ଶ୍ରୀମଦ୍ଵାଲ୍ମୀକୀୟ ରାମାୟଣେ ଅୟୋଧ୍ୟାକାଂଡମ୍ ।
ଅଥ ନଵମସ୍ସର୍ଗଃ ।
ଏଵମୁକ୍ତା ତୁ କୈକେୟୀ କ୍ରୋଧେନ ଜ୍ଵଲିତାନନା ।
ଦୀର୍ଘମୁଷ୍ଣଂ ଵିନିଶ୍ଵସ୍ୟ ମଂଥରାମିଦମବ୍ରଵୀତ୍ ॥ 1 ॥
ଅଦ୍ୟ ରାମମିତଃ କ୍ଷିପ୍ରଂ ଵନଂ ପ୍ରସ୍ଥାପୟାମ୍ୟହମ୍ ।
ୟୌଵରାଜ୍ୟେ ଚ ଭରତଂ କ୍ଷିପ୍ରମେଵାଭିଷେଚୟେ ॥ 2 ॥
ଇଦଂ ତ୍ଵିଦାନୀଂ ସଂପଶ୍ୟ କେନୋପାୟେନ ମଂଥରେ ।
ଭରତଃ ପ୍ରାପ୍ନୁୟାଦ୍ରାଜ୍ୟଂ ନ ତୁ ରାମଃ କଥଂଚନ ॥ 3 ॥
ଏଵମୁକ୍ତା ତୟା ଦେଵ୍ୟା ମଂଥରା ପାପଦର୍ଶିନୀ ।
ରାମାର୍ଥମୁପହିଂସଂତୀ କୈକେୟୀମିଦମବ୍ରଵୀତ୍ ॥ 4 ॥
ହଂତେଦାନୀଂ ପ୍ରଵକ୍ଷ୍ୟାମି କୈକେୟି ଶ୍ରୂୟତାଂ ଚ ମେ ।
ୟଥା ତେ ଭରତୋ ରାଜ୍ୟଂ ପୁତ୍ରଃ ପ୍ରାପ୍ସ୍ୟତି କେଵଲମ୍ ॥ 5 ॥
କିଂ ନ ସ୍ମରସି କୈକେୟି ସ୍ମରଂତୀ ଵା ନିଗୂହସେ ।
ୟଦୁଚ୍ୟମାନମାତ୍ମାର୍ଥଂ ମତ୍ତସ୍ତ୍ଵଂ ଶ୍ରୋତୁମିଚ୍ଛସି ॥ 6 ॥
ମୟୋଚ୍ୟମାନଂ ୟଦି ତେ ଶ୍ରୋତୁଂ ଛଂଦୋ ଵିଲାସିନି ।
ଶ୍ରୂୟତାମଭିଧାସ୍ୟାମି ଶ୍ରୁତ୍ଵା ଚାପି ଵିମୃଶ୍ୟତାମ୍ ॥ 7 ॥
ଶ୍ରୁତ୍ଵୈଵଂ ଵଚନଂ ତସ୍ୟା ମଂଥରାୟାସ୍ତୁ କୈକେୟୀ ।
କିଂଚିଦୁତ୍ଥାୟ ଶୟନାତ୍ସ୍ଵାସ୍ତୀର୍ଣାଦିଦମବ୍ରଵୀତ୍ ॥ 8 ॥
କଥୟ ତ୍ଵଂ ମମୋପାୟଂ କେନୋପାୟେନ ମଂଥରେ ।
ଭରତଃ ପ୍ରାପ୍ନୁୟାଦ୍ରାଜ୍ୟଂ ନ ତୁ ରାମଃ କଥଂଚନ ॥ 9 ॥
ଏଵମୁକ୍ତା ତୟା ଦେଵ୍ୟା ମଂଥରା ପାପଦର୍ଶିନୀ ।
ରାମାର୍ଥମୁପହିଂସଂତୀ କୁବ୍ଜା ଵଚନମବ୍ରଵୀତ୍ ॥ 10 ॥
ତଵ ଦୈଵାସୁରେ ୟୁଦ୍ଧେ ସହ ରାଜର୍ଷିଭିଃ ପତିଃ ।
ଅଗଚ୍ଛତ୍ତ୍ଵାମୁପାଦାୟ ଦେଵରାଜସ୍ୟ ସାହ୍ୟକୃତ୍ ॥ 11 ॥
