ශ්රීමද්වාල්මීකීය රාමායණේ අයෝධ්යාකාංඩම් ।
අථ පංචාශීතිතමස්සර්ගඃ ।
ඒවමුක්තස්තු භරතෝ නිෂාදාධිපතිං ගුහම් ।
ප්රත්යුවාච මහාප්රාජ්ඤෝ වාක්යං හේත්වර්ථසංහිතම් ॥ 1 ॥
ඌර්ජිතඃ ඛලු තේ කාමඃ කෘතෝ මම ගුරෝස්සඛේ ।
යෝ මේ ත්වමීදෘශීං සේනාමේකෝऽභ්යර්චිතුමිච්ඡසි ॥ 2 ॥
ඉත්යුක්ත්වා තු මහාතේජා ගුහං වචනමුත්තමම් ।
අබ්රවීද්භරත ශ්ශ්රීමානනිෂාදාධිපතිං පුනඃ ॥ 3 ॥
කතරේණ ගමිෂ්යාමි භරද්වාජාශ්රමං ගුහ ।
ගහනෝऽයං භෘශං දේශෝ ගංගාऽනූපෝ දුරත්යයඃ ॥ 4 ॥
තස්ය තද්වචනං ශ්රුත්වා රාජපුත්රස්ය ධීමතඃ ।
අබ්රවීත්ප්රාංජලිර්වාක්යං ගුහෝ ගහනගෝචරඃ ॥ 5 ॥
දාශාස්ත්වාऽනුऽගමිෂ්යංති ධන්විනස්සුසමාහිතාඃ ।
අහං ත්වානුගමිෂ්යාමි රාජපුත්ර මහායශඃ ॥ 6 ॥
කච්ඡින්නදුෂ්ටෝ ව්රජසි රාමස්යාක්ලිෂ්ටකර්මණඃ ।
ඉයං තේ මහතී සේනා ශංකාං ජනයතීව මේ ॥ 7 ॥
තමේවමභිභාෂංතමාකාශ ඉව නිර්මලඃ ।
භරතශ්ශ්ලක්ෂ්ණයා වාචා ගුහං වචනමබ්රවීත් ॥ 8 ॥
මාභූත්ස කාලෝ යත්කෂ්ටං න මාං ශංකිතුමර්හසි ।
රාඝව ස්සහි මේ භ්රාතා ජ්යේෂ්ඨඃ පිතුසමෝ මතඃ ॥ 9 ॥
තං නිවර්තයිතුං යාමි කාකුත්ස්ථං වනවාසිනම් ।
බුද්ධිරන්යා න තේ කාර්යා ගුහ සත්යං බ්රවීමි තේ ॥ 10 ॥
ස තු සංහෘෂ්ටවදන ශ්ශ්රුත්වා භරතභාෂිතම් ।
පුනරේවාබ්රවීද්වාක්යං භරතං ප්රති හර්ෂිතඃ ॥ 11 ॥
ධන්යස්ත්වං න ත්වයා තුල්යං පශ්යාමි ජගතීතලේ ।
අයත්නාදාගතං රාජ්යං යස්ත්වං ත්යක්තුමිහේච්ඡසි ॥ 12 ॥
ශාශ්වතී ඛලු තේ කීර්තිර්ලෝකානනුචරිෂ්යති ।
යස්ත්වං කෘච්ඡ්රගතං රාමං ප්රත්යානයිතුමිච්ඡසි ॥ 13 ॥
ඒවං සංභාෂමාණස්ය ගුහස්ය භරතං තදා ।
බභෞ නෂ්ටප්රභස්සූර්යෝ රජනී චාභ්යවර්තත ॥ 14 ॥
සන්නිවේශ්ය ස තාං සේනාං ගුහේන පරිතෝෂිතඃ ।
ශත්රුඝ්නේන සහ ශ්රීමාංඡයනං සමුපාගමත් ॥ 15 ॥
රාමචිංතාමය ශ්ශෝකෝ භරතස්ය මහාත්මනඃ ।
උපස්ථිතෝ හ්යනර්හස්ය ධර්මප්රේක්ෂස්ය තාදෘශඃ ॥ 16 ॥
අංතර්දාහේන දහනස්සංතාපයති රාඝවම් ।
වනදාහාභිසංතප්තං ගූඪෝऽග්නිරිව පාදපම් ॥ 17 ॥
ප්රසෘතස්සර්වගාත්රේභ්යස්ස්වේදං ශෝකාග්නිසංභවම් ।
යථා සූර්යාංශුසංතප්තෝ හිමවාන් ප්රසෘතෝහිමම් ॥ 18 ॥
ධ්යානනිර්ධරශෛලේන විනිශ්ශ්වසිතධාතුනා ।
දෛන්යපාදපසංඝේන ශෝකායාසාධිශෘංගිණා ॥ 19 ॥
ප්රමෝහානංතසත්ත්වේන සංතාපෞෂධිවේණුනා ।
ආක්රාංතෝ දුඃඛශෛලේන මහතා කෛකයීසුතඃ ॥ 20 ॥
විනිශ්ශ්වසන්වෛ භෘශදුර්මනාස්තතඃ ප්රමූඪසංජ්ඤඃ පරමාපදං ගතඃ ।
ශමං න ලේභේ හෘදයජ්වරාර්දිතෝ නරර්ෂභෝ යූථහතෝ යථර්ෂභඃ ॥ 21 ॥
ගුහේන සාර්ධං භරතස්සමාගතෝ මහානුභාවස්සජනස්සමාහිතඃ ।
සුදුර්මනාස්තං භරතං තදා පුනර්ගුහ ස්සමාශ්වාසයදග්රජං ප්රති ॥ 22 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ පංචාශීතිතමස්සර්ගඃ ॥
