śrīmadvālmīkīya rāmāyaṇē araṇyakāṇḍam ।
atha saptadaśassargaḥ ।
kṛtābhiṣēkō rāmastu sītā saumitrirēva cha ।
tasmādgōdāvarītīrāttatō jagmusvamāśramam ॥ 1 ॥
āśramaṃ tamupāgamya rāghavassaha lakṣmaṇaḥ ।
kṛtvā paurvāhṇikaṃ karma parṇaśālāmupāgamat ॥ 2 ॥
uvāsa sukhitastatra pūjyamānō maharṣibhiḥ ।
lakṣmaṇēna saha bhrātrā chakāra vividhāḥ kathāḥ ॥ 3 ॥
sa rāmaḥ parṇaśālāyāmāsīnassaha sītayā ।
virarāja mahābāhuśchitrayā chandramāḥ iva ॥ 4 ॥
tadā''sīnasya rāmasya kathāsaṃsaktachētasaḥ ।
taṃ dēśaṃ rākṣasī kāchidājagāma yadṛchChayā ॥ 5 ॥
sā tu śūrpaṇakhā nāma daśagrīvasya rākṣasaḥ ।
bhaginī rāmamāsādya dadarśa tridaśōpamam ॥ 6 ॥
siṃhōraskaṃ mahābāhuṃ padmapatranibhēkṣaṇam ।
ājānubāhuṃ dīptāsyamatīva priyadarśanam ॥ 7 ॥
gajavikrāntagamanaṃ jaṭāmaṇḍaladhāriṇam ।
sukumāraṃ mahāsattvaṃ pārthivavyañjanānvitam ॥ 8 ॥
rāmamindīvaraśyāmaṃ kandarpasadṛśaprabham ।
babhūvēndrōpamaṃ dṛṣṭvā rākṣasī kāmamōhitā ॥ 9 ॥
sumukhaṃ durmukhī rāmaṃ vṛttamadhyaṃ mahōdarī ।
viśālākṣaṃ virūpākṣī sukēśaṃ tāmramūrdhajā ॥ 10 ॥
prītirūpaṃ virūpā sā susvaraṃ bhairavasvarā ।
taruṇaṃ dāruṇā vṛddhā dakṣiṇaṃ vāmabhāṣiṇī ॥ 11 ॥
nyāyavṛttaṃ sudurvṛttā priyamapriyadarśanā ।
śarīrajasamāviṣṭā rākṣasī vākyamabravīt ॥ 12 ॥
jaṭī tāpasarūpēṇa sabhāryaśśarachāpadhṛt ।
āgatastvamimaṃ dēśaṃ kathaṃ rākṣasasēvitam ॥ 13 ॥
kimāgamanakṛtyaṃ tē tattvamākhyātumarhasi ।
ēvamuktastu rākṣasyā śūrpaṇakhyā parantapaḥ ॥ 14 ॥
ṛjubuddhitayā sarvamākhyātumupachakramē ।
anṛtaṃ na hi rāmasya kadāchidapi sammatam ॥ 15 ॥
viśēṣēṇā'śramasthasya samīpē strījanasya cha ।
āsīddhaśarathō nāma rājā tridaśavikramaḥ ॥ 16 ॥
tasyāhamagrajaḥ putrō rāmō nāma janaiśśrutaḥ ।
bhrātā'yaṃ lakṣmaṇō nāma yavīyānmāmanuvrataḥ ॥ 17 ॥
iyaṃ bhāryā cha vaidēhī mama sītēti viśrutā ।
niyōgāt tu narēndrasya piturmātuścha yantritaḥ ॥ 18 ॥
dharmārthaṃ dharmakāṅkṣī cha vanaṃ vastumihāgataḥ ।
tvāṃ tu vēditumichChāmi kasya tvaṃ kāsi kasya vā ॥ 19 ॥
tvaṃ hi tāvanmanōjñāṅgī rākṣasī pratibhāsi mē ।
iha vā kinnimittaṃ tvamāgatā brūhi tattvataḥ ॥ 20 ॥
sābravīd vachanaṃ śrutvā rākṣasī madanārditā ।
śrūyatāṃ rāma vakṣyāmi tattvārthaṃ vachanaṃ mama ॥ 21 ॥
ahaṃ śūrpaṇakhā nāma rākṣasī kāmarūpiṇī ।
araṇyaṃ vicharāmīdamēkā sarvabhayaṅkarā ॥ 22 ॥
rāvaṇō nāma mē bhrātā balīyānrākṣasēśvaraḥ ।
vīrō viśravasaḥ putrō yadi tē śrōtramāgataḥ ॥ 23 ॥
pravṛddhanidraścha sadā kumbhakarṇō mahābalaḥ ।
vibhīṣaṇastu dharmātmā na tu rākṣasachēṣṭitaḥ ॥ 24 ॥
prakhyātavīryau cha raṇē bhrātarau kharadūṣaṇau ।
tānahaṃ samatikrāntā rāma tvā pūrvadarśanāt ॥ 25 ॥
samupētāsmi bhāvēna bhartāraṃ puruṣōttamam ।
ahaṃ prabhāvasampannā svachChandabalagāminī ॥ 26 ॥
chirāya bhava mē bhartā sītayā kiṃ kariṣyasi ।
vikṛtā cha virūpā cha na chēyaṃ sadṛśī tava ॥ 27 ॥
ahamēvānurūpā tē bhāryā rūpēṇa paśya mām ।
imāṃ virūpāmasatīṃ karālāṃ nirṇatōdarīm ॥ 28 ॥
anēna tē saha bhrātrā bhakṣayiṣyāmi mānuṣīm ।
tataḥ parvataśṛṅgāṇi vanāni vividhāni cha ॥ 29 ॥
paśyansaha mayā kānta daṇḍakānvichariṣyasi ।
ityēvamuktaḥ kākutsthaḥ prahasya madirēkṣaṇām ॥ 30 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē saptadaśassargaḥ ॥