ଦିଶମାସ୍ଥାୟ ଵୈ ଦେଵି ଦକ୍ଷିଣାଂ ଦଂଡକାନ୍ପ୍ରତି ।
ଵୈଜୟଂତମିତି ଖ୍ୟାତଂ ପୁରଂ ୟତ୍ର ତିମିଧ୍ଵଜଃ ॥ 12 ॥
ସ ଶଂବର ଇତି ଖ୍ୟାତଶ୍ଶତମାୟୋ ମହାସୁରଃ ।
ଦଦୌ ଶକ୍ରସ୍ୟ ସଂଗ୍ରାମଂ ଦେଵସଂଘୈରନିର୍ଜିତଃ ॥ 13 ॥
ତସ୍ମିନ୍ମହତି ସଂଗ୍ରାମେ ପୁରୁଷାନ୍କ୍ଷତଵିକ୍ଷତାନ୍ ।
ରାତ୍ରୌ ପ୍ରସୁପ୍ତାନ୍ଘ୍ନଂତି ସ୍ମ ତରସାଽଽସାଦ୍ୟ ରାକ୍ଷସାଃ ॥ 14 ॥
ତତ୍ରାକରୋନ୍ମହଦ୍ୟୁଦ୍ଧଂ ରାଜା ଦଶରଥସ୍ତଦା ।
ଅସୁରୈଶ୍ଚ ମହାବାହୁଶ୍ଶସ୍ତ୍ରୈଶ୍ଚ ଶକଲୀକୃତଃ ॥ 15 ॥
ଅପଵାହ୍ୟ ତ୍ଵୟା ଦେଵି ସଂଗ୍ରାମାନ୍ନଷ୍ଟଚେତନଃ ।
ତତ୍ରାପି ଵିକ୍ଷତଶ୍ଶସ୍ତ୍ରୈଃ ପତିସ୍ତେ ରକ୍ଷିତସ୍ତ୍ଵୟା ॥ 16 ॥
ତୁଷ୍ଟେନ ତେନ ଦତ୍ତୌ ତେ ଦ୍ଵୌ ଵରୌ ଶୁଭଦର୍ଶନେ ।
ସ ତ୍ଵୟୋକ୍ତଃ ପତିର୍ଦେଵି ୟଦେଚ୍ଛେୟଂ ତଦା ଵରୌ ॥ 17 ॥
ଗୃହ୍ଣୀୟାମିତି ତତ୍ତେନ ତଥେତ୍ୟୁକ୍ତଂ ମହାତ୍ମନା ।
ଅନଭିଜ୍ଞାମ୍ହ୍ୟହଂ ଦେଵି ତ୍ଵୟୈଵ କଥିତା ପୁରା ॥ 18 ॥
କଥୈଷା ତଵ ତୁ ସ୍ନେହାନ୍ମନସା ଧାର୍ୟତେ ମୟା ।
ରାମାଭିଷେକସଂଭାରାନ୍ନିଗୃହ୍ୟ ଵିନିଵର୍ତୟ ॥ 19 ॥
ତୌ ଵରୌ ୟାଚ ଭର୍ତାରଂ ଭରତସ୍ୟାଭିଷେଚନମ୍ ।
ପ୍ରଵ୍ରାଜନଂ ଚ ରାମସ୍ୟ ତ୍ଵଂ ଵର୍ଷାଣି ଚତୁର୍ଦଶ ॥ 20 ॥
ଚତୁର୍ଦଶ ହି ଵର୍ଷାଣି ରାମେ ପ୍ରଵ୍ରାଜିତେ ଵନମ୍ ।
ପ୍ରଜାଭାଵଗତସ୍ନେହସ୍ସ୍ଥିରଃ ପୁତ୍ରୋ ଭଵିଷ୍ୟତି ॥ 21 ॥
କ୍ରୋଧାଗାରଂ ପ୍ରଵିଶ୍ୟାଽଦ୍ୟ କ୍ରୁଦ୍ଧେଵାଶ୍ଵପତେସ୍ସୁତେ ।
ଶେଷ୍ଵାଽନଂତର୍ହିତାୟାଂ ତ୍ଵଂ ଭୂମୌ ମଲିନଵାସିନୀ ॥ 22 ॥
ମାସ୍ମୈନଂ ପ୍ରତ୍ୟୁଦୀକ୍ଷେଥା ମା ଚୈନମଭିଭାଷଥାଃ ।
