ශ්රීමද්වාල්මීකීය රාමායණේ අරණ්යකාංඩම් ।
අථ සප්තදශස්සර්ගඃ ।
කෘතාභිෂේකෝ රාමස්තු සීතා සෞමිත්රිරේව ච ।
තස්මාද්ගෝදාවරීතීරාත්තතෝ ජග්මුස්වමාශ්රමම් ॥ 1 ॥
ආශ්රමං තමුපාගම්ය රාඝවස්සහ ලක්ෂ්මණඃ ।
කෘත්වා පෞර්වාහ්ණිකං කර්ම පර්ණශාලාමුපාගමත් ॥ 2 ॥
උවාස සුඛිතස්තත්ර පූජ්යමානෝ මහර්ෂිභිඃ ।
ලක්ෂ්මණේන සහ භ්රාත්රා චකාර විවිධාඃ කථාඃ ॥ 3 ॥
ස රාමඃ පර්ණශාලායාමාසීනස්සහ සීතයා ।
විරරාජ මහාබාහුශ්චිත්රයා චංද්රමාඃ ඉව ॥ 4 ॥
තදාऽऽසීනස්ය රාමස්ය කථාසංසක්තචේතසඃ ।
තං දේශං රාක්ෂසී කාචිදාජගාම යදෘච්ඡයා ॥ 5 ॥
සා තු ශූර්පණඛා නාම දශග්රීවස්ය රාක්ෂසඃ ।
භගිනී රාමමාසාද්ය දදර්ශ ත්රිදශෝපමම් ॥ 6 ॥
සිංහෝරස්කං මහාබාහුං පද්මපත්රනිභේක්ෂණම් ।
ආජානුබාහුං දීප්තාස්යමතීව ප්රියදර්ශනම් ॥ 7 ॥
ගජවික්රාංතගමනං ජටාමංඩලධාරිණම් ।
සුකුමාරං මහාසත්ත්වං පාර්ථිවව්යංජනාන්විතම් ॥ 8 ॥
රාමමිංදීවරශ්යාමං කංදර්පසදෘශප්රභම් ।
බභූවේංද්රෝපමං දෘෂ්ට්වා රාක්ෂසී කාමමෝහිතා ॥ 9 ॥
සුමුඛං දුර්මුඛී රාමං වෘත්තමධ්යං මහෝදරී ।
විශාලාක්ෂං විරූපාක්ෂී සුකේශං තාම්රමූර්ධජා ॥ 10 ॥
ප්රීතිරූපං විරූපා සා සුස්වරං භෛරවස්වරා ।
තරුණං දාරුණා වෘද්ධා දක්ෂිණං වාමභාෂිණී ॥ 11 ॥
න්යායවෘත්තං සුදුර්වෘත්තා ප්රියමප්රියදර්ශනා ।
ශරීරජසමාවිෂ්ටා රාක්ෂසී වාක්යමබ්රවීත් ॥ 12 ॥
ජටී තාපසරූපේණ සභාර්යශ්ශරචාපධෘත් ।
ආගතස්ත්වමිමං දේශං කථං රාක්ෂසසේවිතම් ॥ 13 ॥
කිමාගමනකෘත්යං තේ තත්ත්වමාඛ්යාතුමර්හසි ।
ඒවමුක්තස්තු රාක්ෂස්යා ශූර්පණඛ්යා පරංතපඃ ॥ 14 ॥
ඍජුබුද්ධිතයා සර්වමාඛ්යාතුමුපචක්රමේ ।
අනෘතං න හි රාමස්ය කදාචිදපි සම්මතම් ॥ 15 ॥
විශේෂේණාऽශ්රමස්ථස්ය සමීපේ ස්ත්රීජනස්ය ච ।
ආසීද්ධශරථෝ නාම රාජා ත්රිදශවික්රමඃ ॥ 16 ॥
තස්යාහමග්රජඃ පුත්රෝ රාමෝ නාම ජනෛශ්ශ්රුතඃ ।
භ්රාතාऽයං ලක්ෂ්මණෝ නාම යවීයාන්මාමනුව්රතඃ ॥ 17 ॥
ඉයං භාර්යා ච වෛදේහී මම සීතේති විශ්රුතා ।
නියෝගාත් තු නරේංද්රස්ය පිතුර්මාතුශ්ච යංත්රිතඃ ॥ 18 ॥
ධර්මාර්ථං ධර්මකාංක්ෂී ච වනං වස්තුමිහාගතඃ ।
ත්වාං තු වේදිතුමිච්ඡාමි කස්ය ත්වං කාසි කස්ය වා ॥ 19 ॥
ත්වං හි තාවන්මනෝජ්ඤාංගී රාක්ෂසී ප්රතිභාසි මේ ।
ඉහ වා කිංනිමිත්තං ත්වමාගතා බ්රූහි තත්ත්වතඃ ॥ 20 ॥
සාබ්රවීද් වචනං ශ්රුත්වා රාක්ෂසී මදනාර්දිතා ।
ශ්රූයතාං රාම වක්ෂ්යාමි තත්ත්වාර්ථං වචනං මම ॥ 21 ॥
අහං ශූර්පණඛා නාම රාක්ෂසී කාමරූපිණී ।
අරණ්යං විචරාමීදමේකා සර්වභයංකරා ॥ 22 ॥
රාවණෝ නාම මේ භ්රාතා බලීයාන්රාක්ෂසේශ්වරඃ ।
වීරෝ විශ්රවසඃ පුත්රෝ යදි තේ ශ්රෝත්රමාගතඃ ॥ 23 ॥
ප්රවෘද්ධනිද්රශ්ච සදා කුංභකර්ණෝ මහාබලඃ ।
විභීෂණස්තු ධර්මාත්මා න තු රාක්ෂසචේෂ්ටිතඃ ॥ 24 ॥
ප්රඛ්යාතවීර්යෞ ච රණේ භ්රාතරෞ ඛරදූෂණෞ ।
තානහං සමතික්රාංතා රාම ත්වා පූර්වදර්ශනාත් ॥ 25 ॥
සමුපේතාස්මි භාවේන භර්තාරං පුරුෂෝත්තමම් ।
අහං ප්රභාවසංපන්නා ස්වච්ඡංදබලගාමිනී ॥ 26 ॥
චිරාය භව මේ භර්තා සීතයා කිං කරිෂ්යසි ।
විකෘතා ච විරූපා ච න චේයං සදෘශී තව ॥ 27 ॥
අහමේවානුරූපා තේ භාර්යා රූපේණ පශ්ය මාම් ।
ඉමාං විරූපාමසතීං කරාලාං නිර්ණතෝදරීම් ॥ 28 ॥
අනේන තේ සහ භ්රාත්රා භක්ෂයිෂ්යාමි මානුෂීම් ।
තතඃ පර්වතශෘංගාණි වනානි විවිධානි ච ॥ 29 ॥
පශ්යන්සහ මයා කාංත දංඩකාන්විචරිෂ්යසි ।
ඉත්යේවමුක්තඃ කාකුත්ස්ථඃ ප්රහස්ය මදිරේක්ෂණාම් ॥ 30 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ සප්තදශස්සර්ගඃ ॥
