শ্রীমদ্বাল্মীকীয় রামাযণে অরণ্যকাংডম্ ।
অথ একোনত্রিংশস্সর্গঃ ।
খরং তু বিরথং রামো গদাপাণিমবস্থিতম্ ।
মৃদুপূর্বং মহাতেজাঃ পরুষং বাক্যমব্রবীত্ ॥ 1 ॥
গজাশ্বরথসংবাধে বলে মহতি তিষ্ঠতা ।
কৃতং সুদারুণং কর্ম সর্বলোকজুগুপ্সিতম্ ॥ 2 ॥
উদ্বেজনীয়ো ভূতানাং নৃশংসঃ পাপকর্মকৃত্ ।
ত্রয়াণামপি লোকানামীশ্বরোঽপি ন তিষ্ঠতি ॥ 3 ॥
কর্ম লোকবিরুদ্ধং তু কুর্বাণং ক্ষণদাচর ।
তীক্ষ্ণং সর্বজনো হংতি সর্পং দুষ্টমিবাগতম্ ॥ 4 ॥
লোভাত্পাপানি কুর্বাণঃ কামাদ্বা যো ন বুধ্যতে ।
ভ্রষ্টঃ পশ্যতি তস্য়াংতং ব্রাহ্মণী করকাদিব ॥ 5 ॥
বসতো দংডকারণ্য়ে তাপসাংধর্মচারিণঃ ।
কিন্নু হত্বা মহাভাগান্ফলং প্রাপ্স্যসি রাক্ষস ॥ 6 ॥
ন চিরং পাপকর্মাণঃ ক্রূরা লোকজুগুপ্সিতাঃ ।
ঐশ্বর্য়ং প্রাপ্য় তিষ্ঠংতি শীর্ণমূলা ইব দ্রুমাঃ ॥ 7 ॥
অবশ্য়ং লভতে জংতুঃ ফলং পাপস্য় কর্মণঃ ।
ঘোরং পর্য়াগতে কালে দ্রুমাঃ পুষ্পমিবার্তবম্ ॥ 8 ॥
নচিরাত্প্রাপ্যতে লোকে পাপানাং কর্মণাং ফলম্ ।
সবিষাণামিবান্নানাং ভুক্তানাং ক্ষণদাচর ॥ 9 ॥
পাপমাচরতাং ঘোরং লোকস্য়াপ্রিযমিচ্ছতাম্ ।
অহমাসাদিতো রাজা প্রাণান্হংতুং নিশাচর ॥ 10 ॥
অদ্য় হি ত্বাং ময়া মুক্তাশ্শরাঃ কাংচনভূষণাঃ ।
বিদার্য়াতিপতিষ্য়ংতি বল্মীকমিব পন্নগাঃ ॥ 11 ॥
যে ত্বয়া দংডকারণ্য়ে ভক্ষিতা ধর্মচারিণঃ ।
তানদ্য় নিহতস্সংখ্য়ে সসৈন্য়োঽনুগমিষ্যসি ॥ 12 ॥
অদ্য় ত্বাং নিহতং বাণৈঃ পশ্য়ংতু পরমর্ষয়ঃ ।
নিরযস্থং বিমানস্থা যে ত্বয়া হিংসিতাঃ পুরা ॥ 13 ॥
প্রহর ত্বং যথাকামং কুরু যত্নং কুলাধম ।
অদ্য় তে পাতয়িষ্য়ামি শিরস্তালফলং যথা ॥ 14 ॥
এবমুক্তস্তু রামেণ কৃদ্ধস্সংরক্তলোচনঃ ।
প্রত্য়ুবাচ খরো রামং প্রহসন্ক্রোধমূর্ছিতঃ ॥ 15 ॥
প্রাকৃতান্রাক্ষসান্হত্বা যুদ্ধে দশরথাত্মজ ।
আত্মনা কথমাত্মানমপ্রশস্য়ং প্রশংসসি ॥ 16 ॥
বিক্রাংতা বলবংতো বা যে ভবংতি নরর্ষভাঃ ।
কথয়ংতি ন তে কিংচিত্তেজসা স্বেন গর্বিতাঃ ॥ 17 ॥
প্রাকৃতাস্ত্বকৃতাত্মানো লোকে ক্ষত্রিযপাংসনাঃ ।
নিরর্থকং বিকত্থংতে যথা রাম বিকত্থসে ॥ 18 ॥
কুলং ব্যপদিশন্বীরস্সমরে কোঽভিধাস্যতি ।
মৃত্য়ুকালে হি সংপ্রাপ্তে স্বযমপ্রস্তবে স্তবম্ ॥ 19 ॥
সর্বথৈব লঘুত্বং তে কত্থনেন বিদর্শিতম্ ।
সুবর্ণপ্রতিরূপেণ তপ্তেনেব কুশাগ্নিনা ॥ 20 ॥
ন তু মামিহ তিষ্ঠংতং পশ্যসি ত্বং গদাধরম্ ।
ধরাধরমিবাকংপ্য়ং পর্বতং ধাতুভিশ্চিতম্ ॥ 21 ॥
পর্য়াপ্তোঽহং গদাপাণির্হংতুং প্রাণান্রণে তব ।
ত্রয়াণামপি লোকানাং পাশহস্ত ইবাংতকঃ ॥ 22 ॥
কামং বহ্বপি বক্তব্য়ং ত্বয়ি বক্ষ্য়ামি ন ত্বহম্ ।
অস্তং গচ্ছেদ্ধি সবিতা যুদ্ধবিঘ্নস্ততো ভবেত্ ॥ 23 ॥
চতুর্দশ সহস্রাণি রাক্ষসানাং হতানি তে ।
ত্বদ্বিনাশাত্করোম্য়েষাং তেষামশ্রুপ্রমার্জনম্ ॥ 24 ॥
ইত্য়ুক্ত্বা পরমক্রুদ্ধস্তাং গদাং পরমাংগদঃ ।
খরশ্চিক্ষেপ রামায় প্রদীপ্তামশনিং যথা ॥ 25 ॥
খরবাহুপ্রয়ুক্তা সা প্রদীপ্তা মহতী গদা ।
ভস্মবৃক্ষাংশ্চ গুল্মাংশ্চ কৃত্বাগাত্তত্সমীপতঃ ॥ 26 ॥
তামাপতংতীং জ্বলতাং মৃত্য়ুপাশোপমাং গদাম্ ।
অংতরিক্ষগতাং রামচশিচ্ছেদ বহুধা শরৈঃ ॥ 27 ॥
সা বিকীর্ণা শরৈর্ভগ্না পপাত ধরণীতলে ।
গদা মংত্রৌষধবলৈর্ব্য়ালীব বিনিপাতিতা ॥ 28 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে একোনত্রিংশস্সর্গঃ ॥