ରୁଦଂତୀ ଚାପି ତଂ ଦୃଷ୍ଟ୍ଵା ଜଗତ୍ୟାଂ ଶୋକଲାଲସା ॥ 23 ॥
ଦୟିତା ତ୍ଵଂ ସଦା ଭର୍ତୁରତ୍ର ମେ ନାସ୍ତି ସଂଶୟଃ ।
ତ୍ଵତ୍କୃତେ ସ ମହାରାଜୋ ଵିଶେଦପି ହୁତାଶନମ୍ ॥ 24 ॥
ନ ତ୍ଵାଂ କ୍ରୋଧୟିତୁଂ ଶକ୍ତୋ ନ କ୍ରୃଦ୍ଧାଂ ପ୍ରତ୍ୟୁଦୀକ୍ଷିତୁମ୍ ।
ତଵ ପ୍ରିୟାର୍ଥଂ ରାଜା ହି ପ୍ରାଣାନପି ପରିତ୍ୟଜେତ୍ ॥ 25 ॥
ନ ହ୍ୟତିକ୍ରମିତୁଂ ଶକ୍ତସ୍ତଵ ଵାକ୍ୟଂ ମହୀପତିଃ ।
ମଂଦସ୍ଵଭାଵେ ବୁଧ୍ୟସ୍ଵ ସୌଭାଗ୍ୟବଲମାତ୍ମନଃ ॥ 26 ॥
ମଣିମୁକ୍ତଂ ସୁଵର୍ଣାନି ରତ୍ନାନି ଵିଵିଧାନି ଚ ।
ଦଦ୍ୟାଦ୍ଦଶରଥୋ ରାଜା ମାସ୍ମ ତେଷୁ ମନଃ କୃଥାଃ ॥ 27 ॥
ୟୌ ତୌ ଦୈଵାସୁରେ ୟୁଦ୍ଧେ ଵରୌ ଦଶରଥୋଽଦଦାତ୍ ।
ତୌ ସ୍ମାରୟ ମହାଭାଗେ ସୋଽର୍ଥୋ ନ ତ୍ଵାମତିକ୍ରମେତ୍ ॥ 28 ॥
ୟଦାତୁ ତେ ଵରଂ ଦଦ୍ୟାତ୍ସ୍ଵୟମୁତ୍ଥାପ୍ୟ ରାଘଵଃ ।
ଵ୍ୟଵସ୍ଥାପ୍ୟ ମହାରାଜଂ ତ୍ଵମିମଂ ଵୃଣୁୟା ଵରମ୍ ॥ 29 ॥
ରାମଂ ପ୍ରଵ୍ରାଜୟାରଣ୍ୟେ ନଵ ଵର୍ଷାଣି ପଂଚ ଚ ।
ଭରତଃ କ୍ରିୟତାଂ ରାଜା ପୃଥିଵ୍ୟାଃ ପାର୍ଥିଵର୍ଷଭଃ ॥ 30 ॥
ଚତୁର୍ଦଶ ହି ଵର୍ଷାଣି ରାମେ ପ୍ରଵ୍ରାଜିତେ ଵନମ୍ ।
ରୂଢଶ୍ଚ କୃତମୂଲଶ୍ଚ ଶେଷଂ ସ୍ଥାସ୍ୟତି ତେ ସୁତଃ ॥ 31 ॥
ରାମପ୍ରଵ୍ରାଜନଂ ଚୈଵ ଦେଵି ୟାଚସ୍ଵ ତଂ ଵରମ୍ ।
ଏଵଂ ସିଦ୍ଧ୍ୟଂତି ପୁତ୍ରସ୍ୟ ସର୍ଵାର୍ଥାସ୍ତଵ ଭାମିନି ॥ 32 ॥
ଏଵଂ ପ୍ରଵ୍ରାଜିତଶ୍ଚୈଵ ରାମୋଽରାମୋ ଭଵିଷ୍ୟତି ।
ଭରତଶ୍ଚ ହତାମିତ୍ରସ୍ତଵ ରାଜା ଭଵିଷ୍ୟତି ॥ 33 ॥
ୟେନ କାଲେନ ରାମଶ୍ଚ ଵନାତ୍ପ୍ରତ୍ୟାଗମିଷ୍ୟତି ।
ତେନ କାଲେନ ପୁତ୍ରସ୍ତେ କୃତମୂଲୋ ଭଵିଷ୍ୟତି ॥ 34 ॥
ସୁଗୃହୀତମନୁଷ୍ୟଶ୍ଚ ସୁହୃଦ୍ଭିସ୍ସାର୍ଧମାତ୍ମଵାନ୍ ।
