শ্রীমদ্বাল্মীকীয় রামাযণে অয়োধ্য়াকাংডম্ ।
অথ দ্বিপংচাশস্সর্গঃ ।
প্রভাতায়াং তু শর্বর্য়াং পৃথুবক্ষা মহাযশাঃ ।
উবাচ রামঃ সৌমিত্রিং লক্ষ্মণং শুভলক্ষণম্ ॥ 1 ॥
ভাস্করোদযকালোঽয়ং গতা ভগবতী নিশা ।
অসৌ সুকৃষ্ণো বিহগঃ কোকিলস্তাত কূজতি ॥ 2 ॥
বর্হিণানাং চ নির্ঘোষঃ শ্রূযতে নদতাং বনে ।
তরাম জাহ্নবীং সৌম্য় শীঘ্রগাং সাগরংগমাম্ ॥ 3 ॥
বিজ্ঞায় রামস্য় বচঃ সৌমিত্রির্মিত্রনংদনঃ ।
গুহমামংত্র্য় সূতং চ সোঽতিষ্ঠদ্ভ্রাতুরগ্রতঃ ॥ 4 ॥
স তু রামস্য় বচনং নিশম্য় প্রতিগৃহ্য় চ ।
স্থপতিস্তূর্ণমাহূয় সচিবানিদমব্রবীত্ ॥ 5 ॥
অস্য় বাহনসংয়ুক্তাং কর্ণগ্রাহবতীং শুভাম্ ।
সুপ্রতারাং দৃঢাং তীর্থে শীঘ্রং নাবমুপাহর ॥ 6 ॥
তং নিশম্য় সমাদেশং গুহামাত্যগণো মহান্ ।
উপোহ্য় রুচিরাং নাবং গুহায় প্রত্যবেদযত্ ॥ 7 ॥
ততঃ স প্রাংজলির্ভূত্বা গুহো রাঘবমব্রবীত্ ।
উপস্থিতেয়ং নৌর্দেব ভূয়ঃ কিং করবাণি তে ॥ 8 ॥
তবামরসুতপ্রখ্য় তর্তুং সাগরগাং নদীম্ ।
নৌরিয়ং পুরুষব্য়াঘ্র তাং ত্বমারোহ সুব্রত ॥ 9 ॥
অথোবাচ মহাতেজা রামো গুহমিদং বচঃ ।
কৃতকামোঽস্মি ভবতা শীঘ্রমারোপ্যতামিতি ॥ 10 ॥
ততঃ কলাপান্ সন্নহ্য় খড্গৌ বধ্বা চ ধন্বিনৌ ।
জগ্মতুর্য়েন তৌ গংগাং সীতয়া সহ রাঘবৌ ॥ 11 ॥
রামমেব তু ধর্মজ্ঞমুপগম্য় বিনীতবত্ ।
কিমহং করবাণীতি সূতঃ প্রাংজলিরব্রবীত্ ॥ 12 ॥
ততোঽব্রবীদ্দাশরথিঃ সুমংত্রং স্পৃশন্ করেণোত্তমদক্ষিণেন ।
সুমংত্র শীঘ্রং পুনরেব যাহি রাজ্ঞঃ সকাশে ভব চাপ্রমত্তঃ ॥ 13 ॥
নিবর্তস্বেত্য়ুবাচৈব হ্য়েতাবদ্ধি কৃতং মম ।
রথং বিহায় পদ্ভ্য়াং তু গমিষ্য়ামি মহাবনম্ ॥ 14 ॥
আত্মানং ত্বভ্যনুজ্ঞাতমবেক্ষ্য়ার্তঃ স সারথিঃ ।
সুমংত্রঃ পুরুষব্য়াঘ্রমৈক্ষ্বাকমিদমব্রবীত্ ॥ 15 ॥
নাতিক্রাংতমিদং লোকে পুরুষেণেহ কেনচিত্ ।
তব সভ্রাতৃভার্যস্য় বাসঃ প্রাকৃতবদ্বনে ॥ 16 ॥
ন মন্য়ে ব্রহ্মচর্য়েঽস্তি স্বধীতে বা ফলোদয়ঃ ।
