ଶ୍ରୀମଦ୍ଵାଲ୍ମୀକୀୟ ରାମାୟଣେ ଅୟୋଧ୍ୟାକାଂଡମ୍ ।
ଅଥ ଏକୋନାଶୀତିତମସ୍ସର୍ଗଃ ।
ତତଃ ପ୍ରଭାତସମୟେ ଦିଵସେଽଥ ଚତୁର୍ଦଶେ ।
ସମେତ୍ୟ ରାଜକର୍ତାରୋ ଭରତଂ ଵାକ୍ୟମବ୍ରୁଵନ୍ ॥ 1 ॥
ଗତୋ ଦଶରଥସ୍ସ୍ଵର୍ଗଂ ୟୋ ନୋ ଗୁରୁତରୋ ଗୁରୁଃ ।
ରାମଂ ପ୍ରଵ୍ରାଜ୍ୟ ଵୈ ଜ୍ୟେଷ୍ଠଂ ଲକ୍ଷ୍ମଣଂ ଚ ମହାବଲମ୍ ॥ 2 ॥
ତ୍ଵମଦ୍ୟ ଭଵ ନୋ ରାଜା ରାଜପୁତ୍ର ମହାୟଶଃ ।
ସଂଗତ୍ୟା ନାପରାଧ୍ନୋତି ରାଜ୍ୟମେତଦନାୟକମ୍ ॥ 3 ॥
ଅଭିଷେଚନିକଂ ସର୍ଵମିଦମାଦାୟ ରାଘଵ ।
ପ୍ରତୀକ୍ଷତେ ତ୍ଵାଂ ସ୍ଵଜନଶ୍ଶ୍ରେଣୟଶ୍ଚ ନୃପାତ୍ମଜ ॥ 4 ॥
ରାଜ୍ୟଂ ଗୃହାଣ ଭରତ ପିତୃପୈତାମହଂ ଧ୍ରୁଵମ୍ ।
ଅଭିଷେଚୟ ଚାତ୍ମାନଂ ପାହି ଚାସ୍ମାନ୍ନରର୍ଷଭ ॥ 5 ॥
ଅଭିଷେଚନିକଂ ଭାଂଡଂ କୃତ୍ଵା ସର୍ଵଂ ପ୍ରଦକ୍ଷିଣମ୍ ।
ଭରତସ୍ତଂ ଜନଂ ସର୍ଵଂ ପ୍ରତ୍ୟୁଵାଚ ଧୃତଵ୍ରତଃ ॥ 6 ॥
ଜ୍ୟେଷ୍ଠସ୍ୟ ରାଜତା ନିତ୍ୟମୁଚିତା ହି କୁଲସ୍ୟ ନଃ ।
ନୈଵଂ ଭଵଂତୋ ମାଂ ଵକ୍ତୁମର୍ହଂତି କୁଶଲା ଜନାଃ ॥ 7 ॥
ରାମଃ ପୂର୍ଵୋ ହି ନୋ ଭ୍ରାତା ଭଵିଷ୍ୟତି ମହୀପତିଃ ।
ଅହଂ ତ୍ଵରଣ୍ୟେ ଵତ୍ସ୍ୟାମି ଵର୍ଷାଣି ନଵ ପଂଚ ଚ ॥ 8 ॥
ୟୁଜ୍ୟତାଂ ମହତୀ ସେନା ଚତୁରଂଗମହାବଲା ।
ଆନୟିଷ୍ୟାମ୍ୟହଂ ଜ୍ୟେଷ୍ଠଂ ଭ୍ରାତରଂ ରାଘଵଂ ଵନାତ୍ ॥ 9 ॥
ଅଭିଷେଚନିକଂ ଚୈଵ ସର୍ଵମେତଦୁପସ୍କୃତମ୍ ।
ପୁରସ୍କୃତ୍ୟ ଗମିଷ୍ୟାମି ରାମହେତୋର୍ଵନଂ ପ୍ରତି ॥ 10 ॥
ତତ୍ରୈଵଂ ତଂ ନରଵ୍ୟାଘ୍ରମଭିଷିଚ୍ୟ ପୁରସ୍କୃତମ୍ ।
ଆନେଷ୍ୟାମି ତୁ ଵୈ ରାମଂ ହଵ୍ୟଵାହମିଵାଧ୍ଵରାତ୍ ॥ 11 ॥
ନ ସକାମାଂ କରିଷ୍ୟାମି ସ୍ଵାମିମାଂ ମାତୃଗଂଧିନୀମ୍ ।
ଵନେ ଵତ୍ସ୍ୟାମ୍ୟହଂ ଦୁର୍ଗେ ରାମୋ ରାଜା ଭଵିଷ୍ୟତି ॥ 12 ॥
କ୍ରିୟତାଂ ଶିଲ୍ପିଭିଃ ପଂଥା ସ୍ସମାନି ଵିଷମାଣି ଚ ।
ରକ୍ଷିଣଶ୍ଚାନୁସମ୍ୟାଂତୁ ପଥି ଦୁର୍ଗଵିଚାରକାଃ ॥ 13 ॥
ଏଵଂ ସଂଭାଷମାଣଂ ତଂ ରାମହେତୋର୍ନୃପାତ୍ମଜମ୍ ।
ପ୍ରତ୍ୟୁଵାଚ ଜନସ୍ସର୍ଵ ଶ୍ଶ୍ରୀମଦ୍ଵାକ୍ୟମନୁତ୍ତମମ୍ ॥ 14 ॥
ଏଵଂ ତେ ଭାଷମାଣସ୍ୟ ପଦ୍ମା ଶ୍ରୀରୁପତିଷ୍ଠତାତ୍ ।
ୟସ୍ତ୍ଵଂ ଜ୍ୟେଷ୍ଠେ ନୃପସୁତେ ପୃଥିଵୀଂ ଦାତୁମିଚ୍ଛସି ॥ 15 ॥
ଅନୁତ୍ତମଂ ତଦ୍ଵଚନଂ ନୃପାତ୍ମଜପ୍ରଭାଷିତଂ ସଂଶ୍ରଵଣେ ନିଶମ୍ୟ ଚ ।
ପ୍ରହର୍ଷଜାସ୍ତଂ ପ୍ରତି ବାଷ୍ପବିଂଦଵୋ ନିପେତୁରାର୍ୟାନନନେତ୍ରସଂଭଵାଃ ॥ 16 ॥
ଊଚୁସ୍ତେ ଵଚନମିଦଂ ନିଶମ୍ୟ ହୃଷ୍ଟା ସ୍ସାମାତ୍ୟା ସ୍ସପରିଷଦୋ ଵିୟାତଶୋକାଃ ।
ପଂଥାନଂ ନରଵର ଭକ୍ତିମାନ୍ ଜନଶ୍ଚ ଵ୍ୟାଦିଷ୍ଟସ୍ତଵ ଵଚନାଚ୍ଚ ଶିଲ୍ପିଵର୍ଗଃ ॥ 17 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅୟୋଧ୍ୟାକାଂଡେ ଏକୋନାଶୀତିତମସ୍ସର୍ଗଃ ॥