ପ୍ରାପ୍ତକାଲଂ ନୁ ମନ୍ୟେଽହଂ ରାଜାନଂ ଵୀତସାଧ୍ଵସା ॥ 35 ॥
ରାମାଭିଷେକସଂକଲ୍ପାନ୍ନିଗୃହ୍ୟ ଵିନିଵର୍ତୟ ।
ଅନର୍ଥମର୍ଥରୂପେଣ ଗ୍ରାହିତା ସା ତତସ୍ତୟା ॥ 36 ॥
ହୃଷ୍ଟା ପ୍ରତୀତା କୈକେୟୀ ମଂଥରାମିଦମବ୍ରଵୀତ୍ ।
ସା ହି ଵାକ୍ୟେନ କୁବ୍ଜାୟାଃ କିଶୋରୀଵୋତ୍ପଥଂ ଗତା ॥ 37 ॥
କୈକେୟୀ ଵିସ୍ମୟଂ ପ୍ରାପ୍ତା ପରଂ ପରମଦର୍ଶନା ।
କୁବ୍ଜେ ତ୍ଵାଂ ନାଭିଜାନାମି ଶ୍ରେଷ୍ଠାଂ ଶ୍ରେଷ୍ଠାଭିଥାୟିନୀମ୍ ॥ 38 ॥
ପୃଥିଵ୍ୟାମସି କୁବ୍ଜାନାମୁତ୍ତମା ବୁଦ୍ଧିନିଶ୍ଚୟେ ।
ତ୍ଵମେଵ ତୁ ମମାଽର୍ଥେଷୁ ନିତ୍ୟୟୁକ୍ତା ହିତୈଷିଣୀ ॥ 39 ॥
ନାହଂ ସମଵବୁଧ୍ୟେୟଂ କୁବ୍ଜେ ରାଜ୍ଞଶ୍ଚିକୀର୍ଷିତମ୍ ।
ସଂତି ଦୁସ୍ସଂସ୍ଥିତାଃ କୁବ୍ଜା ଵକ୍ରାଃ ପରମଦାରୁଣାଃ ॥ 40 ॥
ତ୍ଵଂ ପଦ୍ମମିଵ ଵାତେନ ସନ୍ନତା ପ୍ରିୟଦର୍ଶନା ।
ତ୍ଵଂ ପଦ୍ମମିଵ ଵାତେନ ସନ୍ନତା ପ୍ରିୟଦର୍ଶନା ।
ଉରସ୍ତେଽଭିନିଵିଷ୍ଟଂ ଵୈ ୟାଵତ୍ସ୍କଂଧାତ୍ ସମୁନ୍ନତମ୍ ॥ 41 ॥
ଅଧସ୍ତାଚ୍ଚୋଦରଂ ଶାତଂ ସୁନାଭମିଵ ଲଜ୍ଜିତମ୍ ।
ପରିପୂର୍ଣଂ ତୁ ଜଘନଂ ସୁପୀନୌ ଚ ପୟୋଧରୌ ॥ 42 ॥
ଵିମଲେଂଦୁସମଂ ଵକ୍ତ୍ରମହୋରାଜସି ମଂଥରେ ।
ଜଘନଂ ତଵ ନିର୍ଘୁଷ୍ଟଂ ରଶନାଦାମଶୋଭିତମ୍ ॥ 43 ॥
ଜଂଘେ ଭୃଶମୁପନ୍ୟସ୍ତେ ପାଦୌ ଚାପ୍ୟାୟତାଵୁଭୌ ।
ତ୍ଵମାୟତାଭ୍ୟାଂ ସକ୍ଥିଭ୍ୟାଂ ମଂଥରେ କ୍ଷୌମଵାସିନୀ ॥ 44 ॥
ଅଗ୍ରତୋ ମମ ଗଚ୍ଛଂତୀ ରାଜହଂସୀଵ ରାଜସେ ।
ଆସନ୍ୟାଶ୍ଶଂବରେ ମାୟାସ୍ସହସ୍ରମସୁରାଧିପେ ॥ 45 ॥
ସର୍ଵାସ୍ତ୍ଵୟି ନିଵିଷ୍ଟାସ୍ତା ଭୂୟଶ୍ଚାନ୍ୟାସ୍ସହସ୍ରଶଃ ।
