനാമഭികാംക്ഷിതാമ് ॥ 16 ॥
സ തമധ്വാനമൈക്ഷ്വാകസ്സൂതം മധുരയാ ഗിരാ ।
തം തമര്ഥമഭിപ്രേത്യ യയൌ വാക്യമുദീരയന് ॥ 17 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ ഏകോനപംചാശസ്സര്ഗഃ ॥