মার্দবার্জবয়োর্বাপি ত্বাং চেদ্ব্যসনমাগতম্ ॥ 17 ॥
সহ রাঘব বৈদেহ্য়া ভ্রাত্রা চৈব বনে বসন্ ।
ত্বং গতিং প্রাপ্স্যসে বীর ত্রীন্ লোকাংস্তু জযন্নিব ॥ 18 ॥
বয়ং খলু হতা রাম যে ত্বয়াপ্য়ুপবংচিতাঃ ।
কৈকেয়্য়া বশমেষ্য়ামঃ পাপায়া দুঃখভাগিনঃ ॥ 19 ॥
ইতি ব্রুবন্নাত্মসমং সুমংত্রঃ সারথিস্তদা ।
দৃষ্ট্বা দূরগতং রামং দুঃখার্তো রুরুদে চিরম্ ॥ 20 ॥
ততস্তু বিগতে বাষ্পে সূতং স্পৃষ্টোদকং শুচিম্ ।
রামস্তু মধুরং বাক্য়ং পুনঃ পুনরুবাচ তম্ ॥ 21 ॥
ইক্ষ্বাকূণাং ত্বয়া তুল্য়ং সুহৃদং নোপলক্ষয়ে ।
যথা দশরথো রাজা মাং ন শোচেত্তথা কুরু ॥ 22 ॥
শোকোপহতচেতাশ্চ বৃদ্ধশ্চ জগতীপতিঃ ।
কামভাবাবসন্নশ্চ তস্মাদেতদ্ব্রবীমি তে ॥ 23 ॥
যদ্যদাজ্ঞাপয়েত্কিংচিত্স মহাত্মা মহীপতিঃ ।
কৈকেয়্য়াঃ প্রিযকামার্থং কার্য়ং তদবিকাংক্ষয়া ॥ 24 ॥
এতদর্থং হি রাজ্য়ানি প্রশাসতি নরেশ্বরাঃ ।
যদেষাং সর্বকৃত্য়েষু মনো ন প্রতিহন্যতে ॥ 25 ॥
যদ্যথা স মহারাজো নালীকমধিগচ্ছতি ।
ন চ তাম্যতি দুঃখেন সুমংত্র কুরু তত্তথা ॥ 26 ॥
অদৃষ্টদুঃখং রাজানং বৃদ্ধমার্য়ং জিতেংদ্রিযম্ ।
ব্রূয়াস্ত্বমভিবাদ্য়ৈব মম হেতোরিদং বচঃ ॥ 27 ॥
নৈবাহমনুশোচামি লক্ষ্মণো ন চ মৈথিলী ।
অয়োধ্য়ায়াশ্চ্য়ুতাশ্চেতি বনে বত্স্য়ামহেতি চ ॥ 28 ॥
চতুর্দশসু বর্ষেষু নিবৃত্তেষু পুনঃ পুনঃ ।
লক্ষ্মণং মাং চ সীতাং চ দ্রক্ষ্যসে ক্ষিপ্রমাগতান্ ॥ 29 ॥
এবমুক্ত্বা তু রাজানং মাতরং চ সুমংত্র মে ।
অন্য়াশ্চ দেবীস্সহিতাঃ কৈকেয়ীং চ পুনঃ পুনঃ ॥ 30 ॥
আরোগ্য়ং ব্রূহি কৌশল্য়ামথ পাদাভিবংদনম্ ।
সীতায়া মম চাঽঽর্যস্য় বচনাল্লক্ষ্মণস্য় চ ॥ 31 ॥
ব্রূয়াশ্চ হি মহারাজং ভরতং ক্ষিপ্রমানয় ।
আগতশ্চাপি ভরতঃ স্থাপ্য়ো নৃপমতে পদে ॥ 32 ॥
ভরতং চ পরিষ্বজ্য় যৌবরাজ্য়েঽভিষিচ্য় চ ।
অস্মত্সংতাপজং দুঃখং ন ত্বামভিভবিষ্যতি ॥ 33 ॥
ভরতশ্চাপি বক্তব্য়ো যথা রাজনি বর্তসে ।
তথা মাতৃষু বর্তেথাঃ সর্বাস্বেবাবিশেষতঃ ॥ 34 ॥
