ശ്രീമദ്വാല്മീകീയ രാമായണേ അരണ്യകാംഡമ് ।
അഥ ഏകോനത്രിംശസ്സര്ഗഃ ।
ഖരം തു വിരഥം രാമോ ഗദാപാണിമവസ്ഥിതമ് ।
മൃദുപൂർവം മഹാതേജാഃ പരുഷം വാക്യമബ്രവീത് ॥ 1 ॥
ഗജാശ്വരഥസംബാധേ ബലേ മഹതി തിഷ്ഠതാ ।
കൃതം സുദാരുണം കര്മ സർവലോകജുഗുപ്സിതമ് ॥ 2 ॥
ഉദ്വേജനീയോ ഭൂതാനാം നൃശംസഃ പാപകര്മകൃത് ।
ത്രയാണാമപി ലോകാനാമീശ്വരോഽപി ന തിഷ്ഠതി ॥ 3 ॥
കര്മ ലോകവിരുദ്ധം തു കുർവാണം ക്ഷണദാചര ।
തീക്ഷ്ണം സർവജനോ ഹംതി സര്പം ദുഷ്ടമിവാഗതമ് ॥ 4 ॥
ലോഭാത്പാപാനി കുർവാണഃ കാമാദ്വാ യോ ന ബുധ്യതേ ।
ഭ്രഷ്ടഃ പശ്യതി തസ്യാംതം ബ്രാഹ്മണീ കരകാദിവ ॥ 5 ॥
വസതോ ദംഡകാരണ്യേ താപസാംധര്മചാരിണഃ ।
കിന്നു ഹത്വാ മഹാഭാഗാന്ഫലം പ്രാപ്സ്യസി രാക്ഷസ ॥ 6 ॥
ന ചിരം പാപകര്മാണഃ ക്രൂരാ ലോകജുഗുപ്സിതാഃ ।
ഐശ്വര്യം പ്രാപ്യ തിഷ്ഠംതി ശീര്ണമൂലാ ഇവ ദ്രുമാഃ ॥ 7 ॥
അവശ്യം ലഭതേ ജംതുഃ ഫലം പാപസ്യ കര്മണഃ ।
ഘോരം പര്യാഗതേ കാലേ ദ്രുമാഃ പുഷ്പമിവാര്തവമ് ॥ 8 ॥
നചിരാത്പ്രാപ്യതേ ലോകേ പാപാനാം കര്മണാം ഫലമ് ।
സവിഷാണാമിവാന്നാനാം ഭുക്താനാം ക്ഷണദാചര ॥ 9 ॥
പാപമാചരതാം ഘോരം ലോകസ്യാപ്രിയമിച്ഛതാമ് ।
അഹമാസാദിതോ രാജാ പ്രാണാന്ഹംതും നിശാചര ॥ 10 ॥
അദ്യ ഹി ത്വാം മയാ മുക്താശ്ശരാഃ കാംചനഭൂഷണാഃ ।
വിദാര്യാതിപതിഷ്യംതി വല്മീകമിവ പന്നഗാഃ ॥ 11 ॥
യേ ത്വയാ ദംഡകാരണ്യേ ഭക്ഷിതാ ധര്മചാരിണഃ ।
താനദ്യ നിഹതസ്സംഖ്യേ സസൈന്യോഽനുഗമിഷ്യസി ॥ 12 ॥
അദ്യ ത്വാം നിഹതം ബാണൈഃ പശ്യംതു പരമര്ഷയഃ ।
നിരയസ്ഥം വിമാനസ്ഥാ യേ ത്വയാ ഹിംസിതാഃ പുരാ ॥ 13 ॥
പ്രഹര ത്വം യഥാകാമം കുരു യത്നം കുലാധമ ।
അദ്യ തേ പാതയിഷ്യാമി ശിരസ്താലഫലം യഥാ ॥ 14 ॥
ഏവമുക്തസ്തു രാമേണ കൃദ്ധസ്സംരക്തലോചനഃ ।
പ്രത്യുവാച ഖരോ രാമം പ്രഹസന്ക്രോധമൂര്ഛിതഃ ॥ 15 ॥
പ്രാകൃതാന്രാക്ഷസാന്ഹത്വാ യുദ്ധേ ദശരഥാത്മജ ।
ആത്മനാ കഥമാത്മാനമപ്രശസ്യം പ്രശംസസി ॥ 16 ॥
വിക്രാംതാ ബലവംതോ വാ യേ ഭവംതി നരര്ഷഭാഃ ।
കഥയംതി ന തേ കിംചിത്തേജസാ സ്വേന ഗർവിതാഃ ॥ 17 ॥
പ്രാകൃതാസ്ത്വകൃതാത്മാനോ ലോകേ ക്ഷത്രിയപാംസനാഃ ।
നിരര്ഥകം വികത്ഥംതേ യഥാ രാമ വികത്ഥസേ ॥ 18 ॥
കുലം വ്യപദിശന്വീരസ്സമരേ കോഽഭിധാസ്യതി ।
മൃത്യുകാലേ ഹി സംപ്രാപ്തേ സ്വയമപ്രസ്തവേ സ്തവമ് ॥ 19 ॥
സർവഥൈവ ലഘുത്വം തേ കത്ഥനേന വിദര്ശിതമ് ।
സുവര്ണപ്രതിരൂപേണ തപ്തേനേവ കുശാഗ്നിനാ ॥ 20 ॥
ന തു മാമിഹ തിഷ്ഠംതം പശ്യസി ത്വം ഗദാധരമ് ।
ധരാധരമിവാകംപ്യം പർവതം ധാതുഭിശ്ചിതമ് ॥ 21 ॥
പര്യാപ്തോഽഹം ഗദാപാണിര്ഹംതും പ്രാണാന്രണേ തവ ।
ത്രയാണാമപി ലോകാനാം പാശഹസ്ത ഇവാംതകഃ ॥ 22 ॥
കാമം ബഹ്വപി വക്തവ്യം ത്വയി വക്ഷ്യാമി ന ത്വഹമ് ।
അസ്തം ഗച്ഛേദ്ധി സവിതാ യുദ്ധവിഘ്നസ്തതോ ഭവേത് ॥ 23 ॥
ചതുര്ദശ സഹസ്രാണി രാക്ഷസാനാം ഹതാനി തേ ।
ത്വദ്വിനാശാത്കരോമ്യേഷാം തേഷാമശ്രുപ്രമാര്ജനമ് ॥ 24 ॥
ഇത്യുക്ത്വാ പരമക്രുദ്ധസ്താം ഗദാം പരമാംഗദഃ ।
ഖരശ്ചിക്ഷേപ രാമായ പ്രദീപ്താമശനിം യഥാ ॥ 25 ॥
ഖരബാഹുപ്രയുക്താ സാ പ്രദീപ്താ മഹതീ ഗദാ ।
ഭസ്മവൃക്ഷാംശ്ച ഗുല്മാംശ്ച കൃത്വാഗാത്തത്സമീപതഃ ॥ 26 ॥
താമാപതംതീം ജ്വലതാം മൃത്യുപാശോപമാം ഗദാമ് ।
അംതരിക്ഷഗതാം രാമചശിച്ഛേദ ബഹുധാ ശരൈഃ ॥ 27 ॥
സാ വികീര്ണാ ശരൈര്ഭഗ്നാ പപാത ധരണീതലേ ।
ഗദാ മംത്രൌഷധബലൈർവ്യാലീവ വിനിപാതിതാ ॥ 28 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ഏകോനത്രിംശസ്സര്ഗഃ ॥
