śrīmadvālmīkīya rāmāyaṇē ayōdhyākāṇḍam ।
atha ēkōnāśītitamassargaḥ ।
tataḥ prabhātasamayē divasē'tha chaturdaśē ।
samētya rājakartārō bharataṃ vākyamabruvan ॥ 1 ॥
gatō daśarathassvargaṃ yō nō gurutarō guruḥ ।
rāmaṃ pravrājya vai jyēṣṭhaṃ lakṣmaṇaṃ cha mahābalam ॥ 2 ॥
tvamadya bhava nō rājā rājaputra mahāyaśaḥ ।
saṅgatyā nāparādhnōti rājyamētadanāyakam ॥ 3 ॥
abhiṣēchanikaṃ sarvamidamādāya rāghava ।
pratīkṣatē tvāṃ svajanaśśrēṇayaścha nṛpātmaja ॥ 4 ॥
rājyaṃ gṛhāṇa bharata pitṛpaitāmahaṃ dhruvam ।
abhiṣēchaya chātmānaṃ pāhi chāsmānnararṣabha ॥ 5 ॥
abhiṣēchanikaṃ bhāṇḍaṃ kṛtvā sarvaṃ pradakṣiṇam ।
bharatastaṃ janaṃ sarvaṃ pratyuvācha dhṛtavrataḥ ॥ 6 ॥
jyēṣṭhasya rājatā nityamuchitā hi kulasya naḥ ।
naivaṃ bhavantō māṃ vaktumarhanti kuśalā janāḥ ॥ 7 ॥
rāmaḥ pūrvō hi nō bhrātā bhaviṣyati mahīpatiḥ ।
ahaṃ tvaraṇyē vatsyāmi varṣāṇi nava pañcha cha ॥ 8 ॥
yujyatāṃ mahatī sēnā chaturaṅgamahābalā ।
ānayiṣyāmyahaṃ jyēṣṭhaṃ bhrātaraṃ rāghavaṃ vanāt ॥ 9 ॥
abhiṣēchanikaṃ chaiva sarvamētadupaskṛtam ।
puraskṛtya gamiṣyāmi rāmahētōrvanaṃ prati ॥ 10 ॥
tatraivaṃ taṃ naravyāghramabhiṣichya puraskṛtam ।
ānēṣyāmi tu vai rāmaṃ havyavāhamivādhvarāt ॥ 11 ॥
na sakāmāṃ kariṣyāmi svāmimāṃ mātṛgandhinīm ।
vanē vatsyāmyahaṃ durgē rāmō rājā bhaviṣyati ॥ 12 ॥
kriyatāṃ śilpibhiḥ panthā ssamāni viṣamāṇi cha ।
rakṣiṇaśchānusamyāntu pathi durgavichārakāḥ ॥ 13 ॥
ēvaṃ sambhāṣamāṇaṃ taṃ rāmahētōrnṛpātmajam ।
pratyuvācha janassarva śśrīmadvākyamanuttamam ॥ 14 ॥
ēvaṃ tē bhāṣamāṇasya padmā śrīrupatiṣṭhatāt ।
yastvaṃ jyēṣṭhē nṛpasutē pṛthivīṃ dātumichChasi ॥ 15 ॥
anuttamaṃ tadvachanaṃ nṛpātmajaprabhāṣitaṃ saṃśravaṇē niśamya cha ।
praharṣajāstaṃ prati bāṣpabindavō nipēturāryānananētrasambhavāḥ ॥ 16 ॥
ūchustē vachanamidaṃ niśamya hṛṣṭā ssāmātyā ssapariṣadō viyātaśōkāḥ ।
panthānaṃ naravara bhaktimān janaścha vyādiṣṭastava vachanāchcha śilpivargaḥ ॥ 17 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē ēkōnāśītitamassargaḥ ॥
