শ্রীমদ্বাল্মীকীয় রামাযণে অয়োধ্য়াকাংডম্ ।
অথ পংচাশীতিতমস্সর্গঃ ।
এবমুক্তস্তু ভরতো নিষাদাধিপতিং গুহম্ ।
প্রত্য়ুবাচ মহাপ্রাজ্ঞো বাক্য়ং হেত্বর্থসংহিতম্ ॥ 1 ॥
ঊর্জিতঃ খলু তে কামঃ কৃতো মম গুরোস্সখে ।
যো মে ত্বমীদৃশীং সেনামেকোঽভ্যর্চিতুমিচ্ছসি ॥ 2 ॥
ইত্য়ুক্ত্বা তু মহাতেজা গুহং বচনমুত্তমম্ ।
অব্রবীদ্ভরত শ্শ্রীমাননিষাদাধিপতিং পুনঃ ॥ 3 ॥
কতরেণ গমিষ্য়ামি ভরদ্বাজাশ্রমং গুহ ।
গহনোঽয়ং ভৃশং দেশো গংগাঽনূপো দুরত্যয়ঃ ॥ 4 ॥
তস্য় তদ্বচনং শ্রুত্বা রাজপুত্রস্য় ধীমতঃ ।
অব্রবীত্প্রাংজলির্বাক্য়ং গুহো গহনগোচরঃ ॥ 5 ॥
দাশাস্ত্বাঽনুঽগমিষ্য়ংতি ধন্বিনস্সুসমাহিতাঃ ।
অহং ত্বানুগমিষ্য়ামি রাজপুত্র মহাযশঃ ॥ 6 ॥
কচ্ছিন্নদুষ্টো ব্রজসি রামস্য়াক্লিষ্টকর্মণঃ ।
ইয়ং তে মহতী সেনা শংকাং জনযতীব মে ॥ 7 ॥
তমেবমভিভাষংতমাকাশ ইব নির্মলঃ ।
ভরতশ্শ্লক্ষ্ণয়া বাচা গুহং বচনমব্রবীত্ ॥ 8 ॥
মাভূত্স কালো যত্কষ্টং ন মাং শংকিতুমর্হসি ।
রাঘব স্সহি মে ভ্রাতা জ্য়েষ্ঠঃ পিতুসমো মতঃ ॥ 9 ॥
তং নিবর্তয়িতুং যামি কাকুত্স্থং বনবাসিনম্ ।
বুদ্ধিরন্য়া ন তে কার্য়া গুহ সত্য়ং ব্রবীমি তে ॥ 10 ॥
স তু সংহৃষ্টবদন শ্শ্রুত্বা ভরতভাষিতম্ ।
পুনরেবাব্রবীদ্বাক্য়ং ভরতং প্রতি হর্ষিতঃ ॥ 11 ॥
ধন্যস্ত্বং ন ত্বয়া তুল্য়ং পশ্য়ামি জগতীতলে ।
অযত্নাদাগতং রাজ্য়ং যস্ত্বং ত্যক্তুমিহেচ্ছসি ॥ 12 ॥
শাশ্বতী খলু তে কীর্তির্লোকাননুচরিষ্যতি ।
যস্ত্বং কৃচ্ছ্রগতং রামং প্রত্য়ানয়িতুমিচ্ছসি ॥ 13 ॥
এবং সংভাষমাণস্য় গুহস্য় ভরতং তদা ।
বভৌ নষ্টপ্রভস্সূর্য়ো রজনী চাভ্যবর্তত ॥ 14 ॥
সন্নিবেশ্য় স তাং সেনাং গুহেন পরিতোষিতঃ ।
শত্রুঘ্নেন সহ শ্রীমাংছযনং সমুপাগমত্ ॥ 15 ॥
রামচিংতাময় শ্শোকো ভরতস্য় মহাত্মনঃ ।
উপস্থিতো হ্যনর্হস্য় ধর্মপ্রেক্ষস্য় তাদৃশঃ ॥ 16 ॥
অংতর্দাহেন দহনস্সংতাপযতি রাঘবম্ ।
বনদাহাভিসংতপ্তং গূঢোঽগ্নিরিব পাদপম্ ॥ 17 ॥
প্রসৃতস্সর্বগাত্রেভ্যস্স্বেদং শোকাগ্নিসংভবম্ ।
যথা সূর্য়াংশুসংতপ্তো হিমবান্ প্রসৃতোহিমম্ ॥ 18 ॥
ধ্য়াননির্ধরশৈলেন বিনিশ্শ্বসিতধাতুনা ।
দৈন্যপাদপসংঘেন শোকায়াসাধিশৃংগিণা ॥ 19 ॥
প্রমোহানংতসত্ত্বেন সংতাপৌষধিবেণুনা ।
আক্রাংতো দুঃখশৈলেন মহতা কৈকয়ীসুতঃ ॥ 20 ॥
বিনিশ্শ্বসন্বৈ ভৃশদুর্মনাস্ততঃ প্রমূঢসংজ্ঞঃ পরমাপদং গতঃ ।
শমং ন লেভে হৃদযজ্বরার্দিতো নরর্ষভো যূথহতো যথর্ষভঃ ॥ 21 ॥
গুহেন সার্ধং ভরতস্সমাগতো মহানুভাবস্সজনস্সমাহিতঃ ।
সুদুর্মনাস্তং ভরতং তদা পুনর্গুহ স্সমাশ্বাসযদগ্রজং প্রতি ॥ 22 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে পংচাশীতিতমস্সর্গঃ ॥
