શ્રીમદ્વાલ્મીકીય રામાયણે અરણ્યકાંડમ્ ।
અથ અષ્ટચત્વારિંશસ્સર્ગઃ ।
એવં બૃવંત્યાં સીતાયાં સંરબ્દઃ પરુષં વચઃ ।
લલાટે ભૃકુટીં કૃત્વા રાવણઃ પ્રત્યુવાચ હ ॥ 1 ॥
ભ્રાતા વૈશ્રવણસ્યાહં સાપત્ન્યો વરવર્ણિનિ ।
રાવણો નામ ભદ્રં તે દશગ્રીવઃ પ્રતાપવાન્ ॥ 2 ॥
યસ્ય દેવાસ્સગંધર્વાઃ પિશાચપતગોરગાઃ ।
વિદ્રવંતિ ભયાદ્ભીતા મૃત્યોરિવ સદા પ્રજાઃ ॥ 3 ॥
યેન વૈશ્રવણો રાજા દ્વૈમાત્રઃ કારણાંતરે ।
દ્વંદ્વમાસાદિતઃ ક્રોધાદ્રણે વિક્રમ્ય નિર્જિતઃ ॥ 4 ॥
યદ્ભયાર્તઃ પરિત્યજ્ય સ્વમધિષ્ઠાનમૃદ્ધિમત્ ।
કૈલાસં પર્વતશ્રેષ્ઠમધ્યાસ્તે નરવાહનઃ ॥ 5 ॥
યસ્ય તત્પુષ્પકં નામ વિમાનં કામગં શુભમ્ ।
વીર્યાદેવાર્જિતં ભદ્રે યેન યામિ વિહાયસમ્ ॥ 6 ॥
મમ સંજાતરોષસ્ય મુખં દૃષ્ટ્વૈવ મૈથિલિ ।
વિદ્રવંતિ પરિત્રસ્તાસ્સુરાશ્શક્રપુરોગમાઃ ॥ 7 ॥
યત્ર તિષ્ઠામ્યહં તત્ર મારુતો વાતિ શંકિતઃ ।
તીવ્રાંશુશ્શિશિરાંશુશ્ચ ભયાત્સંપદ્યતે રવિઃ ॥ 8 ॥
નિષ્કંપપત્રાસ્તરવો નદ્યશ્ચ સ્તિમિતોદકાઃ ।
ભવંતિ યત્ર યત્રાહં તિષ્ઠામિ વિચરામિ ચ ॥ 9 ॥
મમ પારે સમુદ્રસ્ય લંકા નામ પુરી શુભા ।
સંપૂર્ણા રાક્ષસૈર્ઘોરૈર્યથેંદ્રસ્યામરાવતી ॥ 10 ॥
પ્રાકારેણ પરિક્ષિપ્તા પાંડુરેણ વિરાજતા ।
હેમકક્ષ્યા પુરી રમ્યા વૈઢૂર્યમયતોરણા ॥ 11 ॥
હસ્ત્યશ્વરથસંબાધા તૂર્યનાદવિનાદિતા ।
સર્વકાલફલૈર્વૃક્ષૈસ્સંકુલોદ્દ્યાનશોભિતા ॥ 12 ॥
તત્ર ત્વં વસતી સીતે રાજપુત્રિ મયા સહ ।
ન સ્મરિષ્યસિ નારીણાં માનુષીણાં મનસ્વિનિ ॥ 13 ॥
ભુંજાના માનુષાન્ભોગાંદિવ્યાંશ્ચ વરવર્ણિનિ ।
ન સ્મરિષ્યસિ રામસ્ય માનુષસ્ય ગતાયુષઃ ॥ 14 ॥
સ્થાપયિત્વા પ્રિયં પુત્રં રાજ્ઞા દશરથેન યઃ ।
મંદવીર્યસ્સુતો જ્યેષ્ઠસ્તતઃ પ્રસ્થાપિતો વનમ્ ॥ 15 ॥
તેન કિં ભ્રષ્ટરાજ્યેન રામેણ ગતચેતસા ।
કરિષ્યસિ વિશાલાક્ષિ તાપસેન તપસ્વિના ॥ 16 ॥
સર્વરાક્ષસભર્તારં કામાત્સ્વયમિહાગતમ્ ।
ન મન્મથશરાવિષ્ટં પ્રત્યાખ્યાતું ત્વમર્હસિ ॥ 17 ॥
પ્રત્યાખ્યાય હિ માં ભીરુ પરિતાપં ગમિષ્યસિ ।
ચરણેનાભિહત્યેવ પુરૂરવસમૂર્વશી ॥ 18 ॥
અંગુલ્યા ન સમો રામો મમ યુદ્ધે સ માનુષઃ ।
તવ ભાગ્યેન સંપ્રાપ્તં ભજસ્વ વરવર્ણિનિ ॥ 19 ॥
એવમુક્તા તુ વૈદેહી ક્રુદ્ધા સંરક્તલોચના ।
અબ્રવીત્પરુષં વાક્યં રહિતે રાક્ષસાધિપમ્ ॥ 20 ॥
કથં વૈશ્રવણં દેવં સર્વભૂતનમસ્કૃતમ્ ।
ભ્રાતરં વ્યપદિશ્ય ત્વમશુભં કર્તુમિચ્છસિ ॥ 21 ॥
અવશ્યં વિનશિષ્યંતિ સર્વે રાવણ રાક્ષસાઃ ।
યેષાં ત્વં કર્કશો રાજા દુર્બુદ્ધિરજિતેંદ્રિયઃ ॥ 22 ॥
અપહૃત્ય શચીં ભાર્યાં શક્યમિંદ્રસ્ય જીવિતુમ્ ।
ન ચ રામસ્ય ભાર્યાં મામપનીયાસ્તિ જીવિતમ્ ॥ 23 ॥
જીવેચ્ચિરં વજ્રધરસ્ય હસ્તાચ્છચીં પ્રધૃષ્યાપ્રતિરૂપરૂપામ્ ।
ન માદૃશીં રાક્ષસ દૂશયિત્વા પીતામૃતસ્યાપિ તવાસ્તિ મોક્ષઃ ॥ 24 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અરણ્યકાંડે અષ્ટચત્વારિંશસ્સર્ગઃ ॥
