శ్రీమద్వాల్మీకీయ రామాయణే అయోధ్యాకాండమ్ ।
అథ ఏకోనాశీతితమస్సర్గః ।
తతః ప్రభాతసమయే దివసేఽథ చతుర్దశే ।
సమేత్య రాజకర్తారో భరతం వాక్యమబ్రువన్ ॥ 1 ॥
గతో దశరథస్స్వర్గం యో నో గురుతరో గురుః ।
రామం ప్రవ్రాజ్య వై జ్యేష్ఠం లక్ష్మణం చ మహాబలమ్ ॥ 2 ॥
త్వమద్య భవ నో రాజా రాజపుత్ర మహాయశః ।
సంగత్యా నాపరాధ్నోతి రాజ్యమేతదనాయకమ్ ॥ 3 ॥
అభిషేచనికం సర్వమిదమాదాయ రాఘవ ।
ప్రతీక్షతే త్వాం స్వజనశ్శ్రేణయశ్చ నృపాత్మజ ॥ 4 ॥
రాజ్యం గృహాణ భరత పితృపైతామహం ధ్రువమ్ ।
అభిషేచయ చాత్మానం పాహి చాస్మాన్నరర్షభ ॥ 5 ॥
అభిషేచనికం భాండం కృత్వా సర్వం ప్రదక్షిణమ్ ।
భరతస్తం జనం సర్వం ప్రత్యువాచ ధృతవ్రతః ॥ 6 ॥
జ్యేష్ఠస్య రాజతా నిత్యముచితా హి కులస్య నః ।
నైవం భవంతో మాం వక్తుమర్హంతి కుశలా జనాః ॥ 7 ॥
రామః పూర్వో హి నో భ్రాతా భవిష్యతి మహీపతిః ।
అహం త్వరణ్యే వత్స్యామి వర్షాణి నవ పంచ చ ॥ 8 ॥
యుజ్యతాం మహతీ సేనా చతురంగమహాబలా ।
ఆనయిష్యామ్యహం జ్యేష్ఠం భ్రాతరం రాఘవం వనాత్ ॥ 9 ॥
అభిషేచనికం చైవ సర్వమేతదుపస్కృతమ్ ।
పురస్కృత్య గమిష్యామి రామహేతోర్వనం ప్రతి ॥ 10 ॥
తత్రైవం తం నరవ్యాఘ్రమభిషిచ్య పురస్కృతమ్ ।
ఆనేష్యామి తు వై రామం హవ్యవాహమివాధ్వరాత్ ॥ 11 ॥
న సకామాం కరిష్యామి స్వామిమాం మాతృగంధినీమ్ ।
వనే వత్స్యామ్యహం దుర్గే రామో రాజా భవిష్యతి ॥ 12 ॥
క్రియతాం శిల్పిభిః పంథా స్సమాని విషమాణి చ ।
రక్షిణశ్చానుసమ్యాంతు పథి దుర్గవిచారకాః ॥ 13 ॥
ఏవం సంభాషమాణం తం రామహేతోర్నృపాత్మజమ్ ।
ప్రత్యువాచ జనస్సర్వ శ్శ్రీమద్వాక్యమనుత్తమమ్ ॥ 14 ॥
ఏవం తే భాషమాణస్య పద్మా శ్రీరుపతిష్ఠతాత్ ।
యస్త్వం జ్యేష్ఠే నృపసుతే పృథివీం దాతుమిచ్ఛసి ॥ 15 ॥
అనుత్తమం తద్వచనం నృపాత్మజప్రభాషితం సంశ్రవణే నిశమ్య చ ।
ప్రహర్షజాస్తం ప్రతి బాష్పబిందవో నిపేతురార్యానననేత్రసంభవాః ॥ 16 ॥
ఊచుస్తే వచనమిదం నిశమ్య హృష్టా స్సామాత్యా స్సపరిషదో వియాతశోకాః ।
పంథానం నరవర భక్తిమాన్ జనశ్చ వ్యాదిష్టస్తవ వచనాచ్చ శిల్పివర్గః ॥ 17 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అయోధ్యాకాండే ఏకోనాశీతితమస్సర్గః ॥
