ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ସପ୍ତଦଶସ୍ସର୍ଗଃ ।
କୃତାଭିଷେକୋ ରାମସ୍ତୁ ସୀତା ସୌମିତ୍ରିରେଵ ଚ ।
ତସ୍ମାଦ୍ଗୋଦାଵରୀତୀରାତ୍ତତୋ ଜଗ୍ମୁସ୍ଵମାଶ୍ରମମ୍ ॥ 1 ॥
ଆଶ୍ରମଂ ତମୁପାଗମ୍ୟ ରାଘଵସ୍ସହ ଲକ୍ଷ୍ମଣଃ ।
କୃତ୍ଵା ପୌର୍ଵାହ୍ଣିକଂ କର୍ମ ପର୍ଣଶାଲାମୁପାଗମତ୍ ॥ 2 ॥
ଉଵାସ ସୁଖିତସ୍ତତ୍ର ପୂଜ୍ୟମାନୋ ମହର୍ଷିଭିଃ ।
ଲକ୍ଷ୍ମଣେନ ସହ ଭ୍ରାତ୍ରା ଚକାର ଵିଵିଧାଃ କଥାଃ ॥ 3 ॥
ସ ରାମଃ ପର୍ଣଶାଲାୟାମାସୀନସ୍ସହ ସୀତୟା ।
ଵିରରାଜ ମହାବାହୁଶ୍ଚିତ୍ରୟା ଚଂଦ୍ରମାଃ ଇଵ ॥ 4 ॥
ତଦାଽଽସୀନସ୍ୟ ରାମସ୍ୟ କଥାସଂସକ୍ତଚେତସଃ ।
ତଂ ଦେଶଂ ରାକ୍ଷସୀ କାଚିଦାଜଗାମ ୟଦୃଚ୍ଛୟା ॥ 5 ॥
ସା ତୁ ଶୂର୍ପଣଖା ନାମ ଦଶଗ୍ରୀଵସ୍ୟ ରାକ୍ଷସଃ ।
ଭଗିନୀ ରାମମାସାଦ୍ୟ ଦଦର୍ଶ ତ୍ରିଦଶୋପମମ୍ ॥ 6 ॥
ସିଂହୋରସ୍କଂ ମହାବାହୁଂ ପଦ୍ମପତ୍ରନିଭେକ୍ଷଣମ୍ ।
ଆଜାନୁବାହୁଂ ଦୀପ୍ତାସ୍ୟମତୀଵ ପ୍ରିୟଦର୍ଶନମ୍ ॥ 7 ॥
ଗଜଵିକ୍ରାଂତଗମନଂ ଜଟାମଂଡଲଧାରିଣମ୍ ।
ସୁକୁମାରଂ ମହାସତ୍ତ୍ଵଂ ପାର୍ଥିଵଵ୍ୟଂଜନାନ୍ଵିତମ୍ ॥ 8 ॥
ରାମମିଂଦୀଵରଶ୍ୟାମଂ କଂଦର୍ପସଦୃଶପ୍ରଭମ୍ ।
ବଭୂଵେଂଦ୍ରୋପମଂ ଦୃଷ୍ଟ୍ଵା ରାକ୍ଷସୀ କାମମୋହିତା ॥ 9 ॥
ସୁମୁଖଂ ଦୁର୍ମୁଖୀ ରାମଂ ଵୃତ୍ତମଧ୍ୟଂ ମହୋଦରୀ ।
ଵିଶାଲାକ୍ଷଂ ଵିରୂପାକ୍ଷୀ ସୁକେଶଂ ତାମ୍ରମୂର୍ଧଜା ॥ 10 ॥
ପ୍ରୀତିରୂପଂ ଵିରୂପା ସା ସୁସ୍ଵରଂ ଭୈରଵସ୍ଵରା ।
ତରୁଣଂ ଦାରୁଣା ଵୃଦ୍ଧା ଦକ୍ଷିଣଂ ଵାମଭାଷିଣୀ ॥ 11 ॥
ନ୍ୟାୟଵୃତ୍ତଂ ସୁଦୁର୍ଵୃତ୍ତା ପ୍ରିୟମପ୍ରିୟଦର୍ଶନା ।
ଶରୀରଜସମାଵିଷ୍ଟା ରାକ୍ଷସୀ ଵାକ୍ୟମବ୍ରଵୀତ୍ ॥ 12 ॥
ଜଟୀ ତାପସରୂପେଣ ସଭାର୍ୟଶ୍ଶରଚାପଧୃତ୍ ।
ଆଗତସ୍ତ୍ଵମିମଂ ଦେଶଂ କଥଂ ରାକ୍ଷସସେଵିତମ୍ ॥ 13 ॥
କିମାଗମନକୃତ୍ୟଂ ତେ ତତ୍ତ୍ଵମାଖ୍ୟାତୁମର୍ହସି ।
ଏଵମୁକ୍ତସ୍ତୁ ରାକ୍ଷସ୍ୟା ଶୂର୍ପଣଖ୍ୟା ପରଂତପଃ ॥ 14 ॥
ଋଜୁବୁଦ୍ଧିତୟା ସର୍ଵମାଖ୍ୟାତୁମୁପଚକ୍ରମେ ।
ଅନୃତଂ ନ ହି ରାମସ୍ୟ କଦାଚିଦପି ସମ୍ମତମ୍ ॥ 15 ॥
ଵିଶେଷେଣାଽଶ୍ରମସ୍ଥସ୍ୟ ସମୀପେ ସ୍ତ୍ରୀଜନସ୍ୟ ଚ ।
