ශ්රීමද්වාල්මීකීය රාමායණේ අරණ්යකාංඩම් ।
අථ අෂ්ටචත්වාරිංශස්සර්ගඃ ।
ඒවං බෘවංත්යාං සීතායාං සංරබ්දඃ පරුෂං වචඃ ।
ලලාටේ භෘකුටීං කෘත්වා රාවණඃ ප්රත්යුවාච හ ॥ 1 ॥
භ්රාතා වෛශ්රවණස්යාහං සාපත්න්යෝ වරවර්ණිනි ।
රාවණෝ නාම භද්රං තේ දශග්රීවඃ ප්රතාපවාන් ॥ 2 ॥
යස්ය දේවාස්සගංධර්වාඃ පිශාචපතගෝරගාඃ ।
විද්රවංති භයාද්භීතා මෘත්යෝරිව සදා ප්රජාඃ ॥ 3 ॥
යේන වෛශ්රවණෝ රාජා ද්වෛමාත්රඃ කාරණාංතරේ ।
ද්වංද්වමාසාදිතඃ ක්රෝධාද්රණේ වික්රම්ය නිර්ජිතඃ ॥ 4 ॥
යද්භයාර්තඃ පරිත්යජ්ය ස්වමධිෂ්ඨානමෘද්ධිමත් ।
කෛලාසං පර්වතශ්රේෂ්ඨමධ්යාස්තේ නරවාහනඃ ॥ 5 ॥
යස්ය තත්පුෂ්පකං නාම විමානං කාමගං ශුභම් ।
වීර්යාදේවාර්ජිතං භද්රේ යේන යාමි විහායසම් ॥ 6 ॥
මම සංජාතරෝෂස්ය මුඛං දෘෂ්ට්වෛව මෛථිලි ।
විද්රවංති පරිත්රස්තාස්සුරාශ්ශක්රපුරෝගමාඃ ॥ 7 ॥
යත්ර තිෂ්ඨාම්යහං තත්ර මාරුතෝ වාති ශංකිතඃ ।
තීව්රාංශුශ්ශිශිරාංශුශ්ච භයාත්සංපද්යතේ රවිඃ ॥ 8 ॥
නිෂ්කංපපත්රාස්තරවෝ නද්යශ්ච ස්තිමිතෝදකාඃ ।
භවංති යත්ර යත්රාහං තිෂ්ඨාමි විචරාමි ච ॥ 9 ॥
මම පාරේ සමුද්රස්ය ලංකා නාම පුරී ශුභා ।
සංපූර්ණා රාක්ෂසෛර්ඝෝරෛර්යථේංද්රස්යාමරාවතී ॥ 10 ॥
ප්රාකාරේණ පරික්ෂිප්තා පාංඩුරේණ විරාජතා ।
හේමකක්ෂ්යා පුරී රම්යා වෛඪූර්යමයතෝරණා ॥ 11 ॥
හස්ත්යශ්වරථසංබාධා තූර්යනාදවිනාදිතා ।
සර්වකාලඵලෛර්වෘක්ෂෛස්සංකුලෝද්ද්යානශෝභිතා ॥ 12 ॥
තත්ර ත්වං වසතී සීතේ රාජපුත්රි මයා සහ ।
න ස්මරිෂ්යසි නාරීණාං මානුෂීණාං මනස්විනි ॥ 13 ॥
භුංජානා මානුෂාන්භෝගාංදිව්යාංශ්ච වරවර්ණිනි ।
න ස්මරිෂ්යසි රාමස්ය මානුෂස්ය ගතායුෂඃ ॥ 14 ॥
ස්ථාපයිත්වා ප්රියං පුත්රං රාජ්ඤා දශරථේන යඃ ।
මංදවීර්යස්සුතෝ ජ්යේෂ්ඨස්තතඃ ප්රස්ථාපිතෝ වනම් ॥ 15 ॥
තේන කිං භ්රෂ්ටරාජ්යේන රාමේණ ගතචේතසා ।
කරිෂ්යසි විශාලාක්ෂි තාපසේන තපස්විනා ॥ 16 ॥
සර්වරාක්ෂසභර්තාරං කාමාත්ස්වයමිහාගතම් ।
න මන්මථශරාවිෂ්ටං ප්රත්යාඛ්යාතුං ත්වමර්හසි ॥ 17 ॥
ප්රත්යාඛ්යාය හි මාං භීරු පරිතාපං ගමිෂ්යසි ।
චරණේනාභිහත්යේව පුරූරවසමූර්වශී ॥ 18 ॥
අංගුල්යා න සමෝ රාමෝ මම යුද්ධේ ස මානුෂඃ ।
තව භාග්යේන සංප්රාප්තං භජස්ව වරවර්ණිනි ॥ 19 ॥
ඒවමුක්තා තු වෛදේහී ක්රුද්ධා සංරක්තලෝචනා ।
අබ්රවීත්පරුෂං වාක්යං රහිතේ රාක්ෂසාධිපම් ॥ 20 ॥
කථං වෛශ්රවණං දේවං සර්වභූතනමස්කෘතම් ।
භ්රාතරං ව්යපදිශ්ය ත්වමශුභං කර්තුමිච්ඡසි ॥ 21 ॥
අවශ්යං විනශිෂ්යංති සර්වේ රාවණ රාක්ෂසාඃ ।
යේෂාං ත්වං කර්කශෝ රාජා දුර්බුද්ධිරජිතේංද්රියඃ ॥ 22 ॥
අපහෘත්ය ශචීං භාර්යාං ශක්යමිංද්රස්ය ජීවිතුම් ।
න ච රාමස්ය භාර්යාං මාමපනීයාස්ති ජීවිතම් ॥ 23 ॥
ජීවේච්චිරං වජ්රධරස්ය හස්තාච්ඡචීං ප්රධෘෂ්යාප්රතිරූපරූපාම් ।
න මාදෘශීං රාක්ෂස දූශයිත්වා පීතාමෘතස්යාපි තවාස්ති මෝක්ෂඃ ॥ 24 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ අෂ්ටචත්වාරිංශස්සර්ගඃ ॥