তাতস্য় প্রিযকামেন যৌবরাজ্যমপেক্ষতা ।
লোকয়োরুভয়োঃ শক্য়ং ত্বয়া যত্সুখমেধিতুম্ ॥ 35 ॥
নিবর্ত্যমানো রামেণ সুমংত্রঃ শোককর্শিতঃ ।
তত্সর্বং বচনং শ্রুত্বা স্নেহাত্কাকুত্স্থমব্রবীত্ ॥ 36 ॥
যদহং নোপচারেণ ব্রূয়াং স্নেহাদবিক্লবঃ ।
ভক্তিমানিতি তত্তাবদ্বাক্য়ং ত্বং ক্ষংতুমর্হসি ॥ 37 ॥
কথং হি ত্বদ্বিহীনোঽহং প্রতিয়াস্য়ামি তাং পুরীম্ ।
তব তাবদ্বিয়োগেন পুত্রশোকাকুলামিব ॥ 38 ॥
সরামমপি তাবন্মে রথং দৃষ্ট্বা তদা জনঃ ।
বিনা রামং রথং দৃষ্ট্বা বিদীর্য়েতাপি সা পুরী ॥ 39 ॥
দৈন্য়ং হি নগরী গচ্ছেদ্দৃষ্ট্বা শূন্যমিমং রথম্ ।
সূতাবশেষং স্বং সৈন্য়ং হতবীরমিবাঽহবে ॥ 40 ॥
দূরেঽপি নিবসংতং ত্বাং মানসেনাগ্রতঃ স্থিতম্ ।
চিংতয়ংতোঽদ্য় নূনং ত্বাং নিরাহারাঃ কৃতাঃ প্রজাঃ ॥ 41 ॥
দৃষ্টং তদ্ধি ত্বয়া রাম যাদৃশং ত্বত্প্রবাসনে ।
প্রজানাং সংকুলং বৃত্তং ত্বচ্ছোকক্লাংতচেতসাম্ ॥ 42 ॥
আর্তনাদো হি যঃ পৌরৈর্মুক্তস্ত্বদ্বিপ্রবাসনে ।
সরথং মাং নিশাম্য়ৈব কুর্য়ুঃ শতগুণং ততঃ ॥ 43 ॥
অহং কিং চাপি বক্ষ্য়ামি দেবীং তব সুতো ময়া ।
নীতোঽসৌ মাতুলকুলং সংতাপং মা কৃথা ইতি ॥ 44 ॥
অসত্যমপি নৈবাহং ব্রূয়াং বচনমীদৃশম্ ।
কথমপ্রিযমেবাহং ব্রূয়াং সত্যমিদং বচঃ ॥ 45 ॥
মম তাবন্নিয়োগস্থাস্ত্বদ্বংধুজনবাহিনঃ ।
কথং রথং ত্বয়া হীনং প্রবক্ষ্য়ংতি হয়োত্তমাঃ ॥ 46 ॥
তন্ন শক্ষ্য়াম্যহং গংতুময়োধ্য়াং ত্বদৃতেঽনঘ ।
বনবাসানুয়ানায় মামনুজ্ঞাতুমর্হসি ॥ 47 ॥
যদি মে যাচমানস্য় ত্য়াগমেব করিষ্যসি ।
সরথোঽগ্নিং প্রবেক্ষ্য়ামি ত্যক্তমাত্র ইহ ত্বয়া ॥ 48 ॥
ভবিষ্য়ংতি বনে যানি তপোবিঘ্নকরাণি তে ।
রথেন প্রতিবাধিষ্য়ে তানি সত্ত্বানি রাঘব ॥ 49 ॥
ত্বত্কৃতে ন ময়াঽবাপ্তং রথচর্য়াকৃতং সুখম্ ।
আশংসে ত্বত্কৃতে নাহং বনবাসকৃতং সুখম্ ॥ 50 ॥
প্রসীদেচ্ছামি তেঽরণ্য়ে ভবিতুং প্রত্যনংতরঃ ।
প্রীত্য়াঽভিহিতমিচ্ছামি ভব মে প্রত্যনংতরঃ ॥ 51 ॥
