śrīmadvālmīkīya rāmāyaṇē ayōdhyākāṇḍam ।
atha pañchāśītitamassargaḥ ।
ēvamuktastu bharatō niṣādādhipatiṃ guham ।
pratyuvācha mahāprājñō vākyaṃ hētvarthasaṃhitam ॥ 1 ॥
ūrjitaḥ khalu tē kāmaḥ kṛtō mama gurōssakhē ।
yō mē tvamīdṛśīṃ sēnāmēkō'bhyarchitumichChasi ॥ 2 ॥
ityuktvā tu mahātējā guhaṃ vachanamuttamam ।
abravīdbharata śśrīmānaniṣādādhipatiṃ punaḥ ॥ 3 ॥
katarēṇa gamiṣyāmi bharadvājāśramaṃ guha ।
gahanō'yaṃ bhṛśaṃ dēśō gaṅgā'nūpō duratyayaḥ ॥ 4 ॥
tasya tadvachanaṃ śrutvā rājaputrasya dhīmataḥ ।
abravītprāñjalirvākyaṃ guhō gahanagōcharaḥ ॥ 5 ॥
dāśāstvā'nu'gamiṣyanti dhanvinassusamāhitāḥ ।
ahaṃ tvānugamiṣyāmi rājaputra mahāyaśaḥ ॥ 6 ॥
kachChinnaduṣṭō vrajasi rāmasyākliṣṭakarmaṇaḥ ।
iyaṃ tē mahatī sēnā śaṅkāṃ janayatīva mē ॥ 7 ॥
tamēvamabhibhāṣantamākāśa iva nirmalaḥ ।
bharataśślakṣṇayā vāchā guhaṃ vachanamabravīt ॥ 8 ॥
mābhūtsa kālō yatkaṣṭaṃ na māṃ śaṅkitumarhasi ।
rāghava ssahi mē bhrātā jyēṣṭhaḥ pitusamō mataḥ ॥ 9 ॥
taṃ nivartayituṃ yāmi kākutsthaṃ vanavāsinam ।
buddhiranyā na tē kāryā guha satyaṃ bravīmi tē ॥ 10 ॥
sa tu saṃhṛṣṭavadana śśrutvā bharatabhāṣitam ।
punarēvābravīdvākyaṃ bharataṃ prati harṣitaḥ ॥ 11 ॥
dhanyastvaṃ na tvayā tulyaṃ paśyāmi jagatītalē ।
ayatnādāgataṃ rājyaṃ yastvaṃ tyaktumihēchChasi ॥ 12 ॥
śāśvatī khalu tē kīrtirlōkānanuchariṣyati ।
yastvaṃ kṛchChragataṃ rāmaṃ pratyānayitumichChasi ॥ 13 ॥
ēvaṃ sambhāṣamāṇasya guhasya bharataṃ tadā ।
babhau naṣṭaprabhassūryō rajanī chābhyavartata ॥ 14 ॥
sannivēśya sa tāṃ sēnāṃ guhēna paritōṣitaḥ ।
śatrughnēna saha śrīmāñChayanaṃ samupāgamat ॥ 15 ॥
rāmachintāmaya śśōkō bharatasya mahātmanaḥ ।
upasthitō hyanarhasya dharmaprēkṣasya tādṛśaḥ ॥ 16 ॥
antardāhēna dahanassantāpayati rāghavam ।
vanadāhābhisantaptaṃ gūḍhō'gniriva pādapam ॥ 17 ॥
prasṛtassarvagātrēbhyassvēdaṃ śōkāgnisambhavam ।
yathā sūryāṃśusantaptō himavān prasṛtōhimam ॥ 18 ॥
dhyānanirdharaśailēna viniśśvasitadhātunā ।
dainyapādapasaṅghēna śōkāyāsādhiśṛṅgiṇā ॥ 19 ॥
pramōhānantasattvēna santāpauṣadhivēṇunā ।
ākrāntō duḥkhaśailēna mahatā kaikayīsutaḥ ॥ 20 ॥
viniśśvasanvai bhṛśadurmanāstataḥ pramūḍhasañjñaḥ paramāpadaṃ gataḥ ।
śamaṃ na lēbhē hṛdayajvarārditō nararṣabhō yūthahatō yatharṣabhaḥ ॥ 21 ॥
guhēna sārdhaṃ bharatassamāgatō mahānubhāvassajanassamāhitaḥ ।
sudurmanāstaṃ bharataṃ tadā punarguha ssamāśvāsayadagrajaṃ prati ॥ 22 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē pañchāśītitamassargaḥ ॥
