શ્રીમદ્વાલ્મીકીય રામાયણે અયોધ્યાકાંડમ્ ।
અથ એકોનાશીતિતમસ્સર્ગઃ ।
તતઃ પ્રભાતસમયે દિવસેઽથ ચતુર્દશે ।
સમેત્ય રાજકર્તારો ભરતં વાક્યમબ્રુવન્ ॥ 1 ॥
ગતો દશરથસ્સ્વર્ગં યો નો ગુરુતરો ગુરુઃ ।
રામં પ્રવ્રાજ્ય વૈ જ્યેષ્ઠં લક્ષ્મણં ચ મહાબલમ્ ॥ 2 ॥
ત્વમદ્ય ભવ નો રાજા રાજપુત્ર મહાયશઃ ।
સંગત્યા નાપરાધ્નોતિ રાજ્યમેતદનાયકમ્ ॥ 3 ॥
અભિષેચનિકં સર્વમિદમાદાય રાઘવ ।
પ્રતીક્ષતે ત્વાં સ્વજનશ્શ્રેણયશ્ચ નૃપાત્મજ ॥ 4 ॥
રાજ્યં ગૃહાણ ભરત પિતૃપૈતામહં ધ્રુવમ્ ।
અભિષેચય ચાત્માનં પાહિ ચાસ્માન્નરર્ષભ ॥ 5 ॥
અભિષેચનિકં ભાંડં કૃત્વા સર્વં પ્રદક્ષિણમ્ ।
ભરતસ્તં જનં સર્વં પ્રત્યુવાચ ધૃતવ્રતઃ ॥ 6 ॥
જ્યેષ્ઠસ્ય રાજતા નિત્યમુચિતા હિ કુલસ્ય નઃ ।
નૈવં ભવંતો માં વક્તુમર્હંતિ કુશલા જનાઃ ॥ 7 ॥
રામઃ પૂર્વો હિ નો ભ્રાતા ભવિષ્યતિ મહીપતિઃ ।
અહં ત્વરણ્યે વત્સ્યામિ વર્ષાણિ નવ પંચ ચ ॥ 8 ॥
યુજ્યતાં મહતી સેના ચતુરંગમહાબલા ।
આનયિષ્યામ્યહં જ્યેષ્ઠં ભ્રાતરં રાઘવં વનાત્ ॥ 9 ॥
અભિષેચનિકં ચૈવ સર્વમેતદુપસ્કૃતમ્ ।
પુરસ્કૃત્ય ગમિષ્યામિ રામહેતોર્વનં પ્રતિ ॥ 10 ॥
તત્રૈવં તં નરવ્યાઘ્રમભિષિચ્ય પુરસ્કૃતમ્ ।
આનેષ્યામિ તુ વૈ રામં હવ્યવાહમિવાધ્વરાત્ ॥ 11 ॥
ન સકામાં કરિષ્યામિ સ્વામિમાં માતૃગંધિનીમ્ ।
વને વત્સ્યામ્યહં દુર્ગે રામો રાજા ભવિષ્યતિ ॥ 12 ॥
ક્રિયતાં શિલ્પિભિઃ પંથા સ્સમાનિ વિષમાણિ ચ ।
રક્ષિણશ્ચાનુસમ્યાંતુ પથિ દુર્ગવિચારકાઃ ॥ 13 ॥
એવં સંભાષમાણં તં રામહેતોર્નૃપાત્મજમ્ ।
પ્રત્યુવાચ જનસ્સર્વ શ્શ્રીમદ્વાક્યમનુત્તમમ્ ॥ 14 ॥
એવં તે ભાષમાણસ્ય પદ્મા શ્રીરુપતિષ્ઠતાત્ ।
યસ્ત્વં જ્યેષ્ઠે નૃપસુતે પૃથિવીં દાતુમિચ્છસિ ॥ 15 ॥
અનુત્તમં તદ્વચનં નૃપાત્મજપ્રભાષિતં સંશ્રવણે નિશમ્ય ચ ।
પ્રહર્ષજાસ્તં પ્રતિ બાષ્પબિંદવો નિપેતુરાર્યાનનનેત્રસંભવાઃ ॥ 16 ॥
ઊચુસ્તે વચનમિદં નિશમ્ય હૃષ્ટા સ્સામાત્યા સ્સપરિષદો વિયાતશોકાઃ ।
પંથાનં નરવર ભક્તિમાન્ જનશ્ચ વ્યાદિષ્ટસ્તવ વચનાચ્ચ શિલ્પિવર્ગઃ ॥ 17 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અયોધ્યાકાંડે એકોનાશીતિતમસ્સર્ગઃ ॥