ইমে চাপি হয়া বীর যদি তে বনবাসিনঃ ।
পরিচর্য়াং করিষ্য়ংতি প্রাপ্স্য়ংতি পরমাং গতিম্ ॥ 52 ॥
তব শুশ্রূষণং মূর্ধ্না করিষ্য়ামি বনে বসন্ ।
অয়োধ্য়াং দেবলোকং বা সর্বথা প্রজহাম্যহম্ ॥ 53 ॥
ন হি শক্য়া প্রবেষ্টুং সা ময়াঽয়োধ্য়া ত্বয়া বিনা ।
রাজধানী মহেংদ্রস্য় যথা দুষ্কৃতকর্মণা ॥ 54 ॥
বনবাসে ক্ষয়ং প্রাপ্তে মমৈষ হি মনোরথঃ ।
যদনেন রথেনৈব ত্বাং বহেয়ং পুরীং পুনঃ ॥ 55 ॥
চতুর্দশ হি বর্ষাণি সহিতস্য় ত্বয়া বনে ।
ক্ষণভূতানি যাস্য়ংতি শতসংখ্য়ান্যতোঽন্যথা ॥ 56 ॥
ভৃত্যবত্সল তিষ্ঠংতং ভর্তৃপুত্রগতে পথি ।
ভক্তং ভৃত্য়ং স্থিতং স্থিত্য়াং ত্বং ন মাং হাতুমর্হসি ॥ 57 ॥
এবং বহুবিধং দীনং যাচমানং পুনঃ পুনঃ ।
রামো ভৃত্য়ানুকংপী তু সুমংত্রমিদমব্রবীত্ ॥ 58 ॥
জানামি পরমাং ভক্তিং ময়ি তে ভর্তৃবত্সল ।
শৃণু চাপি যদর্থং ত্বাং প্রেষয়ামি পুরীমিতঃ ॥ 59 ॥
নগরীং ত্বাং গতং দৃষ্ট্বা জননী মে যবীযসী ।
কৈকেয়ী প্রত্যয়ং গচ্ছেদিতি রামো বনং গতঃ ॥ 60 ॥
পরিতুষ্টা হি সা দেবী বনবাসং গতে ময়ি ।
রাজানং নাতিশংকেত 'মিথ্য়াবাদী'তি ধার্মিকম্ ॥ 61 ॥
এষ মে প্রথমঃ কল্পো যদংবা মে যবীযসী ।
ভরতারক্ষিতং স্ফীতং পুত্ররাজ্যমবাপ্নুয়াত্ ॥ 62 ॥
মম প্রিয়ার্থং রাজ্ঞশ্চ সরথস্ত্বং পুরীং ব্রজ ।
সংদিষ্টশ্চাসি যানর্থাংস্তাং স্তান্ ব্রূয়াস্তথা তথা ॥ 63 ॥
ইত্য়ুক্ত্বা বচনং সূতং সাংত্বয়িত্বা পুনঃ পুনঃ ।
গুহং বচনমক্লীবো রামো হেতুমদব্রবীত্ ॥ 64 ॥
নেদানীং গুহ যোগ্য়োঽয়ং বাসো মে সজনে বনে ।
আবশ্য়ং হ্য়াশ্রমে বাসঃ কর্তব্যস্তদ্গতো বিধিঃ ॥ 65 ॥
সোঽহং গৃহীত্বা নিযমং তপস্বি জনভূষণম্ ।
হিতকামঃ পিতুর্ভূয়ঃ সীতায়া লক্ষ্মণস্য় চ ॥ 66 ॥
জটাঃ কৃত্বা গমিষ্য়ামি ন্যগ্রোধক্ষীরমানয় ।
তত্ ক্ষীরং রাজপুত্রায় গুহঃ ক্ষিপ্রমুপাহরত্ ॥ 67 ॥
লক্ষ্মণস্য়াত্মনশ্চৈব রামস্তেনাকরোজ্জটাঃ ।
দীর্ঘবাহুর্নরব্য়াঘ্রো জটিলত্বমধারযত্ ॥ 68 ॥
