śrīmadvālmīkīya rāmāyaṇē ayōdhyākāṇḍam ।
atha ēkōnapañchāśassargaḥ ।
rāmō'pi rātriśēṣēṇa tēnaiva mahadantaram ।
jagāma puruṣavyāghraḥ piturājñāmanusmaran ॥ 1 ॥
tathaiva gachChatastasya vyapāyādrajanī śivā ।
upāsya śivāṃ sandhyāṃ viṣayāntaṃ vyagāhata ॥ 2 ॥
grāmān vikṛṣṭasīmāntān puṣpitāni vanāni cha ।
paśyannatiyayau śīghraṃ śanairiva hayōttamaiḥ ॥ 3 ॥
śṛṇvan vachō manuṣyāṇāṃ grāmasaṃvāsavāsinām ।
rājānaṃ dhigdaśarathaṃ kāmasya vaśamāgatam ॥ 4 ॥
hā nṛśaṃsādya kaikēyī pāpā pāpānubandhinī ।
tīkṣṇā sambhinnamaryādā tīkṣṇakarmaṇi vartatē ॥ 5 ॥
yā putramīdṛśaṃ rājñaḥ pravāsayati dhārmikam ।
vanavāsē mahāprājñaṃ sānukrōśaṃ jitēndriyam ॥ 6 ॥
kathaṃ nāma mahābhāgā sītā janakanandinī ।
sadā sukhēṣvabhiratā duḥkhānyanubhaviṣyati ॥ 7 ॥
ahō daśarathō rājā nisnēhaḥ svasutaṃ priyam ।
prajānāmanaghaṃ rāmaṃ parityaktumihēchChati ॥ 8 ॥
ētā vāchō manuṣyāṇāṃ grāmasaṃvāsavāsinām ।
śṛṇvannatiyayau vīraḥ kōsalān kōsalēśvaraḥ ॥ 9 ॥
tatō vēdaśrutiṃ nāma śivavārivahāṃ nadīm ।
uttīryābhimukhaḥ prāyādagastyādhyuṣitāṃ diśam ॥ 10 ॥
gatvā tu suchiraṃ kālaṃ tataḥ śītajalāṃ nadīm ।
gōmatīṃ gōyutānūpāmataratsāgaraṅgamām ॥ 11 ॥
gōmatīṃ chāpyatikramya rāghavaḥ śīghragairhayaiḥ ।
mayūrahaṃsābhirutāṃ tatāra syandikāṃ nadīm ॥ 12 ॥
sa mahīṃ manunā rājñā dattāmikṣvākavē purā ।
sphītāṃ rāṣṭrāvṛtāṃ rāmō vaidēhīmanvadarśayat ॥ 13 ॥
kadā'haṃ punarāgamya sarayvā puṣpitē vanē ।
mṛgayāṃ paryaṭiṣyāmi mātrā pitrā cha saṅgataḥ ॥ 14 ॥
nātyarthamabhikāṅkṣāmi mṛgayāṃ sarayūvanē ।
ratirhyēṣātulā lōkē rājarṣigaṇasammatā ॥ 15 ॥
rājarṣīṇāṃ hi lōkē'smin ratyarthaṃ mṛgayā vanē ।
kālē kṛtāṃ tāṃ manujairghanvināmabhikāṅkṣitām ॥ 16 ॥
sa tamadhvānamaikṣvākassūtaṃ madhurayā girā ।
taṃ tamarthamabhiprētya yayau vākyamudīrayan ॥ 17 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē ēkōnapañchāśassargaḥ ॥
