śrīmadvālmīkīya rāmāyaṇē araṇyakāṇḍam ।
atha aṣṭachatvāriṃśassargaḥ ।
ēvaṃ bṛvantyāṃ sītāyāṃ saṃrabdaḥ paruṣaṃ vachaḥ ।
lalāṭē bhṛkuṭīṃ kṛtvā rāvaṇaḥ pratyuvācha ha ॥ 1 ॥
bhrātā vaiśravaṇasyāhaṃ sāpatnyō varavarṇini ।
rāvaṇō nāma bhadraṃ tē daśagrīvaḥ pratāpavān ॥ 2 ॥
yasya dēvāssagandharvāḥ piśāchapatagōragāḥ ।
vidravanti bhayādbhītā mṛtyōriva sadā prajāḥ ॥ 3 ॥
yēna vaiśravaṇō rājā dvaimātraḥ kāraṇāntarē ।
dvandvamāsāditaḥ krōdhādraṇē vikramya nirjitaḥ ॥ 4 ॥
yadbhayārtaḥ parityajya svamadhiṣṭhānamṛddhimat ।
kailāsaṃ parvataśrēṣṭhamadhyāstē naravāhanaḥ ॥ 5 ॥
yasya tatpuṣpakaṃ nāma vimānaṃ kāmagaṃ śubham ।
vīryādēvārjitaṃ bhadrē yēna yāmi vihāyasam ॥ 6 ॥
mama sañjātarōṣasya mukhaṃ dṛṣṭvaiva maithili ।
vidravanti paritrastāssurāśśakrapurōgamāḥ ॥ 7 ॥
yatra tiṣṭhāmyahaṃ tatra mārutō vāti śaṅkitaḥ ।
tīvrāṃśuśśiśirāṃśuścha bhayātsampadyatē raviḥ ॥ 8 ॥
niṣkampapatrāstaravō nadyaścha stimitōdakāḥ ।
bhavanti yatra yatrāhaṃ tiṣṭhāmi vicharāmi cha ॥ 9 ॥
mama pārē samudrasya laṅkā nāma purī śubhā ।
sampūrṇā rākṣasairghōrairyathēndrasyāmarāvatī ॥ 10 ॥
prākārēṇa parikṣiptā pāṇḍurēṇa virājatā ।
hēmakakṣyā purī ramyā vaiḍhūryamayatōraṇā ॥ 11 ॥
hastyaśvarathasambādhā tūryanādavināditā ।
sarvakālaphalairvṛkṣaissaṅkulōddyānaśōbhitā ॥ 12 ॥
tatra tvaṃ vasatī sītē rājaputri mayā saha ।
na smariṣyasi nārīṇāṃ mānuṣīṇāṃ manasvini ॥ 13 ॥
bhuñjānā mānuṣānbhōgāndivyāṃścha varavarṇini ।
na smariṣyasi rāmasya mānuṣasya gatāyuṣaḥ ॥ 14 ॥
sthāpayitvā priyaṃ putraṃ rājñā daśarathēna yaḥ ।
mandavīryassutō jyēṣṭhastataḥ prasthāpitō vanam ॥ 15 ॥
tēna kiṃ bhraṣṭarājyēna rāmēṇa gatachētasā ।
kariṣyasi viśālākṣi tāpasēna tapasvinā ॥ 16 ॥
sarvarākṣasabhartāraṃ kāmātsvayamihāgatam ।
na manmathaśarāviṣṭaṃ pratyākhyātuṃ tvamarhasi ॥ 17 ॥
pratyākhyāya hi māṃ bhīru paritāpaṃ gamiṣyasi ।
charaṇēnābhihatyēva purūravasamūrvaśī ॥ 18 ॥
aṅgulyā na samō rāmō mama yuddhē sa mānuṣaḥ ।
tava bhāgyēna samprāptaṃ bhajasva varavarṇini ॥ 19 ॥
ēvamuktā tu vaidēhī kruddhā saṃraktalōchanā ।
abravītparuṣaṃ vākyaṃ rahitē rākṣasādhipam ॥ 20 ॥
kathaṃ vaiśravaṇaṃ dēvaṃ sarvabhūtanamaskṛtam ।
bhrātaraṃ vyapadiśya tvamaśubhaṃ kartumichChasi ॥ 21 ॥
avaśyaṃ vinaśiṣyanti sarvē rāvaṇa rākṣasāḥ ।
yēṣāṃ tvaṃ karkaśō rājā durbuddhirajitēndriyaḥ ॥ 22 ॥
apahṛtya śachīṃ bhāryāṃ śakyamindrasya jīvitum ।
na cha rāmasya bhāryāṃ māmapanīyāsti jīvitam ॥ 23 ॥
jīvēchchiraṃ vajradharasya hastāchChachīṃ pradhṛṣyāpratirūparūpām ।
na mādṛśīṃ rākṣasa dūśayitvā pītāmṛtasyāpi tavāsti mōkṣaḥ ॥ 24 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē aṣṭachatvāriṃśassargaḥ ॥