তৌ তদা চীরবসনৌ জটামংডলধারিণৌ ।
আশোভেতামৃষিসমৌ ভ্রাতরৌ রামলক্ষ্মণৌ ॥ 69 ॥
ততো বৈখানসং মার্গমাস্থিতঃ সহ লক্ষ্মণঃ ।
ব্রতমাদিষ্টবান্ রামঃ সখায়ং গুহমব্রবীত্ ॥ 70 ॥
অপ্রমত্তো বলে কোশে দুর্গে জনপদে তথা ।
ভবেথা গুহ রাজ্য়ং হি দুরারক্ষতমং মতম্ ॥ 71 ॥
ততস্তং সমনুজ্ঞায় গুহমিক্ষ্বাকুনংদনঃ ।
জগাম তূর্ণমব্যগ্রঃ সভার্য়ঃ সহ লক্ষ্মণঃ ॥ 72 ॥
স তু দৃষ্ট্বা নদীতীরে নাবমিক্ষ্বাকুনংদনঃ ।
তিতীর্ষুঃ শীঘ্রগাং গংগামিদং লক্ষ্মণমব্রবীত্ ॥ 73 ॥
আরোহ ত্বং নরব্য়াঘ্র স্থিতাং নাবমিমাং শনৈঃ ।
সীতাং চারোপয়ান্বক্ষং পরিগৃহ্য় মনস্বিনীম্ ॥ 74 ॥
স ভ্রাতুঃ শাসনং শ্রুত্বা সর্বমপ্রতিকূলযন্ ।
আরোপ্য় মৈথিলীং পূর্বমারুরোহাঽঽত্মবাং স্ততঃ ॥ 75 ॥
অথারুরোহ তেজস্বী স্বয়ং লক্ষ্মণপূর্বজঃ ।
ততো নিষাদাধিপতির্গুহো জ্ঞাতীনচোদযত্ ॥ 76 ॥
রাঘবোঽপি মহাতেজা নাবমারুহ্য় তাং ততঃ ।
ব্রহ্মবত্ ক্ষত্রবচ্চৈব জজাপ হিতমাত্মনঃ ॥ 77 ॥
আচম্য় চ যথাশাস্ত্রং নদীং তাং সহ সীতয়া ।
প্রাণমত্প্রীতিসংহৃষ্টো লক্ষ্মণশ্চামিতপ্রভঃ ॥ 78 ॥
অনুজ্ঞায় সুমংত্রং চ সবলং চৈব তং গুহম্ ।
আস্থায় নাবং রামস্তু চোদয়ামাস নাবিকান্ ॥ 79 ॥
ততস্তৈশ্চোদিতা সা নৌঃ কর্ণধারসমাহিতা ।
শুভস্ফ্যবেগাভিহতা শীঘ্রং সলিলমত্যগাত্ ॥ 80 ॥
. ।
মধ্য়ং তু সমনুপ্রাপ্য় ভাগীরথ্য়াস্ত্বনিংদিতা ।
বৈদেহী প্রাংজলির্ভূত্বা তাং নদীমিদমব্রবীত্ ॥ 81 ॥
পুত্রো দশরথস্য়ায়ং মহারাজস্য় ধীমতঃ ।
নিদেশং পারয়িত্বেমং গংগে ত্বদভিরক্ষিতঃ ॥ 82 ॥
চতুর্দশ হি বর্ষাণি সমগ্রাণ্য়ুষ্য় কাননে ।
ভ্রাত্রা সহ ময়া চৈব পুনঃ প্রত্য়াগমিষ্যতি ॥ 83 ॥
ততস্ত্বাং দেবি সুভগে ক্ষেমেণ পুনরাগতা ।
যক্ষ্য়ে প্রমুদিতা গংগে সর্বকামসমৃদ্ধিনী ॥ 84 ॥
ত্বং হি ত্রিপথগা দেবি ব্রহ্মলোকং সমীক্ষসে ।
ভার্য়া চোদধিরাজস্য় লোকেঽস্মিন্ সংপ্রদৃশ্যসে ॥ 85 ॥
সা ত্বাং দেবি নমস্য়ামি প্রশংসামি চ শোভনে ।