ଆସୀଦ୍ଧଶରଥୋ ନାମ ରାଜା ତ୍ରିଦଶଵିକ୍ରମଃ ॥ 16 ॥
ତସ୍ୟାହମଗ୍ରଜଃ ପୁତ୍ରୋ ରାମୋ ନାମ ଜନୈଶ୍ଶ୍ରୁତଃ ।
ଭ୍ରାତାଽୟଂ ଲକ୍ଷ୍ମଣୋ ନାମ ୟଵୀୟାନ୍ମାମନୁଵ୍ରତଃ ॥ 17 ॥
ଇୟଂ ଭାର୍ୟା ଚ ଵୈଦେହୀ ମମ ସୀତେତି ଵିଶ୍ରୁତା ।
ନିୟୋଗାତ୍ ତୁ ନରେଂଦ୍ରସ୍ୟ ପିତୁର୍ମାତୁଶ୍ଚ ୟଂତ୍ରିତଃ ॥ 18 ॥
ଧର୍ମାର୍ଥଂ ଧର୍ମକାଂକ୍ଷୀ ଚ ଵନଂ ଵସ୍ତୁମିହାଗତଃ ।
ତ୍ଵାଂ ତୁ ଵେଦିତୁମିଚ୍ଛାମି କସ୍ୟ ତ୍ଵଂ କାସି କସ୍ୟ ଵା ॥ 19 ॥
ତ୍ଵଂ ହି ତାଵନ୍ମନୋଜ୍ଞାଂଗୀ ରାକ୍ଷସୀ ପ୍ରତିଭାସି ମେ ।
ଇହ ଵା କିଂନିମିତ୍ତଂ ତ୍ଵମାଗତା ବ୍ରୂହି ତତ୍ତ୍ଵତଃ ॥ 20 ॥
ସାବ୍ରଵୀଦ୍ ଵଚନଂ ଶ୍ରୁତ୍ଵା ରାକ୍ଷସୀ ମଦନାର୍ଦିତା ।
ଶ୍ରୂୟତାଂ ରାମ ଵକ୍ଷ୍ୟାମି ତତ୍ତ୍ଵାର୍ଥଂ ଵଚନଂ ମମ ॥ 21 ॥
ଅହଂ ଶୂର୍ପଣଖା ନାମ ରାକ୍ଷସୀ କାମରୂପିଣୀ ।
ଅରଣ୍ୟଂ ଵିଚରାମୀଦମେକା ସର୍ଵଭୟଂକରା ॥ 22 ॥
ରାଵଣୋ ନାମ ମେ ଭ୍ରାତା ବଲୀୟାନ୍ରାକ୍ଷସେଶ୍ଵରଃ ।
ଵୀରୋ ଵିଶ୍ରଵସଃ ପୁତ୍ରୋ ୟଦି ତେ ଶ୍ରୋତ୍ରମାଗତଃ ॥ 23 ॥
ପ୍ରଵୃଦ୍ଧନିଦ୍ରଶ୍ଚ ସଦା କୁଂଭକର୍ଣୋ ମହାବଲଃ ।
ଵିଭୀଷଣସ୍ତୁ ଧର୍ମାତ୍ମା ନ ତୁ ରାକ୍ଷସଚେଷ୍ଟିତଃ ॥ 24 ॥
ପ୍ରଖ୍ୟାତଵୀର୍ୟୌ ଚ ରଣେ ଭ୍ରାତରୌ ଖରଦୂଷଣୌ ।
ତାନହଂ ସମତିକ୍ରାଂତା ରାମ ତ୍ଵା ପୂର୍ଵଦର୍ଶନାତ୍ ॥ 25 ॥
ସମୁପେତାସ୍ମି ଭାଵେନ ଭର୍ତାରଂ ପୁରୁଷୋତ୍ତମମ୍ ।
ଅହଂ ପ୍ରଭାଵସଂପନ୍ନା ସ୍ଵଚ୍ଛଂଦବଲଗାମିନୀ ॥ 26 ॥
ଚିରାୟ ଭଵ ମେ ଭର୍ତା ସୀତୟା କିଂ କରିଷ୍ୟସି ।
ଵିକୃତା ଚ ଵିରୂପା ଚ ନ ଚେୟଂ ସଦୃଶୀ ତଵ ॥ 27 ॥
ଅହମେଵାନୁରୂପା ତେ ଭାର୍ୟା ରୂପେଣ ପଶ୍ୟ ମାମ୍ ।
ଇମାଂ ଵିରୂପାମସତୀଂ କରାଲାଂ ନିର୍ଣତୋଦରୀମ୍ ॥ 28 ॥
ଅନେନ ତେ ସହ ଭ୍ରାତ୍ରା ଭକ୍ଷୟିଷ୍ୟାମି ମାନୁଷୀମ୍ ।
ତତଃ ପର୍ଵତଶୃଂଗାଣି ଵନାନି ଵିଵିଧାନି ଚ ॥ 29 ॥
ପଶ୍ୟନ୍ସହ ମୟା କାଂତ ଦଂଡକାନ୍ଵିଚରିଷ୍ୟସି ।
ଇତ୍ୟେଵମୁକ୍ତଃ କାକୁତ୍ସ୍ଥଃ ପ୍ରହସ୍ୟ ମଦିରେକ୍ଷଣାମ୍ ॥ 30 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ସପ୍ତଦଶସ୍ସର୍ଗଃ ॥