ତଵେଦଂ ସ୍ଥଗୁ ୟଦ୍ଦୀର୍ଘଂ ରଥଘୋଣମିଵାୟତମ୍ ॥ 46 ॥
ମତୟଃ କ୍ଷତ୍ରଵିଦ୍ୟାଶ୍ଚ ମାୟାଶ୍ଚାତ୍ର ଵସଂତି ତେ ।
ଅତ୍ର ତେ ପ୍ରତିମୋକ୍ଷ୍ୟାମି ମାଲାଂ କୁବ୍ଜେ ହିରଣ୍ମୟୀମ୍ ॥ 47 ॥
ଅଭିଷିକ୍ତେ ଚ ଭରତେ ରାଘଵେ ଚ ଵନଂ ଗତେ ।
ଜାତ୍ୟେନ ଚ ସୁଵର୍ଣେନ ସୁନିଷ୍ଟପ୍ତେନ ମଂଥରେ ॥ 48 ॥
ଲବ୍ଧାର୍ଥା ଚ ପ୍ରତୀତା ଚ ଲେପୟିଷ୍ୟାମି ତେ ସ୍ଥଗୁ ।
ମୁଖେ ଚ ତିଲକଂ ଚିତ୍ରଂ ଜାତରୂପମୟଂ ଶୁଭମ୍ ॥ 49 ॥
କାରୟିଷ୍ୟାମି ତେ କୁବ୍ଜେ ଶୁଭାନ୍ୟାଭରଣାନି ଚ ।
ପରିଧାୟ ଶୁଭେ ଵସ୍ତ୍ରେ ଦେଵତେଵ ଚରିଷ୍ୟସି ॥ 50 ॥
ଚଂଦ୍ରମାହ୍ଵୟମାନେନ ମୁଖେନାପ୍ରତିମାନନା ।
ଗମିଷ୍ୟସି ଗତିଂ ମୁଖ୍ୟାଂ ଗର୍ଵୟଂତୀ ଦ୍ଵିଷଜ୍ଜନମ୍ ॥ 51 ॥
ତଵାପି କୁବ୍ଜାଃ କୁବ୍ଜାୟାସ୍ସର୍ଵାଭରଣଭୂଷିତାଃ ।
ପାଦୌ ପରିଚରିଷ୍ୟଂତି ୟଥୈଵ ତ୍ଵଂ ସଦା ମମ ॥ 52 ॥
ଇତି ପ୍ରଶସ୍ୟମାନା ସା କୈକେୟୀମିଦମବ୍ରଵୀତ୍ ।
ଶୟାନାଂ ଶୟନେ ଶୁଭ୍ରେ ଵେଦ୍ୟାମଗ୍ନିଶିଖାମିଵ ॥ 53 ॥
ଗତୋଦକେ ସେତୁବଂଧୋ ନ କଲ୍ୟାଣି ଵିଧୀୟତେ ।
ଉତ୍ତିଷ୍ଠ କୁରୁ କଲ୍ୟାଣି ରାଜାନମନୁଦର୍ଶୟ ॥ 54 ॥
ତଥା ପ୍ରୋତ୍ସାହିତା ଦେଵୀ ଗତ୍ଵା ମଂଥରୟା ସହ ।
କ୍ରୋଧାଗାରଂ ଵିଶାଲାକ୍ଷୀ ସୌଭାଗ୍ୟମଦଗର୍ଵିତା ॥ 55 ॥
ଅନେକଶତସାହସ୍ରଂ ମୁକ୍ତାହାରଂ ଵରାଂଗନା ।
ଅଵମୁଚ୍ୟ ଵରାର୍ହାଣି ଶୁଭାନ୍ୟାଭରଣାନି ଚ ॥ 56 ॥
ତତୋ ହେମୋପମା ତତ୍ର କୁବ୍ଜାଵାକ୍ୟଵଶଂ ଗତା ।
ସଂଵିଶ୍ୟ ଭୂମୌ କୈକେୟୀ ମଂଥରାମିଦମବ୍ରଵୀତ୍ ॥ 57 ॥
ଇହ ଵା ମାଂ ମୃତାଂ କୁବ୍ଜେ ନୃପାୟାଵେଦୟିଷ୍ୟସି ।