প্রাপ্তরাজ্য়ে নরব্য়াঘ্রে শিবেন পুনরাগতে ॥ 86 ॥
গবাং শতসহস্রাণি বস্ত্রাণ্যন্নং চ পেশলম্ ।
ব্রাহ্মণেভ্য়ঃ প্রদাস্য়ামি তব প্রিযচিকীর্ষয়া ॥ 87 ॥
সুরাঘটসহস্রেণ মাংসভূতৌদনেন চ ।
যক্ষ্য়ে ত্বাং প্রযতা দেবি পুরীং পুনরুপাগতা ॥ 88 ॥
যানি ত্বত্তীরবাসীনি দৈবতানি চ সংতি হি ।
তানি সর্বাণি যক্ষ্য়ামি তীর্থান্য়াযতনানি চ ॥ 89 ॥
পুনরেব মহাবাহুর্ময়া ভ্রাত্রা চ সংগতঃ ।
অয়োধ্য়াং বনবাসাত্তু প্রবিশত্বনঘোঽনঘে ॥ 90 ॥
তথা সংভাষমাণা সা সীতা গংগামনিংদিতা ।
দক্ষিণা দক্ষিণং তীরং ক্ষিপ্রমেবাভ্য়ুপাগমত্ ॥ 91 ॥
তীরং তু সমনুপ্রাপ্য় নাবং হিত্বা নরর্ষভঃ ।
প্রাতিষ্ঠত সহ ভ্রাত্রা বৈদেহ্য়া চ পরংতপঃ ॥ 92 ॥
অথাব্রবীন্মহাবাহুঃ সুমিত্রানংদবর্ধনম্ ।
ভব সংরক্ষণার্থায় সজনে বিজনেঽপি বা ॥ 93 ॥
অবশ্য়ং রক্ষণং কার্যমদৃষ্টে বিজনে বনে ।
অগ্রতো গচ্ছ সৌমিত্রে সীতা ত্বামনুগচ্ছতু ॥ 94 ॥
পৃষ্ঠতোঽহং গমিষ্য়ামি ত্বাং চ সীতাং চ পালযন্ ।
অন্য়োন্যস্য়েহ নো রক্ষা কর্তব্য়া পুরুষর্ষভ ॥ 95 ॥
ন হি তাবদতিক্রাংতা সুকরা কাচন ক্রিয়া ।
অদ্য় দুঃখং তু বৈদেহী বনবাসস্য় বেত্স্যতি ॥ 96 ॥
প্রণষ্টজনসংবাধং ক্ষেত্রারামবিবর্জিতম্ ।
বিষমং চ প্রপাতং চ বনমদ্য় প্রবেক্ষ্যতি ॥ 97 ॥
শ্রুত্বা রামস্য় বচনং প্রতস্থে লক্ষ্মণোঽগ্রতঃ ।
অনংতরং চ সীতায়া রাঘবো রঘুনংদনঃ ॥ 98 ॥
গতং তু গংগাপরপারমাশু রামং সুমংত্রঃ প্রততং নিরীক্ষ্য় ।
অধ্বপ্রকর্ষাদ্বিনিবৃত্তদৃষ্টি র্মুমোচ বাষ্পং ব্যথিত স্তপস্বী ॥ 99 ॥
স লোকপালপ্রতিমপ্রভাববাং স্তীর্ত্বা মহাত্মা বরদো মহানদীম্ ।
ততঃ সমৃদ্ধান্ শুভসস্যমালিনঃ ক্রমেণ বত্সান্ মুদিতানুপাগমত্ ॥ 100 ॥
তৌ তত্র হত্বা চতুরো মহামৃগান্ বরাহমৃশ্য়ং পৃষতং মহারুরুম্ ।
আদায় মেধ্য়ং ত্বরিতং বুভুক্ষিতৌ বাসায় কালে যযতুর্বনস্পতিম্ ॥ 101 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে দ্বিপংচাশস্সর্গঃ ॥
