శ్రీమద్వాల్మీకీయ రామాయణే అరణ్యకాండమ్ ।
అథ సప్తదశస్సర్గః ।
కృతాభిషేకో రామస్తు సీతా సౌమిత్రిరేవ చ ।
తస్మాద్గోదావరీతీరాత్తతో జగ్ముస్వమాశ్రమమ్ ॥ 1 ॥
ఆశ్రమం తముపాగమ్య రాఘవస్సహ లక్ష్మణః ।
కృత్వా పౌర్వాహ్ణికం కర్మ పర్ణశాలాముపాగమత్ ॥ 2 ॥
ఉవాస సుఖితస్తత్ర పూజ్యమానో మహర్షిభిః ।
లక్ష్మణేన సహ భ్రాత్రా చకార వివిధాః కథాః ॥ 3 ॥
స రామః పర్ణశాలాయామాసీనస్సహ సీతయా ।
విరరాజ మహాబాహుశ్చిత్రయా చంద్రమాః ఇవ ॥ 4 ॥
తదాఽఽసీనస్య రామస్య కథాసంసక్తచేతసః ।
తం దేశం రాక్షసీ కాచిదాజగామ యదృచ్ఛయా ॥ 5 ॥
సా తు శూర్పణఖా నామ దశగ్రీవస్య రాక్షసః ।
భగినీ రామమాసాద్య దదర్శ త్రిదశోపమమ్ ॥ 6 ॥
సింహోరస్కం మహాబాహుం పద్మపత్రనిభేక్షణమ్ ।
ఆజానుబాహుం దీప్తాస్యమతీవ ప్రియదర్శనమ్ ॥ 7 ॥
గజవిక్రాంతగమనం జటామండలధారిణమ్ ।
సుకుమారం మహాసత్త్వం పార్థివవ్యంజనాన్వితమ్ ॥ 8 ॥
రామమిందీవరశ్యామం కందర్పసదృశప్రభమ్ ।
బభూవేంద్రోపమం దృష్ట్వా రాక్షసీ కామమోహితా ॥ 9 ॥
సుముఖం దుర్ముఖీ రామం వృత్తమధ్యం మహోదరీ ।
విశాలాక్షం విరూపాక్షీ సుకేశం తామ్రమూర్ధజా ॥ 10 ॥
ప్రీతిరూపం విరూపా సా సుస్వరం భైరవస్వరా ।
తరుణం దారుణా వృద్ధా దక్షిణం వామభాషిణీ ॥ 11 ॥
న్యాయవృత్తం సుదుర్వృత్తా ప్రియమప్రియదర్శనా ।
శరీరజసమావిష్టా రాక్షసీ వాక్యమబ్రవీత్ ॥ 12 ॥
జటీ తాపసరూపేణ సభార్యశ్శరచాపధృత్ ।
ఆగతస్త్వమిమం దేశం కథం రాక్షససేవితమ్ ॥ 13 ॥
కిమాగమనకృత్యం తే తత్త్వమాఖ్యాతుమర్హసి ।
ఏవముక్తస్తు రాక్షస్యా శూర్పణఖ్యా పరంతపః ॥ 14 ॥
ఋజుబుద్ధితయా సర్వమాఖ్యాతుముపచక్రమే ।
అనృతం న హి రామస్య కదాచిదపి సమ్మతమ్ ॥ 15 ॥
విశేషేణాఽశ్రమస్థస్య సమీపే స్త్రీజనస్య చ ।
ఆసీద్ధశరథో నామ రాజా త్రిదశవిక్రమః ॥ 16 ॥
తస్యాహమగ్రజః పుత్రో రామో నామ జనైశ్శ్రుతః ।
భ్రాతాఽయం లక్ష్మణో నామ యవీయాన్మామనువ్రతః ॥ 17 ॥
ఇయం భార్యా చ వైదేహీ మమ సీతేతి విశ్రుతా ।
నియోగాత్ తు నరేంద్రస్య పితుర్మాతుశ్చ యంత్రితః ॥ 18 ॥
ధర్మార్థం ధర్మకాంక్షీ చ వనం వస్తుమిహాగతః ।
త్వాం తు వేదితుమిచ్ఛామి కస్య త్వం కాసి కస్య వా ॥ 19 ॥
త్వం హి తావన్మనోజ్ఞాంగీ రాక్షసీ ప్రతిభాసి మే ।
ఇహ వా కింనిమిత్తం త్వమాగతా బ్రూహి తత్త్వతః ॥ 20 ॥
సాబ్రవీద్ వచనం శ్రుత్వా రాక్షసీ మదనార్దితా ।
శ్రూయతాం రామ వక్ష్యామి తత్త్వార్థం వచనం మమ ॥ 21 ॥
అహం శూర్పణఖా నామ రాక్షసీ కామరూపిణీ ।
అరణ్యం విచరామీదమేకా సర్వభయంకరా ॥ 22 ॥
రావణో నామ మే భ్రాతా బలీయాన్రాక్షసేశ్వరః ।
వీరో విశ్రవసః పుత్రో యది తే శ్రోత్రమాగతః ॥ 23 ॥
ప్రవృద్ధనిద్రశ్చ సదా కుంభకర్ణో మహాబలః ।
విభీషణస్తు ధర్మాత్మా న తు రాక్షసచేష్టితః ॥ 24 ॥
ప్రఖ్యాతవీర్యౌ చ రణే భ్రాతరౌ ఖరదూషణౌ ।
తానహం సమతిక్రాంతా రామ త్వా పూర్వదర్శనాత్ ॥ 25 ॥
సముపేతాస్మి భావేన భర్తారం పురుషోత్తమమ్ ।
అహం ప్రభావసంపన్నా స్వచ్ఛందబలగామినీ ॥ 26 ॥
చిరాయ భవ మే భర్తా సీతయా కిం కరిష్యసి ।
వికృతా చ విరూపా చ న చేయం సదృశీ తవ ॥ 27 ॥
అహమేవానురూపా తే భార్యా రూపేణ పశ్య మామ్ ।
ఇమాం విరూపామసతీం కరాలాం నిర్ణతోదరీమ్ ॥ 28 ॥
అనేన తే సహ భ్రాత్రా భక్షయిష్యామి మానుషీమ్ ।
తతః పర్వతశృంగాణి వనాని వివిధాని చ ॥ 29 ॥
పశ్యన్సహ మయా కాంత దండకాన్విచరిష్యసి ।
ఇత్యేవముక్తః కాకుత్స్థః ప్రహస్య మదిరేక్షణామ్ ॥ 30 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అరణ్యకాండే సప్తదశస్సర్గః ॥
