ශ්රීමද්වාල්මීකීය රාමායණේ අයෝධ්යාකාංඩම් ।
අථ සප්තමස්සර්ගඃ ।
ජ්ඤාතිදාසී යතෝ ජාතා කෛකේය්යාස්තු සහෝෂිතා ।
ප්රාසාදං චංද්රසංකාශමාරුරෝහ යදෘච්ඡයා ॥ 1 ॥
සික්තරාජපථාං කෘත්ස්නාං ප්රකීර්ණකුසුමෝත්කරාම් ।
අයෝධ්යාං මංථරා තස්මාත්ප්රාසාදාදන්වවෛක්ෂත ॥ 2 ॥
පතාකාභිර්වරාර්හාභිර්ධ්වජෛශ්ච සමලංකෘතාම් ।
වෘතාං ඡංදපථෛශ්චාපි ශිරස්ස්නාතජනෛර්වෘතාම් ॥ 3 ॥
මාල්යමෝදකහස්තෛශ්ච ද්විජේංද්රෛරභිනාදිතාම් ।
ශුක්ලදේවගෘහද්වාරාං සර්වවාදිත්රනිස්වනාම් ॥ 4 ॥
සංප්රහෘෂ්ටජනාකීර්ණාං බ්රහ්මඝෝෂාභිනාදිතාම් ।
ප්රහෘෂ්ටවරහස්ත්යශ්වාං සංප්රණර්දිතගෝවෘෂාම් ॥ 5 ॥
ප්රහෘෂ්ටමුදිතෛඃ පෞරෛරුච්ඡ්රිතධ්වජමාලිනීම් ।
අයෝධ්යාං මංථරා දෘෂ්ට්වා පරං විස්මයමාගතා ॥ 6 ॥
ප්රහර්ෂෝත්ඵුල්ලනයනාං පාංඩුරක්ෂෞමවාසිනීම් ।
අවිදූරේ ස්ථිතාං දෘෂ්ට්වා ධාත්රීං පප්රච්ඡ මංථරා ॥ 7 ॥
උත්තමේනාභිසංයුක්තා හර්ෂේණාර්ථපරා සතී ।
රාමමාතා ධනං කින්නු ජනේභ්යස්සංප්රයච්ඡති ॥ 8 ॥
අතිමාත්රප්රහර්ෂෝऽයං කිං ජනස්ය ච ශංස මේ ।
කාරයිෂ්යති කිං වාපි සංප්රහෘෂ්ටෝ මහීපතිඃ ॥ 9 ॥
විදීර්යමාණා හර්ෂේණ ධාත්රී තු පරයා මුදා ।
ආචචක්ෂේऽථ කුබ්ජායෛ භූයසීං රාඝව ශ්රියම් ॥ 10 ॥
ශ්වඃ පුෂ්යේණ ජිතක්රෝධං යෞවරාජ්යේන රාඝවම් ।
රාජා දශරථෝ රාමමභිෂේචයිතාऽනඝම් ॥ 11 ॥
ධාත්ර්යාස්තු වචනං ශෘත්වා කුබ්ජා ක්ෂිප්රමමර්ෂිතා ।
කෛලාසශිඛරාකාරා ත්ප්රාසාදාදවරෝහත ॥ 12 ॥
සා දහ්යමානා කෝපේන මංථරා පාපදර්ශිනී ।
ශයානාමේත්ය කෛකේයීමිදං වචනමබ්රවීත් ॥ 13 ॥
උත්තිෂ්ඨ මූඪේ කිං ශේෂේ භයං ත්වාමභිවර්තතේ ।
උපප්ලුතාමෞඝේන කිමාත්මානං න බුධ්යසේ ॥ 14 ॥
අනිෂ්ටේ සුභගාකාරේ සෞභාග්යේන විකත්ථසේ ।
චලං හි තව සෞභාග්යං නද්යාස්ස්රෝත ඉවෝෂ්ණගේ ॥ 15 ॥
ඒවමුක්තා තු කෛකේයී රුෂ්ටයා පරුෂං වචඃ ।
කුබ්ජයා පාපදර්ශින්යා විෂාදමගමත්පරම් ॥ 16 ॥
කෛකේයී ත්වබ්රවීත්කුබ්ජාං කච්චිත්ක්ෂේමං නු මංථරේ ।
විෂණ්ණවදනාං හි ත්වාං ලක්ෂයේ භෘශදුඃඛිතාම් ॥ 17 ॥
මංථරා තු වච ශ්ශ්රුත්වා කෛකේය්යා මධුරාක්ෂරම් ।
උවාච ක්රෝධසංයුක්තා වාක්යං වාක්යවිශාරදා ॥ 18 ॥
සා විෂණ්ණතරා භූත්වා කුබ්ජා තස්යා හිතෛෂිණී ।
