ශ්රීමද්වාල්මීකීය රාමායණේ අයෝධ්යාකාංඩම් ।
අථ ඒකෝනපංචාශස්සර්ගඃ ।
රාමෝऽපි රාත්රිශේෂේණ තේනෛව මහදංතරම් ।
ජගාම පුරුෂව්යාඝ්රඃ පිතුරාජ්ඤාමනුස්මරන් ॥ 1 ॥
තථෛව ගච්ඡතස්තස්ය ව්යපායාද්රජනී ශිවා ।
උපාස්ය ශිවාං සංධ්යාං විෂයාංතං ව්යගාහත ॥ 2 ॥
ග්රාමාන් විකෘෂ්ටසීමාංතාන් පුෂ්පිතානි වනානි ච ।
පශ්යන්නතියයෞ ශීඝ්රං ශනෛරිව හයෝත්තමෛඃ ॥ 3 ॥
ශෘණ්වන් වචෝ මනුෂ්යාණාං ග්රාමසංවාසවාසිනාම් ।
රාජානං ධිග්දශරථං කාමස්ය වශමාගතම් ॥ 4 ॥
හා නෘශංසාද්ය කෛකේයී පාපා පාපානුබංධිනී ।
තීක්ෂ්ණා සංභින්නමර්යාදා තීක්ෂ්ණකර්මණි වර්තතේ ॥ 5 ॥
යා පුත්රමීදෘශං රාජ්ඤඃ ප්රවාසයති ධාර්මිකම් ।
වනවාසේ මහාප්රාජ්ඤං සානුක්රෝශං ජිතේංද්රියම් ॥ 6 ॥
කථං නාම මහාභාගා සීතා ජනකනංදිනී ।
සදා සුඛේෂ්වභිරතා දුඃඛාන්යනුභවිෂ්යති ॥ 7 ॥
අහෝ දශරථෝ රාජා නිස්නේහඃ ස්වසුතං ප්රියම් ।
ප්රජානාමනඝං රාමං පරිත්යක්තුමිහේච්ඡති ॥ 8 ॥
ඒතා වාචෝ මනුෂ්යාණාං ග්රාමසංවාසවාසිනාම් ।
ශෘණ්වන්නතියයෞ වීරඃ කෝසලාන් කෝසලේශ්වරඃ ॥ 9 ॥
තතෝ වේදශ්රුතිං නාම ශිවවාරිවහාං නදීම් ।
උත්තීර්යාභිමුඛඃ ප්රායාදගස්ත්යාධ්යුෂිතාං දිශම් ॥ 10 ॥
ගත්වා තු සුචිරං කාලං තතඃ ශීතජලාං නදීම් ।
ගෝමතීං ගෝයුතානූපාමතරත්සාගරංගමාම් ॥ 11 ॥
ගෝමතීං චාප්යතික්රම්ය රාඝවඃ ශීඝ්රගෛර්හයෛඃ ।
මයූරහංසාභිරුතාං තතාර ස්යංදිකාං නදීම් ॥ 12 ॥
ස මහීං මනුනා රාජ්ඤා දත්තාමික්ෂ්වාකවේ පුරා ।
ස්ඵීතාං රාෂ්ට්රාවෘතාං රාමෝ වෛදේහීමන්වදර්ශයත් ॥ 13 ॥
කදාऽහං පුනරාගම්ය සරය්වා පුෂ්පිතේ වනේ ।
මෘගයාං පර්යටිෂ්යාමි මාත්රා පිත්රා ච සංගතඃ ॥ 14 ॥
නාත්යර්ථමභිකාංක්ෂාමි මෘගයාං සරයූවනේ ।
රතිර්හ්යේෂාතුලා ලෝකේ රාජර්ෂිගණසම්මතා ॥ 15 ॥
රාජර්ෂීණාං හි ලෝකේऽස්මින් රත්යර්ථං මෘගයා වනේ ।
කාලේ කෘතාං තාං මනුජෛර්ඝන්විනාමභිකාංක්ෂිතාම් ॥ 16 ॥
ස තමධ්වානමෛක්ෂ්වාකස්සූතං මධුරයා ගිරා ।
තං තමර්ථමභිප්රේත්ය යයෞ වාක්යමුදීරයන් ॥ 17 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ඒකෝනපංචාශස්සර්ගඃ ॥