ଵନଂ ତୁ ରାଘଵେ ପ୍ରାପ୍ତେ ଭରତଃ ପ୍ରାପ୍ସ୍ୟତି କ୍ଷିତିମ୍ ॥ 58 ॥
ନ ସୁଵର୍ଣେନ ମେ ହ୍ୟର୍ଥୋ ନ ରତ୍ନୈର୍ନ ଚ ଭୂଷଣୈଃ ।
ଏଷ ମେ ଜୀଵିତସ୍ୟାଂତୋ ରାମୋ ୟଦ୍ୟଭିଷିଚ୍ୟତେ ॥ 59 ॥
ଅଥୋ ପୁନସ୍ତାଂ ମହିଷୀଂ ମହୀକ୍ଷିତୋ ଵଚୋଭିରତ୍ୟର୍ଥମହାପରାକ୍ରମୈଃ ।
ଉଵାଚ କୁବ୍ଜା ଭରତସ୍ୟ ମାତରଂ ହିତଂ ଵଚୋ ରାମମୁପେତ୍ୟ ଚାହିତମ୍ ॥ 60 ॥
ପ୍ରପତ୍ସ୍ୟତେ ରାଜ୍ୟମିଦଂ ହି ରାଘଵୋ ୟଦି ଧ୍ରୁଵଂ ତ୍ଵଂ ସସୁତା ଚ ତପ୍ସ୍ୟସେ ।
ଅତୋ ହି କଲ୍ୟାଣି ୟତସ୍ଵ ତତ୍ତଥା ୟଥା ସୁତସ୍ତେ ଭରତୋଽଭିଷେକ୍ଷ୍ୟତେ ॥ 61 ॥
ତଥାଽତିଵିଦ୍ଧା ମହିଷୀ ତୁ କୁବ୍ଜୟା ସମାହତା ଵାଗିଷୁଭିର୍ମୁହୁର୍ମୁହୁଃ ।
ନିଧାୟହସ୍ତୌ ହୃଦୟେଽତିଵିସ୍ମିତା ଶଶଂସ କୁବ୍ଜାଂ କୁପିତା ପୁନଃ ପୁନଃ ॥ 62 ॥
ୟମସ୍ୟ ଵା ମାଂ ଵିଷୟଂ ଗତାମିତୋ ନିଶାମ୍ୟ କୁବ୍ଜେ ପ୍ରତିଵେଦୟିଷ୍ୟସି ।
ଵନଂ ଗତେ ଵା ସୁଚିରାୟ ରାଘଵେ ସମୃଦ୍ଧକାମୋ ଭରତୋ ଭଵିଷ୍ୟତି ॥ 63 ॥
ଅହଂ ହି ନୈଵାସ୍ତରଣାନି ନ ସ୍ରଜୋ ନ ଚଂଦନଂ ନାଂଜନପାନଭୋଜନମ୍ ।
ନ କିଂଚିଦିଚ୍ଛାମି ନ ଚେହ ଜୀଵିତଂ ନ ଚେଦିତୋ ଗଚ୍ଛତି ରାଘଵୋ ଵନମ୍ ॥ 64 ॥
ଅଥୈତଦୁକ୍ତ୍ଵା ଵଚନଂ ସୁଦାରୁଣଂ ନିଧାୟ ସର୍ଵାଭରଣାନି ଭାମିନୀ ।
ଅସଂଵୃତାମାସ୍ତରଣେନ ମେଦିନୀଂ ତଦାଽଧିଶିଶ୍ୟେ ପତିତେଵ କିନ୍ନରୀ ॥ 65 ॥
ଉଦୀର୍ଣସଂରଂଭତମୋଵୃତାନନା ତଥାଽଵମୁକ୍ତୋତ୍ତମମାଲ୍ୟଭୂଷଣା ।
ନରେଂଦ୍ରପତ୍ନୀ ଵିମନା ବଭୂଵ ସା ତମୋଵୃତା ଦ୍ୟୌରିଵ ମଗ୍ନତାରକା ॥ 66 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅୟୋଧ୍ୟାକାଂଡେ ନଵମସ୍ସର୍ଗଃ ॥