විෂාදයංතී ප්රෝවාච භේදයංතී ච රාඝවම් ॥ 19 ॥
අක්ෂය්යං සුමහද්දේවි ප්රවෘත්තං ත්වද්විනාශනම් ।
රාමං දශරථෝ රාජා යෞවරාජ්යේऽභිෂේක්ෂ්යති ॥ 20 ॥
සාऽස්ම්යගාධේ භයේ මග්නා දුඃඛශෝකසමන්විතා ।
දහ්යමානාऽනලේනේව ත්වද්ධිතාර්ථමිහාගතා ॥ 21 ॥
තව දුඃඛේන කෛකේයි මම දුඃඛං මහද්භවේත් ।
ත්වද්වෘද්ධෞ මම වෘද්ධිශ්ච භවේදත්ර න සංශයඃ ॥ 22 ॥
නරාධිපකුලේ ජාතා මහිෂී ත්වං මහීපතේඃ ।
උග්රත්වං රාජධර්මාණාං කථං දේවි න බුධ්යසේ ॥ 23 ॥
ධර්මාවාදී ශඨෝ භර්තා ශ්ලක්ෂ්ණවාදී ච දාරුණඃ ।
ශුද්ධභාවේ න ජානීෂේ තේනෛව මතිසංධිතා ॥ 24 ॥
උපස්ථිතඃ ප්රයුංජානස්ත්වයි සාංත්වමනර්ථකම් ।
අර්ථේනෛවාද්ය තේ භර්තා කෞසල්යාං යෝජයිෂ්යති ॥ 25 ॥
උපවාහ්ය ස දුෂ්ටාත්මා භරතං තව බංධුෂු ।
කාල්යේ ස්ථාපයිතා රාමං රාජ්යේ නිහතකංටකේ ॥ 26 ॥
ශත්රුඃ පතිප්රවාදේන මාත්රේව හිතකාම්යයා ।
ආශීවිෂ ඉවාංකේන බාලේ පරිධෘතස්ත්වයා ॥ 27 ॥
යථා හි කුර්යාත්සර්පෝ වා ශත්රුර්වා ප්රත්යුපේක්ෂිතඃ ।
රාජ්ඤා දශරථේනාද්ය සපුත්රා ත්වං තථා කෘතා ॥ 28 ॥
පාපේනානෘතසාංත්වේන බාලේ නිත්යසුඛෝචිතේ ।
රාමං ස්ථාපයතා රාජ්යේ සානුබංධා හතා හ්යසි ॥ 29 ॥
සා ප්රාප්තකාලං කෛකේයි ක්ෂිප්රං කුරු හිතං තව ।
ත්රායස්ව පුත්රමාත්මානං මාං ච විස්මයදර්ශනේ ॥ 30 ॥
මංථාරායා වචශ්ශ්රුත්වා ශයානා සා ශුභානනා ।
උත්තස්ථෞ හර්ෂසංපූර්ණා චංද්රලේඛේව ශාරදී ॥ 31 ॥
අතීව සා තු සංහෘෂ්ටා කෛකේයී විස්මයාන්විතා ।
ඒකමාභරණං තස්යෛ කුබ්ජායෛ ප්රදදෞ ශුභම් ॥ 32 ॥
දත්වා ත්වාභරණං තස්යෛ කුබ්ජායෛ ප්රමදෝත්තමා ।
කෛකේයී මංථරාං දෘෂ්ට්වා පුනරේවාබ්රවීදිදම් ॥ 33 ॥
ඉදං තු මංථරේ මහ්යමාඛ්යාසි පරමං ප්රියම් ।
ඒතන්මේ ප්රියමාඛ්යාතුඃ කිං වා භූයඃ කරෝමි තේ ॥ 34 ॥
රාමේ වා භරතේ වාऽහං විශේෂං නෝපලක්ෂයේ ।
තස්මාත්තුෂ්ටාऽස්මි යද්රාජා රාමං රාජ්යේऽභිෂේක්ෂ්යති ॥ 35 ॥
න මේ පරං කිංචිදිතස්ත්වයා පුනඃ ප්රියං ප්රියාර්හේ සුවචං වචඃපරම් ।
තථා හ්යවෝචස්ත්වමතඃ ප්රියෝත්තරං වරං පරං තේ ප්රදදාමි තං වෘණු ॥ 36 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ සප්තමස්සර්ගඃ ॥
