ශ්රීමද්වාල්මීකීය රාමායණේ අරණ්යකාංඩම් ।
අථ ඒකෝනත්රිංශස්සර්ගඃ ।
ඛරං තු විරථං රාමෝ ගදාපාණිමවස්ථිතම් ।
මෘදුපූර්වං මහාතේජාඃ පරුෂං වාක්යමබ්රවීත් ॥ 1 ॥
ගජාශ්වරථසංබාධේ බලේ මහති තිෂ්ඨතා ।
කෘතං සුදාරුණං කර්ම සර්වලෝකජුගුප්සිතම් ॥ 2 ॥
උද්වේජනීයෝ භූතානාං නෘශංසඃ පාපකර්මකෘත් ।
ත්රයාණාමපි ලෝකානාමීශ්වරෝऽපි න තිෂ්ඨති ॥ 3 ॥
කර්ම ලෝකවිරුද්ධං තු කුර්වාණං ක්ෂණදාචර ।
තීක්ෂ්ණං සර්වජනෝ හංති සර්පං දුෂ්ටමිවාගතම් ॥ 4 ॥
ලෝභාත්පාපානි කුර්වාණඃ කාමාද්වා යෝ න බුධ්යතේ ।
භ්රෂ්ටඃ පශ්යති තස්යාංතං බ්රාහ්මණී කරකාදිව ॥ 5 ॥
වසතෝ දංඩකාරණ්යේ තාපසාංධර්මචාරිණඃ ।
කින්නු හත්වා මහාභාගාන්ඵලං ප්රාප්ස්යසි රාක්ෂස ॥ 6 ॥
න චිරං පාපකර්මාණඃ ක්රූරා ලෝකජුගුප්සිතාඃ ।
ඓශ්වර්යං ප්රාප්ය තිෂ්ඨංති ශීර්ණමූලා ඉව ද්රුමාඃ ॥ 7 ॥
අවශ්යං ලභතේ ජංතුඃ ඵලං පාපස්ය කර්මණඃ ।
ඝෝරං පර්යාගතේ කාලේ ද්රුමාඃ පුෂ්පමිවාර්තවම් ॥ 8 ॥
නචිරාත්ප්රාප්යතේ ලෝකේ පාපානාං කර්මණාං ඵලම් ।
සවිෂාණාමිවාන්නානාං භුක්තානාං ක්ෂණදාචර ॥ 9 ॥
පාපමාචරතාං ඝෝරං ලෝකස්යාප්රියමිච්ඡතාම් ।
අහමාසාදිතෝ රාජා ප්රාණාන්හංතුං නිශාචර ॥ 10 ॥
අද්ය හි ත්වාං මයා මුක්තාශ්ශරාඃ කාංචනභූෂණාඃ ।
විදාර්යාතිපතිෂ්යංති වල්මීකමිව පන්නගාඃ ॥ 11 ॥
යේ ත්වයා දංඩකාරණ්යේ භක්ෂිතා ධර්මචාරිණඃ ।
තානද්ය නිහතස්සංඛ්යේ සසෛන්යෝऽනුගමිෂ්යසි ॥ 12 ॥
අද්ය ත්වාං නිහතං බාණෛඃ පශ්යංතු පරමර්ෂයඃ ।
නිරයස්ථං විමානස්ථා යේ ත්වයා හිංසිතාඃ පුරා ॥ 13 ॥
ප්රහර ත්වං යථාකාමං කුරු යත්නං කුලාධම ।
අද්ය තේ පාතයිෂ්යාමි ශිරස්තාලඵලං යථා ॥ 14 ॥
ඒවමුක්තස්තු රාමේණ කෘද්ධස්සංරක්තලෝචනඃ ।
ප්රත්යුවාච ඛරෝ රාමං ප්රහසන්ක්රෝධමූර්ඡිතඃ ॥ 15 ॥
ප්රාකෘතාන්රාක්ෂසාන්හත්වා යුද්ධේ දශරථාත්මජ ।
ආත්මනා කථමාත්මානමප්රශස්යං ප්රශංසසි ॥ 16 ॥
වික්රාංතා බලවංතෝ වා යේ භවංති නරර්ෂභාඃ ।
කථයංති න තේ කිංචිත්තේජසා ස්වේන ගර්විතාඃ ॥ 17 ॥
ප්රාකෘතාස්ත්වකෘතාත්මානෝ ලෝකේ ක්ෂත්රියපාංසනාඃ ।
නිරර්ථකං විකත්ථංතේ යථා රාම විකත්ථසේ ॥ 18 ॥
කුලං ව්යපදිශන්වීරස්සමරේ කෝऽභිධාස්යති ।
මෘත්යුකාලේ හි සංප්රාප්තේ ස්වයමප්රස්තවේ ස්තවම් ॥ 19 ॥
සර්වථෛව ලඝුත්වං තේ කත්ථනේන විදර්ශිතම් ।
සුවර්ණප්රතිරූපේණ තප්තේනේව කුශාග්නිනා ॥ 20 ॥
න තු මාමිහ තිෂ්ඨංතං පශ්යසි ත්වං ගදාධරම් ।
ධරාධරමිවාකංප්යං පර්වතං ධාතුභිශ්චිතම් ॥ 21 ॥
පර්යාප්තෝऽහං ගදාපාණිර්හංතුං ප්රාණාන්රණේ තව ।
ත්රයාණාමපි ලෝකානාං පාශහස්ත ඉවාංතකඃ ॥ 22 ॥
කාමං බහ්වපි වක්තව්යං ත්වයි වක්ෂ්යාමි න ත්වහම් ।
අස්තං ගච්ඡේද්ධි සවිතා යුද්ධවිඝ්නස්තතෝ භවේත් ॥ 23 ॥
චතුර්දශ සහස්රාණි රාක්ෂසානාං හතානි තේ ।
ත්වද්විනාශාත්කරෝම්යේෂාං තේෂාමශ්රුප්රමාර්ජනම් ॥ 24 ॥
ඉත්යුක්ත්වා පරමක්රුද්ධස්තාං ගදාං පරමාංගදඃ ।
ඛරශ්චික්ෂේප රාමාය ප්රදීප්තාමශනිං යථා ॥ 25 ॥
ඛරබාහුප්රයුක්තා සා ප්රදීප්තා මහතී ගදා ।
භස්මවෘක්ෂාංශ්ච ගුල්මාංශ්ච කෘත්වාගාත්තත්සමීපතඃ ॥ 26 ॥
තාමාපතංතීං ජ්වලතාං මෘත්යුපාශෝපමාං ගදාම් ।
අංතරික්ෂගතාං රාමචශිච්ඡේද බහුධා ශරෛඃ ॥ 27 ॥
සා විකීර්ණා ශරෛර්භග්නා පපාත ධරණීතලේ ।
ගදා මංත්රෞෂධබලෛර්ව්යාලීව විනිපාතිතා ॥ 28 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ඒකෝනත්රිංශස්සර්ගඃ ॥
